މާލޭ މަގުތައް ސާފުކުރުމަށް އީޕީއޭއިން ސިޓީ ކައުންސިލަށް ގޮވާލައިފި
29 ޑިސެމްބަރު 2022 | ބުރާސްފަތި 13:26ވެމްކޯއިން މިހާރު ކުނި ނަގަމުންދަނީ ރަޖިސްޓްރީކޮށްފައިވާ ގޭބީސީތަކުން އެކަނި
މާލޭ މަގުމައްޗަށް ޖަމާކޮށްފައިހުރި ކުނިތަކެއް
މާލޭގެ މަގުތައް ވަރަށް ބޮޑަށް ހަޑިވެފައިވާތީ އެ މަގުތައް ސާފުކުރުމުގެ މަސައްކަތާ ހަވާލުވެފައިވާ ފަރާތުން އެކަން ކުރުމަށް، އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)އިން އެދިއްޖެއެވެ.
މާލެއާއި ވިލިމާލޭގެ މަގުތަކާއި ޕާކުތަކާއި މައިޒާންތައް ކުނިކަހައި ސާފުކޮށް، ކުނި ނެގުމުގެ މަސައްކަތް ކުރުމަށް މާލެ ސިޓީ ކައުންސިލާ ވެމްކޯއާ ދެމެދު ވެފައިވާ އެއްބަސްވުމުގެ މުއްދަތު މި މަހުގެ 25 ވަނަ ދުވަހު ހަމަވުމާއެކު، ވެމްކޯއިން ވަނީ އާންމު ތަންތަނުން ކުނި ނެގުމުގެ މަސައްކަތް ހުއްޓާލާފައެވެ. މިއާއެކު މިހާރު މި މަސައްކަތާ ހަވާލުވެފައިވަނީ މާލޭ ސިޓީ ކައުންސިލުންނެވެ.
ސިޓީ ކައުންސިލުން މާލޭގެ އާންމު ތަންތަން ސާފުކޮށް ކުނި ނަގަމުން ނުދާތީ، މަގުތައް މައްޗަށް ކުނި ގިނަވެ ގިނަ ބަޔަކު ގެންދަނީ ކަންބޮޑުވުން ފާޅުކުރަމުންނެވެ. މިކަމާ ގުޅިގެން އީޕީއޭއިން ވަނީ ބަޔާނެއް ނެރެފައެވެ. އަދި ގާނޫނީގޮތުން މާލޭގެ މަގުތައް ސާފުކޮށް ބެލެހެއްޓުމުގެ ޒިންމާ މަތިކުރެވިފައިވާ ފަރާތުން މާލެތެރެ ސާފުކުރުމުގެ މަސައްކަތް ލަސްނުކޮށް ކުރިއަށްގެންދިއުމަށް އީޕީއޭއިންް ވަނީ އިލްތިމާސްކޮށްފައެވެ.
މާލޭގެ އާންމު ތަންތަން ސާފުކޮށް ކުނި ނެގުމުގެ މަސައްކަތާ ސިޓީ ކައުންސިލުން ހަވާލުވި ހިސާބުން ފެށިގެން ވެމްކޯއިން ކުނި ނަގަމުންދަނީ އެ ކުންފުނީގައި ރަޖިސްޓްރީ ކޮށްފައިވާ ގޭބީސީތަކުން އެކަންޏެވެ. ރަޖިސްޓްރީ ނުކުރާ ގޭބީސީތަކުން މަގުމައްޗަށް ކުނި ނެރެމުންދާތީ މާލެތެރެ ހަޑިވަމުން ދިއުމާއެކު، މަގުތައްމަތިން ކުނި ނަގައި ސާފުކުރުމަށް ކައުންސިލުން ވަނީ ވެމްކޯއަށް ސިޓީއަކުން އަންގާފައެވެ. އަދި އެކަން ނުކޮށްފިނަމަ ދައުވާކުރާނެ ކަމަށް ކައުންސިލްގެ ސިޓީގައި ވާކަމަށް ވެމްކޯއިން ބުނެފައިވެއެވެ.
ވެމްކޯއިން ބުނީ ސިޓީ ކައުންސިލަށް މި މަސައްކަތް ނުކުރެވޭނަމަ ވެމްކޯއިން މި މަސައްކަތާ ހަވާލުވާން ތައްޔާރަށް ތިބި ކަމަށެވެ. މިކަން ކުރުމުގެ ގާބިލްކަން އެބަހުރި ކަމަށްވެސް ވެމްކޯއިން ބުނެފައިވެއެވެ.
