ސްޕެއިން އަތުން ލިބުނު ނަތީޖާގެ ހިތި ފިލުވާލަން ކުޅުންތެރިން ތިބީ ތައްޔާރަށް: މޮރިޔާސޫ

ދެ އަހަރު ކުރިން އޮލިމްޕިކް ފުޓުބޯޅަ މުބާރާތުގެ ސެމީ ފައިނަލްގައި ސްޕެއިން އަތުން ލިބުނު ނަތީޖާގެ ހިތި ފިލުވާލަން ޖަޕާން ކުޅުންތެރިން ތިބީ ތައްޔާރަށް ކަމަށް އެ ޓީމުގެ ކޯޗު ހާޖިމީ މޮރިޔާސޫ ބުނެފިއެވެ.

އޭނާ މިހެން ބުނީ ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި ސްޕެއިންނާ ދެކޮޅަށް ބުރާސްފަތި ދުވަހުގެ ރޭ ކުޅޭ މެޗުގެ ކުރިން އޮތް ޕްރެސްގައި ވާހަކަ ދައްކަމުންނެވެ. ސްޕެއިންއާ ދެކޮޅަށް ކުޅޭ މެޗު އެއްވަރުކޮށްލައިގެން ވެސް ޖަޕާނަށް ދެ ވަނަ ބުރަށް ދިޔުމުގެ ފުރުސަތު އޮންނާނެއެވެ. ނަމަވެސް އެކަން ބިނާވާނީ އެއް ވަގުތެއްގައި ޖަރުމަނާއި ކޮސްޓަރިކާ ބައްދަލު ކުރާ މެޗުގެ ނަތީޖާ އަކަށެވެ.

ޕްރެސްގައި ވާހަކަ ދައްކަމުން މޮރިޔާސޫ ބުނީ ޖަޕާނުން މެޗަށް ނުކުންނާނީ މޮޅުވުމުގެ އަޒުމުގައި ކަމަށެވެ. އޭނާ ބުނީ އޮލިމްޕިކް މުބާރާތުން ލިބުނު ނަތީޖާގެ ސަބަބުން ކުޅުންތެރިންނަށް ވަރަށް ބޮޑު ހިތްވަރެއް ލިބުނު ކަމަށެވެ. އޭނާ ބުނީ މިހާރު ޖަޕާން އޮތް ހިސާބަށް ބަލާނަމަ، އޭރަށްވުރެ ހުރިހާ ގޮތަކުން ޓީމު ރަނގަޅު ކަމަށެވެ. އޭނާ ބުނީ އެކަންކަމާއެކު ސްޕެއިން މެޗަށް ނުކުންނާނީ ޖަޕާނަށް ހިނިތުންވުމެއް ލިބޭނެ ނަތީޖާ އަށް މަސައްކަތް ކުރުމަށެވެ.

މީގެ އިތުރުން އޭނާ ބުނީ ސްޕެއިންގެ މެޗު ވެގެންދާނީ ވަރަށް އުނދަގޫ މެޗަކަށް ކަމަށެވެ. ކުޅުންތެރިންނަށް މެޗުގައި ޕްރެޝަރު ބޮޑުވާނެކަން ފާހަގަ ކުރަމުން މޮރިޔާސޫ ބުނީ، އޭނާ އުއްމީދު ކުރަނީ ކުޅުންތެރިން އެމީހުންގެ އަމިއްލަ ނަފްސަށް އިތުބާރުކޮށް، މެޗައިގެން ކުރިއަށްދާނެ ކަމަށެވެ. އޭނާ ބުނީ މުޅި ދުނިޔެއަށް ވެސް މަޝްހޫރުވެފައި އޮންނަނީ ޔޫރަޕުގެ ފުޓުބޯޅަ ކަމަށާއި، ޓެކްޓިކަލީ އަދި ޕިޒިކަލީ ވެސް އެކަން ވަނީ އެގޮތަށް ކަމަށެވެ.

އިތުރަށް މޮރިޔާސޫ ބުނީ ޖަޕާނާއި ބޮޑެތި ޓީމުތަކާ ކުޅޭއިރު، ޖަޕާނުން މަސައްކަތް ކުރަން ޖެހޭނީ ފަރަގު ނައްތާލަން ކަަމަށެވެ. އޭނާ ބުނީ މިއަހަރުގެ ވޯލްޑް ކަޕުން ދަސްވި ކަންކަމާއެކު، އެކަން ހާސިލު ކުރެވޭނެކަމަށް ވެސް އުއްމީދު ކުރާ ކަމަށެވެ.

ޖަޕާނާއި ސްޕެއިން ވާދަ ކުރާ މެޗު ފަށާނީ ބުރާސްފަތި ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.