ފަތުރުވެރިކަން މިއަހަރު ރަނގަޅުވެފައިވީނަމަވެސް މިއަހަރަކީ ޖުމްލަ ގޮތެއްގައި ފަތުރުވެރިކަމަށް ގިނަ ގޮންޖެހުންތަކެއް ހުރި އަހަރެއްކަމަށް ޓޫރިޒަމް މިނިސްޓަރު ޑރ އަބްދުﷲ މައުސޫމް ވިދާޅުވެއްޖެއެވެ.
މިއަހަރު ނިމުމުގެ ކުރިން 1.6 މިލިއަން ފަތުރުވެރިން ގެނައުމަށް ސަރުކާރުން ކަނޑައަޅާފައިވާ އަމާޒަށް ވާސިލުވުމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފަތުރުވެރިކަމާއި ބެހޭ ވަޒީރު ވިދާޅުވީ ޑިސެމްބަރު މަހުގެ 3 ވަނަ ހަފުތާ ތެރޭގައި މިއަހަރަށް ކަނޑައަޅާފައިވާ އަމާޒަށް ވާސިލުވާނެކަމަށް ބެލެވޭކަމަށެވެ. ވޯލްޑް ކަޕް ނިމުމަށްފަހު ގިނަ އަދަދެއްގެ ފަތުރުވެރިން ރާއްޖެ އަންނާނެކަމަށް ބެލެވޭކަމަށާއި ރަނގަޅު އަދަދަކުން މިއަހަރު ނިންމާލެވޭނެކަމަށް ބެލެވޭކަމަށް މިނިސްޓަރު ވިދާޅުވިއެވެ.
ކޮވިޑް-19ގެ ކުރިން އޮތް ޗައިނާ އާއި ޖަޕާނުގެ މާކެޓް އެއްގޮތަކަށްވެސް ނެތި ރަނގަޅު އަދަދުތަކުން ފަތުރުވެރިން ރާއްޖެ އަންނަމުންދާކަމަށް މިނިސްޓަރު ވިދާޅުވިއެވެ. އެހެންނަމަވެސް މިހާރު ބޮޑަށް ގުނަން ބޭނުންވަނީ ފަތުރުވެރިން އަންނަ އަދަދަށްވުރެ ބޮޑަށް ފަތުރުވެރިން ރާއްޖޭގައި ހޭދަކުރާ މުއްދަތު ނުވަތަ ބެޑް ނައިޓްސްކަމަށް މިނިސްޓަރު ވިދާޅުވިއެވެ.
2021 ވަނަ އަހަރުގެ ނޮވެމްބަރު މަހާއި އަޅާކިޔާއިރު 2022 ވަނަ އަހަރުގެ ނޮވެމްބަރު މަހު ބެޑް ނައިޓްސް އިތުރުވެފައިވަނީ 2 އިންސައްތަކަމަށް މިނިސްޓަރު ވިދާޅުވިއެވެ.
ނަމަވެސް 2 އިންސައްތައަށްވުރެ ގިނައިން އެނދު އިތުރުވެއްޖެ. އޭގެ ޒާތުގައި ހޮޓާ، ރިސޯޓް ބަލާއިރު ގެސްޓް ހައުސް ސަފާރީތަކުގެ އެތަންތަނުގެ އޮކިޔުޕަންސީ ދަށްވުމުގެ ފުރުސަތު އެބައޮތް. އެހެންނަމަވެސް ބައެއް ތަންތަނުގެ މާކެޓް ޕްލޭން، މާކެޓިންގ ސްޓްރެޓެޖީ ރަނގަޅުވެފައި ގެންދާގޮތުންނާއި ތަނެއްގެ މަޝްހޫރުކަން ހުރި ގޮތުން ބައެއް ތަންތަން ފުލްކޮށްވެސް އެބަދޭ.ޑރ އަބްދުﷲ މައުސޫމް/ ޓޫރިޒަމް މިނިސްޓަރު
މިނިސްޓަރު ވިދާޅުވީ މިއަހަރު އެންމެ ބޮޑު ގޮންޖެހުމަކަށް ދިމާވެފައިވަނީ ފްލައިޓްތަކުގެ އަގު ބޮޑުވުންކަމަށެވެ. ފްލައިޓްތަކުގެ ތާށިކަން ވަރަށް ބޮޑަށް މިއަހަރު ކުރިމަތިވެފައިވާކަމަށް މިނިސްޓަރު ވިދާޅުވިއެވެ.
އެކަމަށް ހައްލު ގެނައުމަށް ޓުއަރިޒަމް މިނިސްޓްރީން ތަފާތު އެއާލައިންތައް ރާއްޖެ ގެނައުމަށް މަސައްކަތްކުރަމުންދާކަމަށް މިނިސްޓަރު ވިދާޅުވިއެވެ.
އަގުތައް ބަރަށް ބޮޑުވެއްޖެ. 2020، 2021 ގެ އަގުތަކާއި ބަލާއިރު 2022ގެ ޓިކެޓްގެ އަގުތައް ބިޒްނަސް ކްލާހުގައި އެބައުޅޭ 4000 ޑޮލަރު އަގުބޮޑުކޮށް. ޔޫރަޕުން މިހިސާބަށް އަންނަން. އިކޮނޮމީ ކްލާހުގައި އެބައުޅޭ 400، 500 ޑޮލަރު އަގުބޮޑުކޮށް،. ފެމިލީ އެއް ދަތުރުކުރާއިރު އެއީ ވަރަށް ބޮޑު އަދަދެއް.ޑރ އަބްދުﷲ މައުސޫމް/ ޓޫރިޒަމް މިނިސްޓަރު
މިނިސްޓަރު ވިދާޅުވީ ރާއްޖެ އަންނަ ފަތުރުވެރިން އިތުރުވުމުގައި އެންމެ ބޮޑު ހިއްސާއެއް އޮތީ ޕްރައިވެޓް ސެކްޓަރުން ކުރަމުން އަންނަ ބުރަ މަސައްކަތްކަމަށެވެ. ފަތުރުވެރިކަމަށް ދިމާވި ގިނަ ގޮންޖެހުންތަކާއެކުވެސް ޕްރައިވެޓް ސެކްޓަރުގެ ބުރަ މަސައްކަތުން ކަނޑައަޅާފައިވާ އަމާޒުތަކަށް ވާސިލުވާކަމަށް މިނިސްޓަރު ވިދާޅުވިއެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާ ގޮތުން މިމަހުގެ ހަވަނަ ދުވަހުގެ ނިޔަލަށް ރާއްޖެއަށް ވަނީ 1،524،265 ފަތުރުވެރިން ޒިޔާރަތްކޮށްފައެވެ. އެއީ އެންމެ ގޯސް ހާލަތުގައި މިއަހަރު ރާއްޖެ ޒިޔާރަތްކުރާނެ ކަމަށް ބަޖެޓުގައި އަންދާޒާކޮށްފައިވާ 1،520،060 ފަތުރުވެރިންނަށްވުރެ އިތުރު އަދަދެކެވެ.
