ދެ ވަނަ ބުރަށް ދިޔުމަށް ކޮސްޓަރިކާ އިން 90 މިނެޓު މަސައްކަތް ކުރާނެ

ފީފާ ވޯލްޑް ކަޕްގެ ދެ ވަނަ ބުރުން ޖާގަ ހޯދުމަށް ކޮސްޓަރިކާއިން ކުރިއަށް އޮތް މެޗުގެ 90 މިނެޓު ހަމަވަންދެން މަސައްކަތް ކުރާނެ ކަމަށް އެ ޓީމުގެ ކޯޗު ލުއިސް ފެނާންޑޯ ސުއަރޭޒް ބުނެފިއެވެ.

ފެނާންޑޯ ސުއަރޭޒް މިހެން ބުނީ މުބާރާތުގެ ގްރޫޕް ސްޓޭޖުގެ ފަހު މެޗުގައި ޖަރުމަނާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އޭނާ ބުނީ، ފަހު މެޗުގައި ނުކުންނަން ޖެހެނީ ހަތަރު އަހަރުގެ ޗެމްޕިއަން ޖަރުމަނާ ދެކޮޅަށް ކަމަށާއި، އެ މެޗުގެ އުނދަގޫކަން ވަރަށް ބޮޑަށް އެނގި ތިބި ކަމަށެވެ. އަދި ޖަރުމަނުން ވެސް ކުރިއަށް އޮތް ބުރަށް ކޮލިފައިވާން ބޭނުންވާނެ ކަމަށާއި، ކޮސްޓަރިކާ އިން ވެސް ބޭނުންވަނީ އެ ގޮތް ކަމަށެވެ. އޭނާ ބުނީ ކޮސްޓަރިކާ އަށް އޮތް ފުރުސަތުތަކަށް ވެސް ލޯ ހުޅުވައިގެން ތިބި ކަމަށެވެ.

މީގެ އިތުރުން އޭނާ ބުނީ ކޮސްޓަރިކާ އޮތީ މެޗަކުން ބަލިވެފައި ކަމަށާއި، އެއް މެޗުން މޮޅުވި ކަމަށެވެ. އެކަމާއި ގުޅިގެން ކޮސްޓަރިކާގެ ސްކޮޑުގައި އޮތީ ތަފާތު އިހުސާސްތަކެއް ކަމަށާއި، މިއަދާ ހަމައަށް ވެސް އެކަން އޮތީ އެގޮތުގައި ކަމަށެވެ. ފެނާންޑޯ ސުއަރޭޒް ބުނީ މެޗުން މޮޅުވުމަށް މުހިންމު ކަންތައްތަކެއް ކުރަން ޖެހޭނެ ކަމަށާއި، ކުރިއަށް އޮތް ބުރަށް ދާން ބޭނުންވާއިރު، މެޗުގެ 90 މިނެޓު އެކަަމަށް އެދިގެން މަސައްކަތް ކުރާނެ ކަމަށެވެ.

ޕްރެސްގައި އިތުރަށް އޭނާ ބުނީ ޓީމު އޮތީ ރަނގަޅު ފަރިތަކުރުންތަކަކަށްފަހު މެޗަށް ތައްޔާރަށް ކަމަށާއި، މެޗުން ނަތީޖާ ނެރުމަކީ ބޭނުންވާ ގޮތް ކަމަށެވެ.

މުބާރާތުގެ ގްރޫޕް ސްޓޭޖުގެ ފަހު މެޗުގައި ކޮސްޓަރިކާ އިން ޖަރުމަނާ ދެކޮޅަށް ނުކުންނާނީ ބުރާސްފަތި ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.