އާރަށު ހިޔާނަތް: ޔާމީނުގެ މައްޗަށް ދައުވާ ސާބިތުވެއްޖެ، ޙުކުމް މެންދުރު
އެކައުންޓަށް ޖަމާކުރި ފައިސާއަކީ، ވ އާރަށު ހިޔާނާތުގެ ފައިސާކަމަށް މި މައްސަލައިގައި ހުށައެޅިފައިވާ ހެކިތަކުން އެނގޭ
ވ އާރަށު ހިޔާނާތުގެ މައްސަލައިގެ ޙުކުމް ކުރެއްވުމުގެ އަޑުއެހުން
ވ އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް ކުރާ ދައުވާގެ ކުށް ސާބިތުވާކަމަށް ކަނޑައަޅުއްވައިފިއެވެ.
ޔާމީނުގެ އިތުރުން، ޔޫސުފް ނައީމްގެ މައްޗަށް ކުރާ ދައުވާގެ އަޑުއެހުންތައް ކްރިމިނަލް ކޯޓުގައި ކުރިއަށް ގެންދަވަނީ އެ ކޯޓުގެ އިސްގާޒީ އަހުމަދު ޝަކީލެވެ. އާދިއްތަ ދުވަހުގެ އަޑުއެހުމަކީ މި މައްސަލައިގެ ޙުކުމް ކުރެއްވުމަށް ބޭއްވެވި އަޑުއެހުމެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކުރާ ދައުވާތަކުގެ ތެރޭގައި ހިމެނެނީ ޤާނޫނު ނަންބަރު 2014/10 (މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނު) ގެ ދަށުން މަނީ ލޯންޑްރިންގެ ދަޢުވާއެވެ.
އަދި ދެވަނަ ދައުވާއެއްގެ ގޮތުގައި ކުރީގެ ރައީސް ޔާމީންގެ މައްޗަށް ކޮށްފައިވަނީ ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތުގެ 510 ވަނަ މާއްދާގެ ދަށުން ރިޝްވަތު ޤަބޫލުކުރުމުގެ ކުށުގެ ދަޢުވާއެވެ.
އެ ދެ ދައުވާވެސް ޝަރީއަަތަށް ސާބިތުވާކަމަށް އިސްގާޒީ ވަނީ ބަޔާން ކުރައްވާފައެވެ. އިސްގާޒީ ވިދާޅުވީ، ރައީސް ޔާމީނުގެ މަޤާމަށް ބަލާއިރު، އެހާ ބޮޑު އަދަދެއްގެ ފައިސާއެއް ޔާމީނުގެ އެކައުންޓަށް ސައްޙަ ގޮތުގައި ޖަމަވާން ޖެހޭ ސަބަބެއް ދަލާލަތު ކޮށްދެވިފައިނުވާ ކަމަށެވެ.
ޔާމީނުގެ އެކައުންޓަށް ޖަމާކުރި ފައިސާއަކީ، ވ އާރަށު ހިޔާނާތުގެ ފައިސާކަމަށް މި މައްސަލައިގައި ހުށައެޅިފައިވާ ހެކިތަކުން އެނގޭކަމަށް އިސްގާޒީ ވިދާޅުވިއެވެ.
އޭގެ އިތުރުން ޔޫސުފް ނައީމްގެ މައްޗަށް ކުރާ ދައުވާ ވެސް ވަނީ ސާބިތުވާކަމަށް ކަނޑައަޅުއްވާފައެވެ.
އެއަށްފަހު އަދަބާ ގުޅޭގޮތުން ވާހަކަ ދެއްކުން ވަނީ ކުރިއަށް ގެންގޮސްފައެވެ. ދައުލަތުން ބުނާ ގޮތުގައި އަދަބުގެ ދަރަޖަ މަތިވާނެ ޙާލަތްތަކެއް މި މައްސަލައިގައި އެބަހުއްޓެވެ.
މަނީ ލޯންޑަރިންގ ދައުވާގައި ދައުލަތުން އެދުނީ 11 އަހަރުގެ ޖަލު ޙުކުމެއް އިއްވައިދިނުމަށެވެ. ރިޝްވަތު ދިނުމާއި، ޤަބޫލު ކުރުމުގެ ކުށުގެ ދައުވާގައި ދައުލަތުން އެދުނީ 8 އަހަރުގެ ޖަލު ޙުކުމެއް އިއްވައިދިނުމަށެވެ.
އަދަބާ ގުޅޭގޮތުން ވާހަކަ ދެއްކުމަށް ފުރުސަތު ދެއްވުމުން ދިފާއުން ވަނީ އިތުރު ވަގުތު ބޭނުންވާކަން ފާހަގަ ކުރައްވައި، ޤާނޫނުގައި ބުނާ 10 ދުވަހުގެ މުއްދަތެއް ދެއްވުމަށް އެދިލައްވާފައެވެ.
އިސްގާޒީ ވިދާޅުވީ، އަދަބާ ގުޅޭގޮތުން ވާހަކަ ދެއްކެވުމަށް 14:00 ގައި އަޑުއެހުން ކުރިއަށް ގެންދަވާނެކަމަށާއި، މިއަދު ޝަރީއަތުން މައްސަލަ ނިންމަވާނެ ކަމަށެވެ.
