ފުރުމުގެ 3 ގަޑިއިރު ކުރިން ޗެކިންވާން އެދިއްޖެ
އޮޕަރޭޝަން ވީހާވެސް ފަސޭހައިން ކުރިއަށް ގެންދިއުމަށްޓަކައި ފުރާ ފަރާތްތަކުން، ޗެކިންވުމުގެ ކުރިން އިމުގާ ފޯމް ފުރިހަމަކުރިމަށް ވެސް ވަނީ އެދިފައި
ވެލާނާ އިންޓަރނޭޝަނަލް އެއާޕޯޓުގެ ޗެކިން ކުރިއަށް ދަނީ
ފުރުމުގެ 3 ގަޑިއިރު ކުރިން ޗެކިންވުމަށް ވެލާނާ އިންޓަރނޭޝަނަލް އެއަރޕޯޓް ހިންގާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން އެދިއްޖެއެވެ.
އެމްއޭސީއެލް އިން މިގޮތަށް އެދިފައިވަނީ މިއީ ފަތުރުވެރިކަމުގެ ޕީކް ސީޒަނަށްވެފައި އެއަރޕޯޓު ބާރުބޮޑުވާނެތީއެވެ. އެމްއޭސީއެލްއިން ކުރި ޓްވީޓެއްގައި ބުނެފައިވަނީ މިއީ ޗުއްޓީ ދުވަސްވަރަށް ވުމުން، ވެލާނާ އިންޓަރނޭޝަނަލް އެއަރޕޯޓުގައި ދިގު ކިއުތަކާއި ޑިލޭތައް މަދުކުރުމަށް ފުރާ ފަރާތްތަކުން ފުރުމުގެ 3 ގަޑި އިރު ކުރިން ޗެކިން ވުމަށް އެދޭ ކަމަށެވެ.
އަދި އޮޕަރޭޝަން ވީހާވެސް ފަސޭހައިން ކުރިއަށް ގެންދިއުމަށްޓަކައި ފުރާ ފަރާތްތަކުން، ޗެކިންވުމުގެ ކުރިން އިމުގާ ފޯމް ފުރިހަމަކުރިމަށް ވެސް ވަނީ އެދިފައެވެ.
ކޮންމެ އަހަރެއްގެ ވެސް ޑިސެމްބަރު މަހަކީ ރާއްޖެގެ ޕީކް ސީޒަންގެ އެންމެ ބާރުބޮޑު އެއް މަސް ކަމަށްވުމާއެކު، ދަތުރުކުރާ ފަރާތްތައް އަދި އަންނަ ފަރާތްތަކަށް ހިދުމަތް ދިނުމަށްޓަކައި ވެލާނާ އިންޓަރނޭޝަނަލް އެއަރޕޯޓާއި، ކަމާއި ބެހޭ ފަރާތްތަކާއެކު ފުރާ އަދި އަންނަ ފަރާތްތަކަށް ލުއިފަސޭހަކޮށްދިނުމަށް ހާއްސަ މަސައްކަތްތަކެއް ފަށައެވެ.
އެގޮތުގެ މަތިން މޯލްޑިވްސް އިމިގްރޭޝަނުންވަނީ ޑިޕާޗަރއަށް 7 ކައުންޓަރ އަދި އެރައިވަލްއަށް 11 ކައުންޓަރ އިތުރުކޮށްފައެވެ. އަދި އޮޕަރޭޝަން ވީހާވެސް ފަސޭހައިން ގެންދިއުމަށް އެއަރޕޯޓް އޮފިޝަލުންނާއި ކަމާ ގުޅުންހުރި އިދާރާތަކުގެ މުވައްޒަފުންގެ ހަރަކާތްތައް އިތުރުކޮށްފައިވެއެވެ.
ސަރުކާރުން ވަނީ ވެލާނާ އިންޓަރނޭޝަނަލް އެއަރޕޯޓުގެ އެއަރ ޓްރެފިކް ކުޑަކުރުމަށްޓަކައި މިދިޔަ އޮކްޓޯބަރު މަހު އައު ރަންވޭ ވެސް ރަސްމީކޮށް ހުޅުވާ ބޭނުންކުރަން ފަށާފައެވެ. އަދި އައު އޭޕްރަންއާއި ޓެކްސީވޭ އެއްކޮށް ނިންމާ ހިދުމަތްދޭން ވަނީ ފަށާފައެވެ.
