އެމެރިކާގެ ޓީމު މުބާރާތުން ވަކި ކުރުމަށް އީރާނުން ގޮވާލައިފި

ގަތަރުގައި މިހާރު ކުރިއަށްދާ ވޯލްޑް ކަޕްގައި ކުޅޭ އެމެރިކާގެ ޓީމު މުބާރާތުން ބޭރުކުރުމަށް އީރާނުން ގޮވާލައިފިއެވެ.

އެ ޤައުމުން މިގޮތަށް ގޮވާލާފައިވަނީ އެމެރިކާގެ ސޮކަރ ފެޑަރޭޝަނުން އީރާނުގެ ދިދަ ބަދަލުކޮށް ސޯޝަލް މީޑިއާ ޕްލެޓްފޯމުތަކުގައި ބޭނުން ކުރުމުންނެވެ. އެގޮތުން، ދިދައިގައި ހިމެނޭ އިސްލާމިކް ރިޕަބްލިކް ނިޝާން ވަނީ ދިދައިން އުނިކޮށްފައެވެ.

އެމެރިކާގެ ސޮކަރ ފެޑަރޭޝަނުން މިގޮތަށް އަމަލު ކޮށްފައިވަނީ މިހާރު އީރާނުގައި ކުރިއަށްދާ މުޒާހަރާތަކާ ގުޅިގެން އެމެރިކާގެ ތާއީދު ހާމަކުރުމުގެ ގޮތުންނެވެ. އެގޮތުން، 24 ގަޑިއިރަށް ދިދަ ބަދަލުކޮށްފައިވާއިރު މިހާރު ވަނީ ރަސްމީ ދިދައަށް ބަދަލުކޮށްފައެވެ.

ސޮކަރ ފެޑަރޭޝަނުން ސީއެންއެންއަށް ބުނެފައިވާ ގޮތުގައި 24 ގަޑިއިރަށް ދިދަ ބަދަލު ކުރީ އީރާނުގައި އިންސާނީ ޙައްގުތަކަށް އެދި މުޒާހަރާ ކުރަމުންދާ އަންހުންނާއެކު ތިބިކަން ހާމަކުރުމުގެ ގޮތުންނެވެ. މިއީ އީރާނުގެ ސަރުކާރާ ގުޅިގެން ގެނައި ބަދަލެއް ނޫން ކަމަށް ވެސް އެ ޤައުމުގެ ސަރުކާރުގެ އޮފިޝަލަކާ ހަވާލާދީ ސީއެންއެންގައި ވަނީ ބުނެފައެވެ.

އެމެރިކާގެ ސޮކަރ ފެޑަރޭޝަނުގެ މި އަމަލު ކުށްވެރިކޮށް އީރާނުގެ ސްޓޭޓް މީޑިއާއިން ބުނީ ވަގުތުން އެމެރިކާގެ ޓީމު މުބާރާތުން ވަކި ކުރަން ޖެހޭނެ ކަމަށެވެ. އަދި ދިދަ ބަދަލު ކުރުމަކީ ފީފާގެ ޗާރޓަރާ ޚިލާފުވުން ކަމަށާއި އެހެންވެ، އިތުރު 10 ގޭމު ނުކުޅެވޭ ގޮތަށް ސަސްޕެންޑު ކުރަން ޖެހޭ ކަމަށް ވެސް އީރާނުން ބުންޏެވެ.

މި މައްސަލައިގައި މިހާތަނަށް ފީފާއިން އެއްވެސް އެއްޗެއް ބުނެފައެއް ނުވެއެވެ.

ވޯލްޑްކަޕްގައި އީރާނާއި އެމެރިކާ ކުޅެމުން އަންނަނީ ގްރޫޕް ބީގައެވެ. އެ ދެ ޓީމު ބައްދަލުކުރާ މެޗު ތާވަލު ކޮށްފައިވަނީ އަންނަ އަންގާރަ ދުވަހަށެވެ.