އެންމެ ފަހުން ގަކްޕޯ ލިވަޕޫލަށް

ނެދަލެންޑްސްގެ ޒުވާން ފޯވާޑް ކޯޑީ ގަކްޕޯ އެންމެ ފަހުން ލިވަޕޫލަށް ބަދަލުވާން ބަދަލުވެއްޖެ އެވެ.

އުމުރުން 23 އަހަރުގެ ކުޅުންތެރިޔާ ހޯދުމަށް ޕްރިމިއާ ލީގުގެ މެންޗެސްޓަރ ޔުނައިޓެޑުން ވެސް މަސައްކަތް ކުރި ކަމަށް ވެސް ރިޕޯޓުތައް ބުނެ އެވެ. ނަމަވެސް ޔުނައިޓެޑުން ގަކްޕޯގެ މަޝްވަރާތައް ކުރަމުން ދަނިކޮށް، ލިވަޕޫލުން އޭނާގެ ޑީލް އަވަހަށް ނިންމީ އެވެ. އެއީ އެ ޓީމަށް މިހާރު ދިމާވެފައިވާ އަނިޔާގެ މައްސަލަތަކާއި ވެސް ގުޅިގެންނެވެ. ޒުވާން ކުޅުންތެރިޔާ ވަނީ މިއަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުގައި ވެސް މޮޅު ކުޅުމެއް ދައްކައިފަ އެވެ. ނެދަލެންޑްސްއާއެކު މުބާރާތަށް ކުރިމަތިލައި، ގަކްޕޯ ވަނީ އެ ޓީމު މޮޅު ކޮށްދިނުމުގައި މުހިންމު ދައުރެއް އަދާކޮށްފަ އެވެ. މުބާރާތުގެ ގްރޫޕް ސްޓޭޖުގައި ނެދަލެންޑްސް ކުޅުނު ތިން މެޗުގައި ވެސް ގަކްޕޯ ވަނީ ލަނޑު ޖަހާފަ އެވެ. އެއީ ސެނެގާލް، އިކުއެޑޯ، އަދި ޤަތަރާ ދެކޮޅަށެވެ.

ރިޕޯޓުތައް ބުނާ ގޮތުން ގަކްޕޯ ލިވަޕޫލަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. ރިޕޯޓުތަކުގައިވާ ގޮތުން ޕީއެސްވީން ގަކްޕޯ ހޯދުމަށް ލިވަޕޫލުން ޖުމުލަ 50 މިލިއަން ޕައުންޑު ޚަރަދުކުރާނެ އެވެ. އެކަމާ ގުޅިގެން ޕީއެސްވީގެ ޑިރެކްޓަރު މާސެލް ބްރޭންޑް ވިދާޅުވީ، ޕީއެސްވީން ގަކްޕޯގެ ޓްރާންސްފާ ފީއާ ގުޅޭ އެއްވެސް އެންގުމެއް ހާމަކުރަން ބޭނުންނުވާ ކަމަށެވެ. ނަމަވެސް ގަކްޕޯގެ ޓްރާންސްފާ އަކީ ޕީއެސްވީގެ ރެކޯޑު ޓްރާންސްފާއެއް ކަމަށް ވިދާޅުވި އެވެ.

ގަކްޕޯ އައީ މި ސީޒަންގައި ޕީއެސްވީ އަށް ވެސް މޮޅަށް ކުޅެމުންނެވެ. އެގޮތުން މި ސީޒަންގައި ކުޅުނު 24 މެޗުގައި އޭނާ ވަނީ އެ ކުލަބަށް 13 ލަނޑޔު ޖަހައިދީފަ އެވެ.