އިނގިރޭސި ލީގުކަޕްގެ ކުއާޓާ ފައިނަލްގައި މެންޗެސްޓަރ ޔުނައިޓެޑް ވާދަކުރަން ޖެހޭ ޓީމަކަށް ލީގު ވަންގެ ޗާލްޓަން އެތްލެޓިކް ވެއްޖެއެވެ. ޗާލްޓަން އެތްލެޓިކަކީ ލީގުކަޕްގައި މިހާރު ދެމިއޮތް ޕްރިމިއަރ ލީގުން ބޭރު ހަމައެކަނި ޓީމެވެ.

ޗާލްޓަން އެތްލެޓިކް ކުއާޓާ ފައިނަލަށް ދަތުރުކުރީ ހަތަރުވަނަ ބުރުގައި ބްރައިޓަންގެ މައްޗަށް ކުރިހޯދައިގެންނެވެ. ބްރައިޓަންގެ މައްޗަށް ޗާލްޓަން ކުރިހޯދީ ޕެނަލްޓީ ޖަހައިގެންނެވެ. އެއީ ލަނޑެއް ނުޖެހި މެޗު އެއްވަރުވުމުން ޖެހި ޕެނަލްޓީގައި 4-3 ން ކުރި ހޯދައިގެންނެވެ. މެންޗެސްޓަރ ޔުނައިޓެޑް ހަތަރުވަނަ ބުރުގައި ކުރި ހޯދީ ބާންލޭއާ ވާދަކޮށް 2-0 ނެވެ. މުބާރާތް އަށްފަހަރު ކާމިޔާބުކޮށްފައިވާ މެންޗެސްޓަރ ސިޓީ ކުއާޓާ ފައިނަލްގައި ވާދަކުރާނީ ސައުތްހެމްޓަންއާއެވެ. ނޮޓިންގހަމް ފޮރެސްޓް ވާދަކުރާނީ ވުލްވްސްއާއެވެ. އަދި ނިއުކާސަލް ޔުނައިޓެޑް ވާދަކުރާނީ ލެސްޓަރ ސިޓީއާއެވެ.

ކުއާޓާ ފައިނަލް މެޗުތައް ފަށާނީ އަންނަ ޖެނުއަރީ މަހުގެ 9 ވަނަ ދުވަހުއެވެ.