މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް، ރައީސް މުހައްމަދު ނަޝީދު، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ވޯޓު ނުދެއްވާނެހެން ހީފުޅުވާ މެމްބަރުންތަކެއް ޕާޓީން ވަކިކުރައްވާފައިވާ ކަމަށްބުނެ ތުހުމަތު ކުރައްވައިފިއެވެ.
ރައީސް ނަޝީދު ބުދަ ދުވަހު ކުރެއްވި ޓްވީޓެއްގައި ވިދާޅުވީ, އެމްޑީޕީ ގުޅިފައި އޮތީ މިނިވަން, އިންސާފުވެރި އިންތިޚާބުތަކާ ކަމަށާއި, މިކަމަށް އޮތް އަސާސަކީ ކުރިން އިއުލާނު ކުރެވިފައި އޮންނަ "ވޯޓު ލެވޭ މީހުންގެ ލިސްޓު" ކަމަށެވެ. ނަމަވެސް މިދިޔަ އަހަރު ރައީސް ސާލިހު އެމްޑީޕީން 39000 މެމްބަރުން ވަކިކުރައްވާފައި ވާކަމަށާއި ދަފުތަރު ސާފުކުރަން ޖެހުނު ނަމަވެސް އެމަނިކުފާނު އެކަން ކުރެއްވީ އެމަނިކުފާނަށް ވޯޓު ނުދެއްވާނެކަމަށް ބެލެވޭ މެމްބަރުން ވަކިކުރުމަށް ކަމަށް ވިދާޅުވެ ނަޝީދު ވަނީ ތުހުމަތު ކުރައްވާފައެވެ.
ރައީސް ނަޝީދު މިފަދައިން ވިދާޅުވެފައިވާއިރު، އެމްޑީޕީގެ ފަރާތުން ކުރިއަށް އޮތް ރިޔާސީ އިންތިޚާބުގައި ވާދަކުރާނެ ކެންޑިޑޭޓަކު ހޮވަން ބާއްވާ ޕްރައިމަރީގައި ވާދަކުރަން ބޭނުންވާ މެމްބަރުންނަށް އެ ފުރުސަތު ވަނީ ހުޅުވާލާފައެވެ. ނަމަވެސް އެމްޑީޕީގެ މެމްބަރުންގެ އަދަދު 92،000ން 54،000ށް ވަނީ މަދުކޮށްފައެވެ. މި ބަދަލަކީ އެ ޕާޓީން ބަލަހައްޓަމުން ދިޔަ ދަފްތަރުގެ ބަދަލުގައި އިލެކްޝަންސް ކޮމިޝަނުގެ ދަފްތަރު ބަލައިގަތުމަށް އެ ޕާޓީގެ ގައުމީ މަޖިލީހުން ނިންމުމާ ގުޅިގެން އައި ބަދަލެކެވެ.
މި ބަދަލާ ގުޅިގެން މީގެ ކުރިންވެސް ނަޝީދު ވަނީ ދަފްތަރު ގަޑުބަޑުކޮށްފައިވާ ކަމަށް ވިދާޅުވެފައެވެ. މި ވާހަކަތަކަށް ރައްދުދީ އެމްޑީޕީއިން ނެރުނު ބަޔާނެއްގައި ބުނީ މެމްބަރުންގެ ދަފްތަރު ސައްހަކަމާއެކު ބަލަހައްޓަމުން ދަނިކޮށް ރައީސް ނަޝީދު މިފަދައިން ވިދާޅުވުމުން ހިތާމަކުރާ ކަމަށެވެ.
ޕާޓީގެ އަސާސީ ގަވާއިދާއި ގާނޫނީ ނިޒާމުގެ ތެރޭގައި ސިޔާސީ ޕާޓީތަކުގެ ގާނޫނުގައި ބުނާ ހަމަތަކާއި އުސޫލްތަކާ އެއްގޮތަށް ޕާޓީ ހިންގުމާއި، މެމްބަރޝިޕް ކަންތައް ބެލެހެއްޓުމަކީ އެ ޕާޓީން އިސްކަންދޭ ކަމެއް ކަމަށް އެމްޑީޕީން ބުނެފައިވެއެވެ. އެހެންނަމަވެސް، ޕާޓީން ބަލަހައްޓަމުންދިޔަ ދަފްތަރު އޮތީ އެހެން ސިޔާސީ ޕާޓީތަކަށް ނިސްބަތްވާ މެމްބަރުންނާއި އެ ޕާޓީތަކުގެ މަގާމުތަކުގައި ތިބޭ ފަރާތްތަކުން އެމްޑީޕީގެ އެތެރޭގެ އިންތިޚާބުތަކުގައި ވާދަކުރުމަށާއި ވޯޓު ގަޑުބަޑުކޮށްލުމުގެ ފުރުސަތު ލިބިގެންދާ ގޮތަށް ކަމަށާއި، އެހެންކަމުން ޕާޓީގެ ދަފްތަރު ސައްހަކުރަން ގައުމީ މަޖިލީހުން ނިންމިކަން ވަނީ ފާހަގަކޮށްފައެވެ.
އަދި ދަފްތަރު ސައްހަކުރުމުގެ މަސައްކަތް ފަށާފައިވާކަމަށާއި، މިއަދާ ހަމައަށްވެސް އެ މެމްބަރުން އެ ޕާޓީގެ ދަފްތަރުގައި ރަޖިސްޓްރީވުމުގެ ފުރުސަތު އޮތީ ހުޅުވާލެވިފައި ކަމަށް އެމްޑީޕީން ބުނެފައިވެއެވެ.
އެމްޑީޕީގެ ރިޔާސީ ޕްރައިމަރީގައި ވޯޓުލުމުގެ ފުރުސަތު ލިބެން ޖެހޭނީ އެ ޕާޓީގެ ސައްހަ މެމްބަރުންނަށް ކަމަށްވާއިރު ގައުމީ މަޖިލީހުގެ ނިންމުމާ އެއްގޮތްވާ ގޮތުގެ މަތިން ދަފްތަރު މިހާރު އޮތީ ސައްހަ ކުރެވި ޕާޓީއަށް ވަންނަން އެދޭ އެންމެހާ ދިވެހި ރައްޔިތުންނަށް ފުރުސަތު ހުޅުވިފައި ކަމަށް އެމްޑީޕީން ބުނެފައިވެއެވެ.
އެމްޑީޕީން ވަނީ އެޕާޓީގެ އެއްވެސް މެންބަރަކަށް ނޭނގި އެހެން ޕާޓީއަކަށް ވައްދާފައިވާނަމަ، ފޯމް ފުރިހަމަކޮށް އިލެކްޝަންސް ކޮމިޝަނަށް ހުށަހެޅުމަށްވެސް އަންގާފައެވެ. މި ފޯމު ހުށަހެޅުމުން އެކަން ބަލައި އެމެންބަރަކު އެމްޑީޕީއަށް ރުޖޫއަކޮށްދޭނެ ކަމަށްވެސް އެމްޑީޕީން ވަނީ ބުނެފައެވެ.
