އިންތިޚާބުތަކާއި ގުޅިގެން މާލޭގައި އިސްތިހާރު ހިއްޕުމާއި ބެނާ ހަރުކުރުމުގެ ހުއްދައަށް އެދުމަށް ހުޅުވާލައިފި

އިންތިޚާބުތަކާއި ގުޅިގެން ކެމްޕެއިން ކުރުމަށް ތައްޔާރުކުރާ ޕޯސްޓަރުތަކާއި ބެނާތައް މާލޭގެ މަގުތަކާއި އާންމު ތަންތަނުގައި ބެހެއްޓުމައި ހިއްޕުމަށް އެދޭ ފަރާތްތަކުން މާލެ ސިޓީ ކައުންސިލުން އެކަމުގެ ހުއްދަ އަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

އެކަމާއި ގުޅިގެން މާލެ ސިޓީ ކައުންސިލުން ކޮށްފައިވާ އިއުލާނުގައި ބުނެފައިވަނީ ރާއްޖޭގައި ބާއްވާ ރިޔާސީ އިންތިޚާބުގައި ވާދަ ކުރާ ކެނޑިޑޭޓެއް އައްޔަން ކުރުމަށް ޕާޓީތަކުން ބާއްވާ އިންތިޚާބުތަކާއި އަދި ރިޔާސީ އިންތިޚާބަށް ވާދަކުރާ ކެންޑިޑޭޓުން ކެމްޕެއިން ކުރުމަށް ތައްޔާރުކުރާ ޕޯސްޓަރުތަކާއި ބެނާތައް މާލޭ ސިޓީގެ މަގުތަކާއި އާންމު ތަންތަނުގައި ބެހެއްޓުމާއި ހިއްޕުމަށް އެދޭ ފަރާތްތަކުން ހުއްދަ ހޯދުމަށް އެދި ހުށަހެޅުމުގެ ފުރުޞަތު ހުޅުވާލާކަމަށެވެ. މި އިޢުލާނުގައި ބުނެފައިވަނީ ހުއްދަ ނުނަގާ އެއްވެސް ކަހަލަ ކެމްޕޭނާ ގުޅޭ އިސްތިހާރެއް، މާލެ ސިޓީގެ މަގުތަކުގައި ނުވަތަ އެއްވެސް އާންމު ތަނެއްގައި ހިއްޕުމަކީ ނުވަތަ އެކަމާ ގުޅޭ ބެނާ ދެމުމަކީ މަނާކަމެއްކަމަށެވެ.

އަދި ހުއްދަނެތި އިސްތިހާރު ހިއްޕާ ނުވަތަ ބެނާ ދަމާ ފަރާތްތައް ޖޫރިމަނާކުރެވޭނެ ކަމަށްވެސް ބަޔާނުގައިވެއެވެ. އެގޮތުން ހުއްދަ ނެތި އިސްތިހާރު ނުވަތަ ބެނާ ހަރުކޮށްފިނަމަ އެފަދަ އިސްތިހާރެއް ނުވަތަ ބެނާއެއް ހިއްޕި ނުވަތަ ދެމި ފަރާތެއް ދުވާލަކަށް އެއް ހާސް ރުފިޔާގެ މަގުން ޖޫރިމަނާކުރެވޭނެކަމަށް ސިޓީ ކައުންސިލުން ބުނެއެވެ.

ހުއްދަނެތި ހިއްޕާ ކެމްޕޭނާ ގުޅުންހުރި އިސްތިހާރު ނުވަތަ ދަމާ ބެނާތައް ކައުންސިލްގެ ބެލުމުގެ ދަށުން ވަގުތުން ނަގާ ނައްތާލެވޭނެކަމަށާއި އަދި މިހެން ނައްތާލެވޭ އެއްވެސް އެއްޗަކަށް ކައުންސިލުން ޒިންމާނުވާނޭކަމަށްވެސް އިއުލާނުގައި ބުނެފައިވެއެވެ.

ސިޓީ ކައުންސިލުން މިގޮތަށް އިއުލާނު ނެރެފައިވާއިރު ވެރިކަން ކުރާ މައި ޕާޓީ އެމްޑީޕީން އަންނަނީ އަންނަ އަހަރު އޮންނަ ރިޔާސީ އިންތިޚާބަށް އެޕާޓީން ނެރޭނެ ކެންޑިޑޭޓަކު ކަނޑައެޅުމަށް އަންނަ މަހު ޕްރައިމަރީ ބޭއްވުމަށް ތައްޔާރުވަމުންނެވެ.