މާލޭގެ މިސްކިތްތައް މަރާމާތުކުރުމަށް ފަންޑު ހޯދުމަށް ސިޓީ ކައުންސިލުން ޓެލެތޯނެއް ބާއްވަނީ
6 ޖެނުއަރީ 2023 | ހުކުރު 02:06ޓެލެތޯންއެއް ބޭއްވުމަށް ނިންމީ މިސްކިތްތައް ކައުންސިލާ ސަރުކާރުން ހަވާލުކުރީ އެއްވެސް ބަޖެޓަކާ ނުލާ ކަމަށް ވުމުންކަމަށް ސިޓީ ކައުންސިލުން ބުނޭ
ސިޓީ ކައުންސިލު މުވައްޒަފުން މިސްކިތް ސާފުކުރަނީ
މާލޭގައި ހުރި މިސްކިތްތައް ރަމަޟާން މަހަށް މަރާމާތު ކުރުމަށް ފަންޑު ހޯދުމަށް މާލެ ސިޓީ ކައުންސިލުން ހަފުތާ ބަންދުގައި ޓެލެތޯނެއް ބާއްވާނެކަމަށް ބުނެފިއެވެ.
ސިޓީ ކައުންސިލުން ބުނީ މިސްކިތްތައް މަރާމާތު ކުރަން ފަންޑު ހޯދުމަށް ޓެލެތޯންއެއް ބޭއްވުމަށް ނިންމީ މިސްކިތްތައް ކައުންސިލާ ސަރުކާރުން ހަވާލުކުރީ އެއްވެސް ބަޖެޓަކާ ނުލާ ކަމަށް ވުމުންކަމަށެވެ. އެހެން ކަމުން އެތަންތަނުގެ މެއިންޓެނަންސް މަސައްކަތްތަކާއި، މަރާމާތުތަކަށް ބޮޑެތި ހޭދައެއް ކުރަންޖެހޭއިރު، ކައުންސިލުގެ ބަޖެޓުން މިކަން އެންމެ އެދެވޭ ގޮތަށް ނުކުރެވޭކަމަށެވެ. އަދި ޓެލެތޯންގެ ސަބަބުން ކުރިއަށް އޮތް ރަމަޟާން މަހަށް، މިސްކިތްތަކުގައި ކުރަންޖެހޭ މަރާމާތުތައް ކުރުމަށް މަގުފަހިވެގެންދާނެކަމަށް ސިޓީ ކައުންސިލުން ބުނެއެވެ.
ޓެލެތޯން ބާއްވަން ނިންމީ އާންމުން އަދި ވިޔަފާރިވެރިންގެ އެހީއާ އެކު މިސްކިތްތައް މަރާމާތުކޮށް ބެލެހެއްޓުމަށްޓަކައިކަމަށް ސިޓީ ކައުންސިލުން ބުނެއެވެ. މީގެކުރިން ދެ ފަހަރެއްގެ މަތިން ޓެލެތޯން ބޭއްވުމަށް ސިޓީ ކައުންސިލުން މަސައްކަތްކޮށްފައިވެއެވެ.
މިވަގުތު ސިޓީ ކައުންސިލުން މާލެއާއި ވިލިމާލޭގައި 34 މިސްކިތެއް ބަލަހައްޓަމުން ގެންދެއެެވެ.
