ގައުމީ ބޮޑީބޯޑިންގ ލީގު ޗެމްޕިއަނަކަށް އަލީ ޚުޝްރުވާން އަހުމަދު (ކުޑައައްޔަ) ހޮވުނުއިރު، ޖޫނިއަރ ލީގު ޗެމްޕިއަނަކަށް އާމިން އުމަރު މޫސާ ހޮވިއްޖެއެވެ.

މިއަހަރުގެ ލީގު ޗެމްޕިއަންކަން ކުޑަ އައްޔަ ހޯދީ ޖުމުލަ 2800 ޕޮއިންޓާއެކުއެވެ. ޖޫނިއާ ޗެމްޕިއަަންކަން އާމިން ހޯދީ ޖުމުލަ 2174 ޕޮއިންޓާއެކުއެވެ. ހުކުރު ދުވަހު ނިމުނު އެމްޓީޓީސީ ބަނޑުފިލާ ޗެލެންޖުގައި ވާދަކޮށް ކުޑަ އައްޔަ ވަނީ ޑްރޮޕްނީއާއި މެންސް އޯޕަންގެ އެއްވަނަ ހޯދާފައެވެ. އާމިން ވަނީ ޖޫނިއަރ މެންސްގެ ޗެމްޕިއަންކަމާއި، މެންސް އޯޕަންގެ ތިންވަނަ ހޯދާފައެވެ.

ޑްރޮޕްނީގެ އެއްވަނަ ކުޑަ އައްޔަ ހޯދީ ފައިނަލްގައި އަލީ ޝަމް ރާފިއުގެ މައްޗަށް 9.33ގެ ސްކޯއަކުން ކުރި ހޯދައިގެންނެވެ. ފައިނަލް ހީޓުގައި ކުޑަ އައްޔަ ވަނީ ދެ ވަނަ ރާޅުގައި 5.33ގެ ސްކޯއަކާއި، ތިން ވަނަ ރާޅުގައި 7.00ގެ ސްކޯއެއް ހޯދާފައެވެ. ދެ ރާޅު އެއްކޮށް ކުޑަ އައްޔައަށް ލިބުނީ 12.33ގެ ސްކޯއެކެވެ. ޝާމް ވަނީ ދެ ވަނަ ރާޅުގައި 1.67ގެ ސްކޯއަކާއި ތިން ވަނަ ރާޅުގައި 1.33ގެ ސްކޯއެއް ހޯދާފައެވެ. ޝާމްއަށް ޖުމުލަ ލިބުނީ 3.00ގެ ސްކޯއެކެވެ.

މާސްޓަރސްގެ ފައިނަލް ހީޓުގައި ވާދަކޮށް އިބްރާހީމް ޝިމާން ވަނީ 4.8ގެ ސްކޯއަކުން މުހައްމަދު ރިޟްވާންގެ މައްޗަށް ކުރިހޯދާފައެވެ. ޝިމާންގެ ފުރަތަމަ ރާޅުގައި އޭނާ ވަނީ 5.67ގެ ސްކޯއެއް ހޯދާފައެވެ. ތިންވަނަ ރާޅުގައި އޭނާއަށް ވަނީ 4.00ގެ ސްކޯއެއް ލިބިފައެވެ. ދެ ރާޅު އެއްކޮށް ޝިމާން ވަނީ 9.67ގެ ސްކޯއެއް ހޯދާފައެވެ. ފައިނަލް ހީޓުގައި ރިޟްވާންއަށް ލިބުނީ ޖުމުލަ 4.87ގެ ސްކޯއެކެވެ. އެއީ ފުރަތަމަ ރާޅުގައި ލިބުނު 3.00ގެ ސްކޯއާއި ހަތަރުވަނަ ރާޅުގައި ލިބުނު 1.87ގެ ސްކޯއެވެ.

ޖޫނިއަރ މެންސްގެ އެއްވަނަ އާމިން ހޯދީ ފައިނަލް ހީޓުގައި މުހައްމަދު ޖަރީޝް ޖިހާދު ބަލިކޮށްގެންނެވެ. ފައިނަލް ހީޓު އާމިން ކާމިޔާބު ކުރީ 11.53ގެ ސްކޯއަކުންނެވެ. އާމިން ވަނީ ޖުމުލަ 14.33ގެ ސްކޯއެއް ހޯދާފައެވެ. އެއީ އާމިންގެ ފުރަތަމަ ރާޅުގައި 6.00ގެ ސްކޯއަކާއި، ތިންވަނަ ރާޅުގައި 8.33ގެ ސްކޯއަކުންނެވެ. އާމިންއާ ވާދަކުރި ޖަރީޝަށް ލިބުނީ ޖުމުލަ 2.80ގެ ސްކޯއެވެ. އެއީ ފުރަތަމަ ރާޅުގައި 1.17ގެ ސްކޯއަކާއި، ދެ ވަނަ ރާޅުގައި 1.63 ސްކޯއެވެ.

ހުކުރު ދުވަހު އެންމެ ފަހުން ކުރިއަށް ދިޔައީ މެންސް އޯޕަން ބައިގެ ފައިނަލް ހީޓެވެ. މެންސް އޯޕަންގެ ފައިނަލްގައި ވާދަކޮށްފައިވަނީ ކުޑަ އައްޔައާއި އަޙުމަދު ނަޒްމީންއެވެ. ފައިނަލްގައި ނަޒްމީންގެ މައްޗަށް ކުޑަ އައްޔަ ކުރިހޯދީ 5.19ގެ ސްކޯއަކުންނެވެ. ދެ ރާޅުގެ އެކު ޖުމުލަ އައްޔަ ވަނީ 12.00ގެ ސްކޯއެއް ހޯދާފައެވެ. ނަޒްމީންއަށް ދެ ރާޅު އެކު ޖުމުލަ ލިބުނީ 6.81ގެ ސްކޯއެކެވެ.

ފައިނަލް ހީޓުތަކަށްފަހު ވަނީ، ބަނޑުފިލާ ޗެލެންޖުގެ އެކިއެކި ވަނަތައް ހޯދި ބޮޑީބޯޑަރުންނަށް އިނާމު ދީފައެވެ.