ފީފާ ވޯލްޑް ކަޕްގެ ކުއާޓާ ފައިނަލުގައި ޕޯޗުގަލް ބަލިކޮށް މޮރޯކޯއިން ފުރަތަމަ ފަހަރަށް މުބާރާތުގެ ސެމީ ފައިނަލަށް ދަތުރުކޮށްފިއެވެ.
އަލް ތުމާމާ ސްޓޭޑިއަމްގައި ހޮނިހިރު ދުވަހުގެރޭ ކުޅުނު މި މެޗު މޮރޯކޯއިން ކާމިޔާބުކުރީ 1-0ންނެވެ. މޮރޯކޯގެ ހަމައެކަނި ލަނޑު ޖެހީ ފުރަތަމަ ހާފުގައެވެ. ފުރަތަމަ ހާފުގެ 42 ވަނަ މިނެޓުގައި މޮރޯކޯއަށް ލީޑު ނަގައިދިނީ ޔޫސުފް އެން-ނެސީރީއެވެ. މިއީ ޔަހްޔާ އަތިއްޔަތުﷲ ނަގައިދިން ހުރަހެއް ބޮލުން ޖަހާ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކުރި ލަނޑެކެވެ.
ފުރަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން ލަނޑު ޖެހުމަށް މަސައްކަތްކުރީ ޕޯޗުގަލް ޓީމުންނެވެ. ނަމަވެސް ބްރޫނޯ ފެނާންޑޭސް ފޮނުވާލި ބާރު ހަމަލާ އަމާޒުވީ މޮރޯކޯ ގޯލުގެ ހުރަސް ދަނޑިއަށެވެ. އޭގެ ފަހުން ޔާއޯ ފިލިކްސް ފޮނުވާލި ބޯޅަ ދިފާއުކުރީ މޮރޯކޯގެ ކީޕަރު ބޯނޯއެވެ. ލަނޑު ޖެހުމުގެ އިތުރުންވެސް މޮރޯކޯއަށް ފުރަތަމަ ހާފުގައި ރަނގަޅު ފުރުސަތެއް ލިބުނެވެ. ނަމަވެސް އަތިއަތުﷲ ފޮނުވާލި ބޯޅަ ދިޔައީ ގޯލާއި އަމާޒުނުވެ ބޭރަށެވެ.
ދެވަނަ ހާފުގައި ޕޯޗުގަލްއިން ވަނީ ނަތީޖާ ހަމަހަމަ ކުރުމަށް ވަރަށް ބޮޑަށް މަސައްކަތް ކޮށްފައެވެ. އެގޮތުން ޓީމުގެ ތަރި ކްރިސްޓިއާނޯ ރޮނާލްޑޯވެސް ދެވަނަ ހާފުގައި ކުޅެން އެރުވިއެވެ. ނަމަވެސް ރޮނާލްޑޯ ފޮނުވާލި ހަމަލާތަކުގެ ހުރަހަކަށްވީ މޮރޯކޯގެ ކީޕަރު ބޯނޯއެވެ. އޭގެ ފަހުން ބްރޫނޯ ފެނާންޑޭޒް ފޮނުވާލި ބާރު ހަމަލާވެސް ދިފާއުކުރީ ބޯނޯއެވެ.
މިއާއެކު މޮރޯކޯ ވެފައިވަނީ އެފްރިކާ ބައްރުގެ އަދި އަރަބި އިސްލާމީ ގައުމެއް މުބުާރާތުގެ ސެމީ ފައިނަލަށް ދަތުރުކުރި ފުރަތަމަ ގައުމަށެވެ. ސެމީ ފައިނަލުގައި މޮރޯކޯ ވާދަކުރަން ޖެހޭނީ މިރޭ ދަންވަރު 12 ޖަހާއިރު ފްރާންސާއި އިންގްލެންޑް ބައްދަލުކުރާ ކުއާޓާ ފައިނަލުން މޮޅުވާ ޓީމަކާއެވެ.
