ވާދަވެރިކަން ބޮޑު، މިއަހަރު ރާއްޖޭގެ އެންމެ މަގުބޫލު މާކެޓަކަށްވާނީ ކޮން ޤައުމެއް؟

ކޮވިޑް-19އާ ގުޅިގެން ރާއްޖޭގެ ފަތުރުވެރިކަމުގެ ދާއިރާ ވެއްޓުނު ނަމަވެސް މިހާރު މިވަނީ އެ ދާއިރާ އަލުން ކޮޅަށް ނެގިފައެވެ. އަހަރަކަށްފަހު އަހަރަކު އަންނަ ފަތުރުވެރިންގެ އަދަދުވެސް އަންނަނީ އިތުރުވަމުންނެވެ. މިދިޔަ އަހަރުވެސް ރާއްޖެއަށް 1.67 މިލިއަން ފަތުރުވެރިން ވަނީ ޒިޔާރަތް ކޮށްފައެވެ. މިއަހަރުވެސް އެ ދާއިރާއިން އޮތް އުއްމީދު ބޮޑެވެ. މިއަހަރު އެންމެ ބޮޑަށް އުފެދޭ ސުވާލަކީ މިއަހަރު ރާއްޖެގެ ޓޮޕް މާކެޓް ގެ ގޮތުގައި އޮންނާނީ ކޮން ޤައުމެއްތޯއެވެ.

ރާއްޖޭގެ ޓޮޕް މާކެޓަށް ވުމަކީ މިއަދު އެކި ޤައުމުތަކުން ޝަރަފުވެރިވާ ކަމެކެވެ. އެއީ ދުނިޔޭގެ އެންމެ މަގުބޫލު މަންޒިލުގެ އެންމެ މަގުބޫލު މާކެޓަށް އެ ޤައުމެއްވާތީއެވެ. އެގޮތުން ފާއިތުވި ތިން އަހަރު ވެސް މި ލަގަބު ހޯދަމުން އައިސްފައިވަނީ އަވަށްޓެރި އިންޑިއާއިންނެވެ. އެ ޤައުމުން މި ލަގަބު ހޯދަން ފެށީ ކޮވިޑާ ގުޅިގެން ޗައިނާގެ މާކެޓުން ރާއްޖެއަށް ފަތުރުވެރިން އައުން ހުއްޓުމަކަށް އައި ފަހުންނެވެ.

މިއަހަރު ފެށިފައިވަނީ ވަނީ ވެސް ވަރަށް އުއްމީދީ ނަންބަރުތަކުންނެވެ. އެވްރެޖުކޮށް ދުވާލެއްގެ މައްޗަށް މިހާރުވެސް 5،000 އަށްވުރެ ގިނަ ފަތުރުވެރިން އަންނައިރު އިޓަލީން މިވަނީ ޓޮޕް މާކެޓުގެ ޖާގަ ހޮދައި އިންޑިއާ ތިންވަނައަށް ވައްޓާލައިފައެެވެ. ދެވަނައިގައި އޮތީ މިދިޔަ އަހަރު ނިމުނު އިރުވެސް ދެވަނައިގައި އޮތް ރަޝިއާއެވެ. ނަމަވެސް އަދިވެސް ލިސްޓުގެ ކުރިއަށް އެރުމުގެ ފުރުސަތު ކޮންމެ ޤައުމަކަށް ވެސް އެބައޮތެވެ.

އިންޑިއާއިން އަނެއްކާވެސް ލިސްޓުގެ ކުރިއަށް އަރަން މަސައްކަތް ކުރި ނަމަވެސް މިއަހަރު އެ ޤައުމަށް ލިސްޓުގެ އެއްވަނަ ދިފާއު ކުރުމަކީ ފަސޭހަކަމަކަށް ނުވާނެއެވެ. އެއީ މި މަހުގެ 8 ވަނަ ދުވަހުން ފެށިގެން ޗައިނާގެ ބޯޑަރުތައް ހުޅުވާލަން ނިންމާފައިވާތީއެވެ. ޗައިނާއަކީ ކޮވިޑުގެ ކުރިން ކޮންމެ އަހަރަކުވެސް ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރަމުން އައި މާކެޓެވެ. އެހެންކަމުން އެ ޤައުމުން އެ މަގާމު މިއަހަރުވެސް ދަމަހައްޓާނެ ކަމަށް ބެލެވެއެވެ.

ޗައިނާ ބަންދު ކޮށްފައި އޮންނަތާ ތިން އަހަރު މިވަނީ ވެފައެވެ. އެހެންކަމުން އެ ޤައުމުގައި ޗުއްޓީ ހޭދަ ކުރަން ދާން ބޭނުންވަފައި ތިބި މީހުންގެ އަދަދު ވެސް މަދު ނުވާނެ ކަން ޔަގީނެވެ. އެ ޤައުމުގެ ފަތުރުވެރިންގެ މެދުގައި އަދިވެސް އެންމެ މަގުބޫލު މަންޒިލަކީ ރާއްޖެއެވެ. އެކަން އެންމެ ފަހުން ހެދި ދިރާސާތަކުން ވަނީ ދައްކައިފައެވެ. އެހެންކަމަށްވާނަމަ އެ ޤައުމު ހުޅުވާލުމާއެކު އެ ޤައުމުން ފަތުރުވެރިން ރާއްޖެއަށް "އޮއްސާލާނެ" ކަމަށް ބެލެވެއެވެ.

ޗައިނާގެ އިތުރުންވެސް ރާއްޖޭގެ މަގުބޫލުކަން އިތުރުވެ މިހާރު އައު މާކެޓުތަކުން ރާއްޖެއަށް އަންނަ ފަތުރުވެރިންގެ އަދަދު ދަނީ އިތުރުވަމުންނެވެ. މީގެ ތެރޭގައި އެމެރިކާ އާއި ކަޒަކިސްތާނު ހިމެނެއެވެ. އެމެރިކާގެ ޓީވީ ޝޯތަކާއި ސީރިޒްތަކާއި ފިލްމީ ތަރިންގެ ތެރޭގައި ވެސް އެންމެ މަގުބޫލު ވާހަކައަކަށް މިހާރު ވެފައި އޮންނަނީ ރާއްޖޭގައި ޗުއްޓީ ހޭދަ ކުރުމުގެ ވާހަކަތަކެވެ. މިއީ އިންޑިއާއިން ރާއްޖޭގެ ޓޮޕް މާކެޓުގެ މަގާމު ހޯދުމުގެ ކުރިން އެ ޤައުމުގެ ފިލްމީ ތަރިންގެ ތެރޭގައި ވެސް ކަންކަން ވަމުން އައިގޮތެވެ.

މިއަހަރަށް ސަރުކާރުން ލަފާ ކުރަނީ ރާއްޖެއަށް 1.9 މިލިއަން ފަތުރުވެރިންގެ ޓާގެޓެކެވެ. އެ އަމާޒަށް ވާސިލުވުމަށް މިދިޔަ އަހަރަށްވުރެ ބޮޑަށް، މަސައްކަތް ކުރާނެ ކަމަށް ދުނިޔޭގެ އެކި ޤައުމުތަކުގައި ރާއްޖެ އިޝްތިހާރު ކުރުމުގެ ޒިންމާއާ ހަވާލުވެފައިވާ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ވެސް ވަނީ ބުނެފައެވެ.

ދުނިޔޭގައި ކޮވިޑު ފަދަ އާލަމީ ވަބާ ފެތުރުނަމަވެސް ފަތުރުުވެރިންގެ މެދުގައި ރާއްޖެއަށް އޮތް މަގުބޫލުކަމަށް ބަދަލެއް ނާންނަނީ ގުދުރަތީ ގޮތުން ރާއްޖެ އޮންނަ ގޮތުގެ ސަބަބުންނެވެ. ރާއްޖޭގެ ރަށްތަކާއި ރިސޯޓުތަކަކީ ވަކިވަކިން އޮންނަ ތަންތަނަށްވާއިރު ދުނިޔެ މި އޮތް ހާލަތްތަކަށް ބަލައި ރާއްޖެއަކީ އެންމެ ރައްކާތެރި އެއް މަންޒިލް ކަމުގައި ގިނަ ފަތުރުވެރިން ދެކެއެވެ.