މިއަދު ހެނދުނު 11:00 އިން ފެށިގެން ދެފަހަރެއްގެ މަތިން ރ. އަލިފުށިން ކަރަންޓުގެ ޚިދުމަތް ކެޑިފައިވާއިރު، މިރޭ އެރަށަށް ކަރަންޓު ދެވޭވެވަރު ވާނެ ކަމަށް ފެނަކައިން ބުނެފިއެވެ. 

އެރަށުގައި ކަރަންޓް ދިނުމަށް 600 ކިލޯވޮޓްގެ ޖަނަރޭޓަރަކާއި، 400 ކިލޯވޮޓްގެ ޖަނަރޭޓަރެއް ހުރެއެވެ. އެހެންނަމަވެސް 600 ކިލޯވޮޓްގެ ޖަނަރޭޓަރުގެ ރޭޑިއޭޓަރ އެއްކޮށް ހަލާކުވުމުގެ ސަބަބުން އެ ޖަނަރޭޓަރު ބޭނުން ނުކުރެވޭކަމަށް ފެނަކައާއި ހަވާލާދީ ކައުންސިލުން ބުނެއެވެ. އަދި 400 ކިލޯވޮޓްގެ ޖަނަރޭޓަރުން ރަށަށް ކަރަންޓު ދެވޭވަރަށް ލޯޑް ނުހިފާކަމަށްވެސް ކައުންސިލުން ވަނީ ބުނެފައެވެ.

މި މައްސަލައާއި ގުޅިގެން ފެނަކައިގެ މެނޭޖިން ޑިރެކްޓަރ އަހުމަދު ޝަރީފު ވިދާޅުވީ، އެރަށުން ކަރަންޓް ގޮސްފައިވަނީ ބޭނުންކުރަމުން އައި އެއް ޖަނަރޭޓަރަށް ދިމާވި މައްސަލައަކުން ކަމަށެވެ. އަދި މިހާރު ކުރަމުންދަނީ، ރޭޑިއޭޓަރު ހަލާކުވެފައިވާ 600 ކިލޯވޮޓްގެ ޖަނަރޭޓަރާއި، ރަނގަޅަށް މަސައްކަތްކުރާ 400 ކިލޯވޮޓްގެ ޖަނަރޭޓަރު ސިންކްރޮނައިޒް ކުރުމުގެ މަސައްކަތް ކަމަށާ، މި މަސައްކަތް ނިމުމުން ކުރިއަށް އޮތް ދެ ގަޑިއެއްހާ އިރު ތެރޭގައި އަލިފުއްޓަށް ކަރަންޓް ދެވޭވަރު ވާނެކަމަށެވެ.

" 400 ކިލޯވޮޓްގެ ޖަނަރޭޓަރު ރަނގަޅު، އެކަމު އޭގެން ހިފަހައްޓާނީ، ބައެއް ހައި ވޯލްޓެޖް އެއްޗެހި ބޭނުން ކުރުން މަދުކުރުމުން، އެކަމަށް ރައްޔިތުންގެ އެއްބާރުލުން ބޭނުންވާނެ" އޭނާ ވިދާޅުވިއެވެ.

ޝަރީފް މިހެން ވިދާޅުވެފައިވާއިރު، އެރަށުގެ އިންޖީނުގޭގައި މަސައްކަތްކުރާ ފެނަކައިގެ ޓީމާއި ހަވާލާދީ ކަމަށް ވިދާޅުވެ، ކައުންސިލުން ބުނީ،  އެރަށުގައި ބޭނުންކުރާ ދެ އިންޖީނަށްވެސް މައްސަލަޖެހިފައިވާ ކަމަށާއި، މިރޭ އެރަށަށް ކަރަންޓް ލިބޭނޭކަމުގެ އެއްވެސް ޔަގީންކަމެއް ނެތްކަމަށެވެ.

އަލިފުށީ ކައުންސިލްގެ ނައިބު ރައީސް އަބުދުއްރަހުމާން ޔޫސުފް ވިދާޅުވީ، އަލިފުށިން ހެނދުނު 11 ޖެހިއިރު ކަރަންޓް ކެނޑުމަށްފަހު އަލުން ކަރަންޓުގެ ޚިދުމަތް ލިބޭވަރުވީ، ހަވީރު 17:30 ހާއިރު ކަމަށެވެ. އަދި އޭގެފަހުން އަނެއްކާވެސް ގާތްގަނޑަކަށް 19:30 ހާއިރު ކަރަންޓު ކެނޑުނުގޮތަށް އަދިވެސް ކަރަންޓް ނުލިބޭކަމަށެވެ.

ގާތްގަނޑަކަށް 3000 މީހުންގެ އާބާދީއެއް އޮންނަ އަލިފުށީގައި ކަރަންޓު ނެތުމުގެ ސަބަބުން ބައެއް ރައްޔިތުންވަނީ މަގުތަކަށާއި، އިންޖީނުގެ ހުންނަ އިމާރާތް ކައިރިއަށް އެއްވެ ހިތްހަމަ ނުޖެހުން ފާޅުކުރަން ފަށާފައެވެ.

އަލިފުށިން ކަރަންޓްގެ ޚިދުމަތް މެދުކެނޑިފައިވާއިރު، ގދ. ނަޑެއްލާގައިވެސް އަންގާރަ ދުވަހުގެ މެންދުރު 14:30 އިން ފެށިގެން ވަނީ ކަރަންޓްގެ ޚިދުމަތް މެދު ކެނޑިފައެވެ.