ރައްޔިތުންގެ މަޖިލީހުގެ ނިމިދިޔަ ދައުރުގެ މަސައްކަތްތަކާ މެދު ހިތްހަމަޖެހިވަޑައިގެން ހުންނެވި ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ރައްޔިތުންގެ މަޖިލީހުގެ މަސައްކަތްތަކާ މެދު ސުވާލުކުރުމަށް އާއްމުންނަށް ފުރުސަތު ލިބޭ ގޮތަށް ކުރިއަށް ގެންދާ "އާސްކް ސްޕީކަރ"ގެ ހަ ވަނަ އެޕިސޯޑުގައި މަޖިލީހުގެ މަސައްކަތްތަކާ މެދު ވާހަކަފުޅުދައްކަވަމުންނެވެ. ރައީސް ނަޝީދު ވިދާޅުވީ ނިމިދިޔަ ދައުރުގައި މުހިންމު މަސައްކަތްތަކެއް މަޖިލީހުން ކޮށްފައިވާ ކަމަށެވެ. އެގޮތުން އެކަށީގެންވާ އަދަދެއްގެ ބިލުތަކުގެ މަސައްކަތް ކުރެވިފައިވާ ކަމަށް އެމަނިކުފާނު ވިދާޅުވިއެވެ. އަދި ރައީސް ނަޝީދު ވަނީ މަޖިލީހުގެ މަސައްކަތްތަކަށް ޝައުގުވެރިކަން ބެހެއްޓުމަށް މެންބަރުންނަށް އިލްތިމާސްކުރައްވާފައެވެ.

މަޖިލީހުގެ މި ދައުރުގެ މަސައްކަތް ނިންމާ ޗުއްޓީ އަށް ގޮސްފައި ވަނީ މި ނިމިދިޔަ ހަފްތާގެ ތެރޭގައެވެ. މަޖިލީހުން ވަނީ މި ދައުރުގައި 54.7 އިންސައްތަ މަސައްކަތް ނިންމާފައެވެ. މި ދައުރުގެ ފަހު ޖަލްސާ ހޯމަ ދުވަހު ބާއްވާފައިވާއިރު އެ ޖަލްސާގައި 2023 ވަނަ އަހަރުގެ ބަޖެޓާއި މި އަހަރުގެ ސަޕްލިމެންޓްރީ ބަޖެޓު ފާސްކުރުން އޮތެވެ.

މި ދައުރުގެ މަސައްކަތްތަކަށް ބަލާއިރު، 43 ޖަލްސާ ބާއްވާފައިވެއެވެ. ކުރީ ދައުރުން ލިބުނު 29 ބިލާއި މި ދައުރުގައި ހުށަހެޅި 13 ބިލުގެ މަސައްކަތް މަޖިލީހުގައި ކޮށްފައިވެއެވެ. އަދި 25 ބިލެއްގެ މަސައްކަތް ނިންމާފައިވާއިރު 17 ބިލުގެ މަސައްކަތް ނުނިމި އެބަ އޮތެވެ. މަޖިލީހުގައި ކުރި މަސައްކަތްތަކުގެ ތެރެއިން ގަރާރުތަކުގެ ތަފްސީލަށް ބަލާއިރު މިދިޔަ ދައުރުގައި ހުށަހެޅި 13 ހިމެނޭހެން ޖުމުލަ 17 ގަރާރުގެ މަސައްކަތްކޮށްފައިވެއެވެ. އޭގެ ތެރެއިން 11 ގަރާރުގެ މަސައްކަތް އަދި ނުނިމެއެވެ. ސަރުކާރުން ހުށަހެޅި މައްސަލަތަކުގެ ތަކުގެ ތަފްސީލްތަކަށް ބަލާއިރު ކުރީ ދައުރުގައި 3 މައްސަލަ، މި ދައުރުގައި 8 މައްސަލަ ހުށަހަޅާފައިވެއެވެ. އޭގެ ތެރެއިން 10 މައްސަލަ ވަނީ ނިމިފައެވެ. މަޖިލީހުގައި ރިޔާސަތުން ހުށަހެޅި ޖުމުލަ 6 މައްސަލައިގެ ތެރެއިން ނުނިމި ދެ މައްސަލަ އެއް އެބަ އޮތެވެ. ކުއްލި މައްސަލަ އަށް ބަލާ އިރު މި ދައުރުގައި 9 މައްސަލަ ވަނީ ނިންމާފައެވެ. މެންބަރުން ހުށަހެޅި ޖުމުލަ 8 މައްސަލައިގެ ތެރެއިން ނުނިމި 5 މައްސަލަ އެބަހުއްޓެވެ. އެހެނިހެން މައްސަލަތަކާއި ގުޅޭ ޖުމުލަ 10 މައްސަލައިގެ ތެރެއިން ނުނިމޭ 5 މައްސަލަ އެބައޮތެވެ. މަޖިލީހަށް ހުށަހެޅި ސުވާލުގެ ތަފްސީލަށް ބަލާއިރު ކުރީ ދައުރުގައި ލިބުނު 15 ސުވާލާއި މި ދައުރުގައި ހުށަހެޅި 74 ސުވާލާ އެކު ޖުމުލަ 89 ސުވާލު ވަނީ ހުށަހަޅާފައެވެ. އޭގެ ތެރެއިން ކުރިއަށް ނުގެންދާ 46 ސުވާލުގެ މަސައްކަތް އެބައޮތެވެ.