މިލިއަން ޑޮލަރާމެދު ޖިނާއީ ތުހުމަތެއް ނެތްއިރުވެސް، ޔާމީނާއި ޔޫސުފް ނައީމްގެ ވާހަކަ ދިމަލެއްނުވޭ

އާރަށު ހިޔާނާތުގެ މައްސަލައިގައި އުފުލާފައިވާ ދައުވާތައް ސާބިތުވެ، ކުރީގެ ރައީސް އަބްދުﷲ ޔާމީނު ގެންދަވަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. ޔާމީނަށް ރިޝްވަތު ދެއްވި މައްސަލަ ސާބިތުވެ ޔޫސުފް ނައީމަށް ވަނީ 3 އަހަރާއި 2 މަހާއި 12 ދުވަހުގެ ޖަލު ހުކުމެއް އިއްވާފައެވެ.

ކްރިމިނަލް ކޯޓުގެ ހުކުމުގައި ބުނެފައިވާގޮތުގައި، ޔާމީނުގެ އެކައުންޓަށް ޔޫސުފް ނައީމް ޖަމާކުރި މިލިއަން ޑޮލަރާމެދު ޔާމީނާއި ޔޫސުފް ނައީމްވެސް ފުރަތަމަ ވާހަކަދެއްކެވީ ދެ ގޮތަކަށެވެ. ނަމަވެސް އޭރު އެއީ މައްސަލައަކާ ގުޅޭ ޖިނާއީ ތުހުމަތެއްވެސް ނެތް މަރުހަލާގައެވެ.

އެގޮތުން ބަލާއިރު، ޔޫސުފް ނައީމްގެ އެކައުންޓުން ދޫކުރި 1 މިލިއަން ޑޮލަރުގެ ޗެކާމެދު ޖިނާއީ އެއްވެސް ތުހުމަތެއް ނެތް މަރުހަލާގައި، ބޭންކުން ވަނީ ޔޫސުފް ނައީމާއި ޔާމީނާވެސް ސުވާލުކޮށްފައެވެ.

އޭރު ޔޫސުފް ނައީމް ވިދާޅުވެފައިވަނީ އެއީ ވިޔަފާރީގެ މުއާމަލާތެއް ކަމަށެވެ. އެހެންނަމަވެސް އެ މައުލޫމާތުތައް ލިއުމުން ހިއްސާކުރެއްވުމަށް ބޭންކުން އެދުމުން، އޭނާ އެ މައުލޫމާތު ފޯރުކޮށްދެއްވާފައެއް ނުވެއެވެ. އެހާހިސާބުންވެސް ސުވާލު އުފެދޭ ކަންކަން ފެންމަތިވެގެން ދިޔައެވެ.

ދެން އޮތީ ބޭންކުން ރައީސް ޔާމީނާ ސުވާލުކުރުމުން، ރައީސް ޔާމީނު ދެއްވި ޖަވާބެވެ. ޖިނާއީ އެއްވެސް ތުހުމަތެއް ނެތި ބޭންކުން ސުވާލު ކުރުމުން ޔާމީނު ވިދާޅުވީ، އެއީ ސިޔާސީ ކެމްޕޭނަށް އެހީވުމުގެ ފައިސާ ކަމަށެވެ. ޖިނާއީ އެއްވެސް ތުހުމަތެއް ނެތް މަރުހަލާގައި އެއް ފަރާތުން މިއީ ވިޔަފާރީގެ މުއާމަލާތެއްކަމަށް ވިދާޅުވިއިރު، ދެން ހުންނެވި ފަރާތުން ވިދާޅުވީ މިއީ ސިޔާސީ ކެމްޕޭނުގެ ފައިސާ ކަމަށެވެ.

އެކަމުންވެސް މި މުއާމަލާތުގެ ނުނިޔަތް އެކުލެވޭ މިންވަރު ހާމަވާކަމަށް ހުކުމުގައި ބުނެއެވެ.

ޖިނާއީ އެއްވެސް ތުހުމަތެއް ނެތް މަރުހަލާއެއްގައި، މުއާމަލާތުގެ ދެ ބައިވެރިން ބޭންކަށް ދިން މައުލޫމާތުގައި އެއްވެސް ގުޅުމެއް ނެތުމުންނާއި، ޔޫސުފް ނައީމްގެ ފަރާތްޕުޅުން ބޭންކަށް މުއާމަލާތާގުޅޭ އެއްވެސް ލިއުމެއް ހާމަކުރައްވާފައި ނެތުމުން، މި މުއާމަލާތުގެ ނުނިޔަތް ހާމަވެގެންދެއެވެ.

ބޭންކަށް ދެ ގޮތަކަށް މައުލޫމާތު ދެއްވުމަށްފަހު، ޖިނާއީ ތުހުމަތު އުފަންވުމުން، ދެބޭފުޅުންވެސް ދެން ތިއްބެވީ ހަނެވެ. ތަހުގީގު މަރުހަލާގައިވެސް ދެބޭފުޅުން ނިންމެވީ ހަނު ތިއްބެވުމަށެވެ. ދިފާއީ ހެތްކެއް ހުރިކަމަށް ތަހުގީގުގައި ހާމަކުރައްވާފައެއްވެސް ނުވެއެވެ.

އެހެންނަމަވެސް ޝަރީއަތް ފެށުމުން ހެކިތަކެއް ހުށައަޅާފައިވާއިރު، ރައީސް ޔާމީނުވެސް ދެން މަސައްކަތްކުރެއްވީ އެއީ ޑޮލަރު މާރުކުރުމުގެ ސައްހަ މުއާމަލާތެއްކަމަށް ދެއްކެވުމަށެވެ. އެކަން ހުކުމުގައިވެސް ސާފުކޮށް ބަޔާންކޮށްފައިވެއެވެ. ނަމަވެސް އެއީ ތަހުގީގުގެ ކުރިން ހުދު ރައީސް ޔާމީނު ދެއްކެވި ވާހަކަތަކާވެސް ފުށުއަރާ ވާހަކައެއްކަން ހުކުމުގައި ފާހަގަކޮށްފައިވެއެވެ. ސަބަބަކީ އޭރު ޔާމީނު ވިދާޅުވަމުން ގެންދެވީ އެއީ ސިޔާސީ ކެމްޕޭނުގެ ފައިސާކަމަށެވެ.

ހަގީގަތަކީ ވ. އާރަށުގެ މުއާމަލާތާ ގުޅިގެން ޔާމީނު އެ ވިދާޅުވާފަދަ ޑޮލަރު މާރު ކުރުމުގެ ސައްހަ މުއާމަލާތެއް ހިނގާފައިވާނަމަ، ތަހުގީގު މަރުހަލާގައި އެކަމާގުޅޭ ދިފާއީ ހެކިތައް ހާމަކުރައްވަންވެސް އަަވަސްވެގަންނާނެ ކަމެވެ. ދައުލަތުންވެސް ވަނީ އެއީ އެފަދަ މައުސޫމު މުއަމަލާތެއް ކަމުގައިވާނަމަ، އެމީހެއްގެ މައުސޫމުކަން ދަލީލު ކޮށްދިނުމަށް އޭރު މަސައްކަތް ނުކުރައްވަންވީ ސަބަބެއް ނެތްކަމަށް ބުނެފައެވެ.