އިނގިރޭސިވިލާތުގެ މީހަކު ރާއްޖޭގައި އިސްލާމްވެއްޖެއެވެ.

އެކަމާ ގުޅޭގޮތުން ރާއްޖެއެމްވީން ސުވާލުކުރުމުން އިސްލާމިކް މިނިސްޓްރީގެ އޮފިޝަލަކު ވިދާޅުވީ، އޭނާ މުސްލިމަކަށްވުމަށް މިނިސްޓްރީގައި އަމިއްލައަށް އެދުމުން، އޭނާއަށް ދީނުގެ އަސާސީ ކަންކަން އެނގޭ މިންވަރު މިނިސްޓްރީން ބަލާފައިވާނެ ކަމަށެވެ.

އޭގެ އިތުރުން، ނަމާދު ކުރަން އެނގޭތޯ ބެލުމާއި، ދީނުގައި ޙަރާމް ޙަލާލު ކަންކަމުގެ އިތުރުން، ދީނުގެ އަދަބުތައް އެނގޭ މިންވަރާއި، އެކަންކަން ބެލުމަށްފަހު، ހަދަންޖެހޭ އެސެސްމަންޓުތައް މިނިސްޓްރީން ހަދާފައިވާކަމަށެވެ.

އަދި މިނިސްޓްރީން ކަނޑައަޅާފައިވާ އުސޫލުގެ ތެރެއިން ޝަހާދަތް ކިޔައިދީ، ހޯމަ ދުވަހު ދެ ހެކިންގެ ހާޒިރުގައި އެކަމާ ގުޅޭ ކަންކަން ކުރިއަށް ގެންގޮސްފައިވާކަމަށް އޭނާ ވިދާޅުވިއެވެ. އެއާއެކު، އޭނާގެ ނަންވެސް ވަނީ މުސްލިމް ނަމަކަށް ބަދަލުކޮށް ސެޓްފިކެޓު ޙަވާލުކޮށްފައެވެ.

އުމުރުން 25 އަހަރުގެ އެ ޒުވާނާއަަށް ކުރިން ކިޔަނީ ރޮބަޓް ކެލެބް ސްޓްރޭންޖެވެ. މުސްލިމުވުމަށްފަހު އޭނާގެ ނަން ވަނީ އުމަރަށް ބަދަލުކޮށްފައެވެ.

މިނިސްޓްރީގެ އޮފިޝަލު ރާއްޖެއެމްވީއަށް ވިދާޅުވީ، އެގޮތަށް ވަރަށް ގިނަ މީހުން އިސްލާމްވާން ބޭނުންވެގެން އަންނަ ކަމަށެވެ. އެގޮތުގެ މަތިން މިނިސްޓްރީން ބަލަންޖެހޭ ކަންކަން ބަލައި، މަހެއްގެ މައްޗަށް ދެތިން މީހުން އިސްލާމުވާކަމަށް އޭނާ ވިދާޅުވިއެވެ.

މިނިސްޓްރީން މައުލޫމާތު ދޭ ގޮތުގައި ގިނަ މީހުން އިސްލާމް ދީނަށް ވަންނަނީ އެމީހުން އަމިއްލައަށް އެދިގެން އެކަމަށް ބޭނުންވެގެންނެވެ.