އެމްޑީޕީގެ މަތި އުތުރު ދާއިރާގެ ރައީސްކަމަށް އަކްރަމް

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މަތި އުތުރު ދާއިރާގެ ރައީސްކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އިންތިޚާބުވެވަޑައިގަންނަވައިފިއެވެ.

މަތި އުތުރު ދާއިރާގެ ރައީސްގެ މަޤާމަށް ބޭފުޅަކު އައްޔަންކުރަން ހޮނިހިރު ދުވަހު ބޭއްވި އިންތިޚާބު ކާމިޔާބުކުރެއްވުމާއި ގުޅިގެން އަކްރަމް ކުރެއްވި ޓްވީޓެއްގައި ވިދާޅުވީ، އޭނާ އަށް އިތުބާރުކޮށް ވޯޓުދިން އެމްޑީޕީގެ މަތި އުތުރު ޕްރޮވިންސްގެ އެންމެހާ މެންބަރުންނަށް ޝުކުރުދަންނަވާ ކަމަށެވެ. އަދި މުސްތަގުބަލުގައި މަސައްކަތްކުރައްވާނީ މަތިއުތުރު ޕްރޮވިންސްގެ އެންމެހާ މެންބަރުންނާ ގާތުން ކަމަށް ވެސް އަކްރަމް ވިދާޅުވިއެވެ.

އެ މަގާމަށް އަކްރަމް އާއި ވާދަކުރައްވާފައި ވަނީ ހެލްތް މިނިސްޓްރީގެ ސްޓޭޓް މިނިސްޓަރު އަހްމަދު އާދިލް އާއި ހެރިޖޭޓް މިނިސްޓްރީގެ ސީނިއާ ޕޮލިސީ ޑިރެކްޓަރު އަހްމަދު ހާޝިމް (ޓިންޓިން)އެވެ. އަކްރަމް އިންތިހާބު ކާމިޔާބު ކުރައްވާފައި ވަނީ 71 އިންސައްތަ ވޯޓާއި އެކުގައެވެ. ވޯޓު ލިބުނު ގޮތުގެ ތަފްސީލަށް ބަލާއިރު މާލެއިން 391 ވޯޓު އަދި ރަށްތަކުގައި ބެހެއްޓި ވޯޓުފޮށިތަކުން 2597 ވޯޓު އަކްރަމް އަށް ލިބިވަޑައިގަތެވެ. އެއީ ޖުމުލަ 2،988 ވޯޓެވެ.

އަކްރަމާ އެންމެ ކައިރިން ވާދަ ކުރެއްވި އާދިލަށް ލިބިވަޑައިގަންނަވާފައި ވަނީ 20 ޕަސެންޓު ވޯޓެވެ. އެއީ 850 ވޯޓެވެ. އަދި ހާޝިމް (ޓިންޓިން)އަށް ލިބިވަޑައިގެންނެވީ 7 ޕަސެންޓް ވޯޓެވެ. އެއީ 291 ވޯޓެވެ.

އެމްޑީޕީގެ މަތި އުތުރު ދާއިރާގައި ހިމެނެނީ ހއ، ހދ. އަދި ށ އަތޮޅެވެ. މަތި އުތުރު ދާއިރާގެ އިންތިޚާބު ބާއްވާފައި ވަނީ ކުރިން އެ މަގާމުގައި ހުންނެވި އިބްރާހިމް ވަހީދު (އިބުރޭ) އެމްޑީޕީގެ ޑެޕިއުޓީ ޗެއާޕާސަންގެ މަގާމަށް އިންތިޚާބުވުމާއި ގުޅިގެންނެވެ.