ރައީސް ނަޝީދު އެމްޑީޕީގެ ޕްރައިމަރީގައި ވާދަކުރައްވާނެކަން އިޢުލާންކުރައްވައިފި

ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު، މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ޕްރައިމަރީގައި ވާދަކުރައްވާނެކަން އިޢުލާންކުރައްވައިފިއެވެ.

އަންނަ އަހަރު ބާއްވާ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން ވާދަ ކުރާނެ ކެންޑިޑޭޓަކު ހޮވަން ބާއްވާ ޕްރައިމަރީގައި ބައިވެރިވާން ފުރުސަތު ހުޅުވާލީ އާދިއްތަ ދުވަހުއެވެ. ޕްރައިމަރީގައި ވާދަކުރަން ނިންމެވިކަން ރައީސް ނަޝީދު ހާމަކުރެއްވީ އެމަނިކުފާނު ކުރެއްވި ޓްވީޓެއްގައެވެ. ޓްވީޓްގައި ރައީސް ނަޝީދު ވިދާޅުވީ ޕާޓީގެ ހުރިހާ މެމްބަރުންގެ ވޯޓު އެމަނިކުފާނަށް ދެއްވުން ވަރަށް ބޮޑަށް އެދިވަޑައިގަންނަވާކަމަށެވެ.

މީގެ ކުރިން ރައީސް ނަޝީދު ވަނީ ވެރިކަމުގެ ނިޒާމް ބަދަލުކުރަން ވޯޓަށް ނާހާ ޕްރައިމަރީގެ ވާހަކަދައްކައިގެން ވާނެކަމަށް ގަބޫލުފުޅުނުކުރައްވާ ކަމަށް ވިދާޅުވެފައެވެ. އެގޮތުން މި ހިނގާ ޑިސެމްބަރު މަހުގެ ތެރޭގައި ބޭއްވި ރައްޔިތުންގެ މަޖިލީހުގެ "އާސްކް ސްޕީކަރ" ޕްރޮގްރާމްގައި ވާހަކަފުޅު ދައްކަވަމުން ރައީސް ނަޝީދު ވަނީ، ވެރިކަމުގެ ނިޒާމް ބަދަލުކުރުމަކީ އެމްޑީޕީން 2018 ވަނަ އަހަރު ވެފައިވާ ރިޔާސީ ވައުދެއް ކަމަށާއި އެ ވައުދު ފުއްދަންވާނެކަމަށް ވިދާޅުވެފައެވެ. އަދި ސަރުކާރު ކޯލިޝަންގެ އެހެން ޕާޓީތަކުންވެސް އޭރު ވެރިކަމުގެ ނިޒާމް ބަދަލުކުރަން ފެންނަ ނުފެންނަ ވޯޓެއް ނަގަން އެއްބަސްވެފައިވާ ކަމަށް ރައީސް ނަޝީދު ވިދާޅުވިއެވެ. އެހެންކަމުން ޕްރައިމަރީގެ ވާހަކަދައްކަންވާނީ އެ ވޯޓަށް ފަހުގައި ކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެސް ވަނީ ރިޔާސީ ދެވަނަ ދައުރަކަށް ވާދަކުރައްވަން ބޭނުންފުޅުވާ ކަމުގެ ޝައުގުވެރިކަން ފާޅުކުރައްވާފައެވެ.