ފޯމެޓަށް ގެނައި ބަދަލާއެކު ފީފާ ކުލަބް ވޯލްޑް ކަޕް 2025 ގައި ކުޅުމަށް ހަމަޖެހިފައިވާކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.

އައު ފޯމެޓާއެކު 2025 ވަނަ އަހަރު ބާއްވާ މުބާރާތުގައި 32 ޓީމު ވާދަކުރާނެ ކަމަށް ވެސް އިންފަންޓީނޯ ވިދާޅުވިއެވެ. އިންފަންޓީނޯ ވިދާޅުވީ ކުރިން ނިންމީ 24 ޓީމާއެކު ކުލަބް ވޯލްޑް ކަޕް 2021 ވަނަ އަހަރު ބާއްވަން ކަމަށާއި، ނަމަވެސް ކޯވިޑް-19 ގެ ބަލިމަޑުކަމުގެ ސަބަބުން މުބާރާތް ފަސްކުރަން ޖެހުނީ ކަމަށެވެ. އޭނާ ވިދާޅުވީ 32 ޓީމާއެކު އޮންނަ މުބާރާތުގައި ވާދަކުރާނީ ދުނިޔޭގެ އެންމެ މޮޅެތި ޓީމުތައް ކަމަށެވެ. އިންފަންޓީނޯ ވިދާޅުވީ އައު ފޯމެޓާއެކު ބާއްވާ ކުލަބް ވޯލްޑް ކަޕް، ހަ ޤައުމަކަށް ބާއްވާ ވޯލްޑް ކަޕާ އެއްވަރަށް ފޯރި ގަދަވާނެ ކަމަށެވެ.

މިހާރު މުބާރާތް ކުޅޭ ފޯމެޓު ބަދަލުކޮށް، އައު ފޯމެޓުގެ ދަށުން ބައްރުތަކަށް ފުރުސަތު ދޭނެ ވަކި ގޮތެއް އިންފަންޓީނޯ ހާމަކުރައްވާފައެއް ނުވެއެވެ. އިންފަންޓީނޯ ވިދާޅުވީ އެކަމުގެ މަޝްވަރާތައް ކުރެވެމުންދާ ކަމަށާއި، ފީފާ އިން ގޮތެއް ނިންމާނީ ފުޓުބޯޅަ އަށް ގެއްލުމެއް ނުލިބޭނެހެން ކަމަށެވެ.

މިހާރު އޮތް ފޯމެޓަށް ކުޅޭ ކުލަބް ވޯލްޑް ކަޕް ކުރިއަށް ދާނީ އަންނަ އަހަރުގެ ފެބްރުވަރީ މަހުގެ އެއް ވަނަ ދުވަހުން 11 ވަނަ ދުވަހުގެ ނިޔަލަށް މޮރޮކޯ ގައެވެ. މޮރޮކޯ ގައި މުބާރާތް ބާއްވަން ނިންމީ ހުކުރު ދުވަހު ކުރިއަށް ދިޔަ ފީފާ ކައުންސިލް ބައްދަލުވުމުގައެވެ.

މީގެ އިތުރުން އިންފަންޓީނޯ ވިދާޅުވީ 2030 ވަނަ އަހަރުގެ ފީފާ ވޯލްޑް ކަޕް ފުޓުބޯޅަ މުބާރާތާއި، 2027 ވަނަ އަހަރުގެ އަންހެން ވޯލްޑް ކަޕް މުބާރާތް ބާއްވާގެ ޤައުމު އިއުލާން ކުރާނީ 2024 ވަނަ އަހަރު ކަމަށެވެ. މީގެ އިތުރުން 2031 ވަނަ އަހަރުގެ އަންހެން ވޯލްޑް ކަޕް މުބާރާތް ބާއްވާނެ ޤައުމު އިއުލާން ކުރާނީ 2025 ވަނަ އަހަރު ކަމަށް ވިދާޅުވިއެވެ.