އާސަންދަ ކުންފުނީގެ 11 ވަނަ އަހަރީ ދުވަސް ފާހަގަކޮށްފި
22 ޑިސެމްބަރު 2022 | ބުރާސްފަތި 01:55މިޖަލްސާގައި ކުންފުންޏަށް ގިނަ ދުވަހު ޚިދުމަތްކުރައްވާފައިވާ މުވައްޒަފުންގެ އަގުވަޒަންކުރުންވެސް ވަނީ ކުރިއަށް ގެންގޮސްފައި
އާސަންދަ ކުންފުނީގެ 11 ވަނަ އަހަރީދުވަސް ފާހަގަކުރުން
އާސަންދަ ކުންފުނީގެ 11 ވަނަ އަހަރީ ދުވަސް ފާހަގަކޮށްފިއެވެ.
މި ދުވަހުގެ މުނަސަބަތުގައި ބޭއްވި ޖަލްސާ ޝަރަފްވެރިކޮށްދެއްވީ މިނިސްޓަރ އޮފް ފިނޭންސް އިބްރާހީމް އަމީރެވެ. މީގެ އިތުރުން މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އާއިޝަތު މުހައްމަދުދީދީ، އާސަންދަ ކުންފުނީގެ މެނޭޖިން ޑިރެކްޓަރު އިސްމާއީލް އައްޒާމް ވަޖީހު، އެންސްޕާގެ ސީއީއޯ މަރިޔަމް ޝަފީޤު، އާސަންދަ ކުންފުނީގެ ބޯޑުގެ ޗެއަރމަން ނިޔާޒު މުހައްމަދު، ބޯޑުގެ އެހެން މެންބަރުން، ކުންފުނީގެ އެގްޒެކެޓިވް އަދި ސީނިއަރ މެނޭޖްމެންޓް މެންބަރުން އަދި ކުންފުނީގެ މުވައްޒަފުން ވަނީ ބައިވެރިވެވަޑައިގަންނަވާފައެވެ.
ޖަލްސާގައި ވާހަކަދައްކަވަމުން ޝަރަފްވެރި މެހެމާނު މިނިސްޓަރު އަމީރާއި ޖެންޑަރ މިނިސްޓަރު އާއިޝަތު ވަނީ އާސަންދަ ކުންފުނީގެ މެނޭޖްމަންޓާއި މުވައްޒަފުން ދިވެހި ރައްޔިތުންނަށް އާސަންދަ ޚިދުމަތްތައް ދިނުމަށް ކުރަމުންދާ ބުރަ މަސައްކަތްތަކަށް ޝުކުރު އަދާކުރައްވާފައެވެ. އަދި ސްކީމްގެ ދަށުން ދެމުން އަންނަ ޚިދުމަތްތަކާ ގުޅިގެން ކުރެވޭ ޚަރަދުތައް ކޮންޓްރޯލްކޮށް އިސްރާފު ކުޑަކުރެވޭނެ ގޮތްތައް ހޯދުމުގެ މުހިއްމުކަން ދެބޭފުޅުންވެސް ވަނީ ފާހަގަކުރައްވާފައެވެ.
ޖަލްސާގައި ކުންފުނީގެ ބޯޑުގެ ޗެއަރމަން ނިޔާޒު އަދި ކުންފުނީގެ މެނޭޖިން ޑިރެކްޓަރު އައްޒާމް ދެއްކެވި ވާހަކަފުޅުގައިވަނީ ކުންފުނީގެ ކުރިމަގަށް ވިސްނާ މެނޭޖްމަންޓުން ރާވާފައިވާ ބައެއް ކަންކަމަށް އަލިއަޅުވާލައްވާފައެވެ. އެގޮތުން ކުންފުނީގެ އޮފީސްތައް ހިންގުމަށް އަމިއްލަ އިމާރާތެއް އެޅުމަށް ކަމާގުޅުންހުރި ފަރާތްތަކާއެކު މަސައްކަތް ކުރިއަށްދާކަން ވަނީ ހާމަކުރައްވާފައެވެ. އަދި ވަރަށް އަވަހަށް މި އިމާރާތް އެޅުމުގެ އަމަލީ މަސައްކަތާހަމަޔަށް ވާސިލުވެވޭނެކަމުގެ އުއްމީދުކުރައްވާކަމަށް ވަނީ ވިދާޅުވެފައެވެ.
ޖަލްސާގައި ވާހަކަދައްކަވަމުން ކުންފުނީގެ ޑެޕިއުޓީ މެނޭޖިން ޑިރެކްޓަރު އިބްރާހީމް ރަޝީދުވަނީ ކުންފުނީގެ މަސައްކަތްތަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ދެއްވާ އަހައްމިއްޔަތުކަން ފާހަގަކުރައްވާ ރައީސް ޞާލިޙަށް ޝުކުރު ދަންނަވާފައެވެ. އަދި ކުންފުނީގެ މަސައްކަތްތަކުގައި ސަރުކާރުގެ އެކި އެކި އިދާރާތަކުން ދެއްވާ އެހިތެރިކަމާ އެއްބާރުލުންވެސް ޑީއެމްޑީ ރަޝީދުވަނީ ފާހަގަކުރައްވާފައެވެ.
މިޖަލްސާގައި ކުންފުންޏަށް ގިނަ ދުވަހު ޚިދުމަތްކުރައްވާފައިވާ މުވައްޒަފުންގެ އަގުވަޒަންކުރުންވެސް ވަނީ ކުރިއަށް ގެންގޮސްފައެވެ. އެގޮތުން ދިގުމުއްދަތަށް ޚިދުމަތްކުރައްވާފައިވާ މުވައްޒަފުންނަށް ހަނދާނީ ލިޔުމާއި ޕްލާކް ހަވާލުކޮށްދެއްވީ މިނިސްޓަރު އަމީރާއި މިނިސްޓަރު އާއިޝަތެވެ.
