ޔޫއެންއެސްކެޕްގެ މިނިސްޓީރިއަލް ކޮމިޓީ އޮން އެންވައިރަމަންޓް އެންޑް ޑިވަލޮޕްމަންޓުގެ 7 ވަނަ ޖަލްސާގައި ރާއްޖެ ތަމްސީލުކޮށްފި
30 ނޮވެމްބަރު 2022 | ބުދަ 09:5629 ނޮވެމްބަރުގައި އޮތް ސީނިއަރ އޮފިޝަލުންގެ ސެގްމަންޓުގެ ރިޔާސަތު ބެލެހެއްޓެވީ ދިވެހިރާއްޖެއިން
ޔޫއެން އިކޮނޮމިކް އެންޑް ސޯޝަލް ކޮމިޝަން ފޯ އޭޝިއާ އެންދަ ޕެސިފިކްގެ ތިމާވެއްޓާ ތަރައްޤީއާ ބެހޭ ކޮމިޓީގެ 7 ވަނަ މިނިސްޓީރިއަލް ޖަލްސާ
ޔޫއެންއެސްކެޕްގެ މިނިސްޓީރިއަލް ކޮމިޓީ އޮން އެންވައިރަމަންޓް އެންޑް ޑިވަލޮޕްމަންޓުގެ 7 ވަނަ ޖަލްސާގައި ރާއްޖެ ތަމްސީލުކޮށްފިއެވެ.
ޔޫއެން އިކޮނޯމިކް އެންޑް ސޯޝަލް ކޮމިޝަން ފޯ އޭޝިއާ އެންދަ ޕެސިފިކްގެ ތިމާވެއްޓާ ތަރައްޤީއާ ބެހޭ ކޮމިޓީގެ 7 ވަނަ މިނިސްޓީރިއަލް ޖަލްސާ 29 ނޮވެންބަރުގައި ބެންކޮކްގައި ފެށިގެން ކުރިއައް އެބަދެއެވެ. މި ބައްދަލުވުމުގެ މަޤްސަދަކީ ތިމާވެއްޓާ ތަރައްޤީގެ ރޮންގުން އޭޝިއާ ޕެސިފިކް ސަރަހައްދުގައި އިސްކަންދޭންވީ ކަންތައްތައް ދެނެގަނެ، ސަރަހައްދީ ފެންވަރުގައި އެއްބަސްވެވޭ ކަންތައްތައް ފާހަގަކޮށް، ސަރަހައްދުގެ ސަރުކާރުތަކާއި، ސިވިލް ސޮސައިޓީއާއި، ޕްރައިވެޓް ސެކްޓަރާއި، ބައިނަލްއަޤްވާމީ ޖަމިއްޔާތައް ގުޅިގެން ކުރެވޭނެ މަސައްކަތްތައް ކުރުމައް މަގުފަހިކުރުމެވެ.
މިބައްދަލުވުމުގެ 29 ނޮވެމްބަރުގައި އޮތް ސީނިއަރ އޮފިޝަލުންގެ ސެގްމަންޓުގެ ރިޔާސަތު ބެލެހެއްޓެވީ ދިވެހިރާއްޖެއިންނެވެ. އަދި ދިވެހިރާއްޖޭގެ ފަރާތުން ރިޔާސަތު ބެލެހެއްޓެވީ ވައިސް ޗެއާރގެ މަޤާމަށް އިންތިޚާބުވެފައިވާ ރާއްޖެއިން އޫއެންއެސްކެޕައް ކަންޑައަޅާފައިވާ ޕާމަނަންޓް ރެޕްރެސެންޓޭޓިވް ހުދާ އަލީ ޝަރީފްއެވެ. އަދި ޖަލްސާގެ މިނިސްޓީރިއަލް ސެގްމަންޓުން ފާސްކުރަން ހުށަހަޅާ މިނިސްޓީރިއަލް ޑެކްލަރޭޝަންގެ ޑްރާފްޓުގައި ހިމެނުމައް ސަރަހައްދީ ޤައުމުތަކައް އެއްބަސްވެވޭ ކަންތައްތަކާއި ބަސްމަގު ނިންމުމައް ދުރާލާ ބޭއްވުނު ބައްދަލުވުންތަކުގެ ފެސިލިޓޭޓަރުގެ ރޯލް އަދާކުރެއްވީ ވެސް ޕާމަނަންޓް ރެޕްރެސެންޓޭޓިވް ހުދާއެވެ.
މިޖަލްސާގައި ރާއްޖޭގެ ކަންޓްރީ ސްޓޭޓްމަންޓް ހުށަހެޅުއްވުމައް ހަމަޖެހިފައިވަނީ މިނިސްޓަރ ފޮރ އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ، އައިމިނަތު ޝައުނާއެވެ. މިނިސްޓަރު ޝައުނާ ކަންޓްރީ ސްޓޭޓްމަންޓު ހުށަހަޅުއްވާނީ 1 ޑިސެންބަރުވާ ބުރާސްފަތި ދުވަހުއެވެ.
