ފަރެސްމާތޮޑާ އެއަރޕޯޓުގެ 85 އިންސައްތަ މަސައްކަތް ނިންމައިފި
27 ޑިސެމްބަރު 2022 | އަންގާރަ 17:55ރަންވޭ، ޓެކްސީވޭ، އޭޕްރަން މަސައްކަތްތަކުގެ 93 ޕަސެންޓް ވަނީ ނިމިފައި
ފަރެސްމާތޮޑާ އެއަރޕޯޓުގެ ޓާމިނަލް
ގދ. ފަރެސްމާތޮޑާ އެއަރޕޯޓުގެ 85 އިންސައްތަ މަސައްކަތް ނިންމައިފިއެވެ.
ފަރެސްމާތޮޑާ އެއަރޕޯޓު ތަރައްގީކުރުމުގެ މަސައްކަތް ކުރަމުން އަންނަނީ އެމްޓީސީސީއާއި ހަވާލުކޮށްގެންނެވެ. ފަރެސްމާތޮޑާ އެއަރޕޯޓުގެ މަސައްކަތާއި ގުޅޭގޮތުން އެ ކުންފުނިން ބުނެފައިވަނީ އެއަރޕޯޓުގައި މިހާރު ކުރަމުން ދަނީ ރަންވޭ، ޓެކްސީވޭ، އޭޕްރަން މަސައްކަތްތަކް ނިންމުމުގެ މަަސައްކަތް ކަމަށާއި، އެ މަސައްކަތުގެ 93 އިންސައްތަ ނިމިފައިވާ ކަމަށެވެ.
މި މަޝްރޫޢުގެ ދަށުން، ރަންވޭގެ ސަބްގްރޭޑް އަދި ސަބްބޭސް މަސައްކަތްކުރުމާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ޤާއިމުކުރުމާއި، ފަޔަރ ބިލްޑިންގ އެއް އިމާރާތް ކުރުމާއި، ޓާރމިނަލް ބިލްޑިންގ އެއް އިމާރާތް ކުރުމުގެ މަސައްކަތް ހިމެނެއެވެ.
ފަރެސްމާތޮޑާ އެއަރޕޯޓު ތަރައްގީ ކުރުމުގެ މަޝްރޫއުގެ ދަށުން އެ އެއަރޕޯޓުގެ ރަންވޭގައި ލައިޓު ހަރުކޮށް، މި މަހުގެ ތެރޭގައި ވަނީ ޓެސްޓްކޮށްފައެވެ. މިއީ އެ އެއަރޕޯޓަށް ރޭގަނޑު ވަގުތު ވެސް ފްލައިޓުތައް ދަތުރު ކުރެވޭ ގޮތް ހެދުމަށް ހަރުކޮށްފައިވާ ލައިޓުތަކެކެވެ. އެ އެއަރޕޯޓުގައި މިހާރު ކުރަމުން އަންނަނީ އެއަރޕޯޓު ހުޅުވުމަށް ވާން ޖެހޭ ފަހުގެ ތައްޔާރީތަކުގެ މަސައްކަތެވެ.
ފަރެސްމާތޮޑާ އެއަރޕޯޓް ތަރައްގީ ކުރުމުގެ މަޝްރޫއު ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއެވެ. އެ ކުންފުންޏާ މި މަޝްރޫއު ހަވާލު ކޮށްފައިވަނީ 144.8 މިލިއަން ރުފިޔާއަށް 2020 ވަނަ އަހަރުގެ ނޮވެމްބަރު މަހުގައެވެ.
މި މަޝްރޫއުގެ ދަށުން ގިނަ މަސައްކަތްތައް ނިމިފައިވާއިރު އަންނަ އަހަރުގެ ޖެނުއަރީ ނުވަތަ ފެބްރުއަރީ ހިސާބުގައި އެއާޕޯޓު ބޭނުންކުރަން ފެށޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވަނީ މީގެ ކުރިން "ރާއްޖެ ޓީވީ" އަށް ވިދާޅުވެފައެވެ. އެގޮތުން މި މަޝްރޫއުގެ ދަށުން ރަންވޭއާއި ފަޔަރ ބިލްޑިންއާއި އެއަރ ޓްރެފިކް ކޮންޓްރޯލް ޓަވަރުގެ މަސައްކަތްތައް މިހާރު ވަނީ ނިމިފައެވެ. އަދި ޓަރމިނަލްގެ ސްޓްރަކްޗަރުގެ މަސައްކަތްތަކާއި އެއަރޕޯޓާއި ފަރެސްމާތޮޑާ ގުޅުވާލާ ކޯޒްވޭގެ މަސައްކަތް ވެސް ވަނީ ނިމިފައެވެ.
ފަރެސްމާތޮޑާ އެއަރޕޯޓުގެ އެންމެ ފަހުގެ މަސައްކަތްތައް ހިއްސާކޮށް އެ އެއަރޕޯޓުގެ ފެސްބުކް ޕޭޖުގައި އާއްމުކޮށްފައިވާ ގޮތުގައި ހުކުރު ދުވަހުގެ ރޭ ވަނީ އެއަރޓްރެފިކް ކޮންޓްރޯލް ޓަވަރުގެ ރާޑަރާއި ރަންވޭ ލައިޓިން ސިސްޓަމްތައް ޓެސްޓުކޮށްފައެވެ. އެހެންކަމުން އެއަރޕޯޓު އޮޕަރޭޝަނަށް ގެނައުމާއެކު ވެސް އެ އެއަރޕޯޓަށް ރޭގަނޑު ފްލައިޓުތައް ޝެޑިއުލް ކުރެވޭނެއެވެ.
ފަރެސްމާތޮޑާ އެއަރޕޯޓަކީ ގދ. އަތޮޅުގައި ތަރައްގީ ކުރާ ތިންވަނަ އެއަރޕޯޓެވެ. މިހާރު އެ އަތޮޅުގައި އޮންނަނީ ކާޑެއްދޫ އެއަރޕޯޓާއި މާވަރުލު އެއަރޕޯޓެވެ.
