ފަނޑިޔާރުކަމުން ވަކިވާތާ 6 މަސް ވަންދެން، ވަކީލުކަން ނުކުރެވޭގޮތަށް ކަނޑައަޅަން ކޮމިޓީން ފާސްކޮށްފި

ފަނޑިޔާރުކަމުން ވަކިވާތާ ނުވަތަ ވަކިކުރާ ތާރީޚުން ފެށިގެން 6 މަސްދުވަސް ވަންދެން ގާނޫނީ ވަކީލުކަން ނުކުރެވޭގޮތަށް، ގާނޫނީ ފަންނުގެ ގާނޫނު އިސްލާހުކުރުމަށް ނިންމައި، ރައްޔިތުންގެ މަޖިލީހުގެ ޖުޑީޝަރީ ކޮމިޓީން ފާސްކޮށްފިއެވެ.

ގާނޫނީ ފަންނުގެ ގާނޫނަށް އިސްލާހު ގެނައުމުގެ ބިލު ދިރާސާކުރުމަށް ޖުޑީޝަރީ ކޮމިޓީއަށް ފޮނުވުމުން އެ ކޮމިޓީން ވަނީ އެޓަރނީ ޖެނެރަލްގެ އޮފީހުގެ ލަފަޔާއެކު ދެ އިސްލާހެއް އިތުރުކޮށްފައެވެ. އެގޮތުން، ފަނޑިޔާރުކަމުން ވަކިކުރާ މީހެއްގެ ލައިސަންސް ހިފަހައްޓަން ކަނޑައަޅާ މުއްދަތު އެއް އަހަރު ދުވަހުން ހަ މަސް ދުވަހަށް ބަދަލުކުރުމަށް އެ އޮފީހުން ވަނީ ލަފާދީފައެވެ.

Advertisement

މަޖިލީހުގެ ޖުޑީޝަރީ ކޮމިޓީންވަނީ އެ ލަފަޔާއެކު، ގާނޫނީ ފަންނުގެ ގާނޫނުގެ 35 ވަނަ މާއްދާގެ ށ އަށް ގެނައި ބަދަލުގައި ވަނީ، ގާނޫނީ ވަކީލަކު ފަނޑިޔާރުކަމުގެ މަގާމުން ވަކިވާ ނުވަތަ ވަކި ކުރެވޭ ތާރީޚުން ފެށިގެން 6 މަސްދުވަހުގެ މުއްދަތަށް، އެއްވެސް ކޯޓަކަށް ގާނޫނީ ވަކީލެއްގެ ގޮތުގައި ނުދެވޭނެކަމަށް ކަނޑައަޅާފައެވެ. މި މުއްދަތު ހަމަވުމުން ވަކީލުކަމުގެ ހުއްދަ ހިފެހެއްޓިގައި އޮތް އޮތުން ނިމުމަކަށް ގެނައުމަށް އެ ވަކީލަކު އެދެން ޖެހޭނީ ބާރ ކައުންސިލްގައެވެ.

ގާނޫނީ ވަކީލުކަމުގެ ހުއްދަ ހިފެހެއްޓިފައި އޮތްއޮތުން ނިމުމަކަށް ގެނައުމަށް ބާ ކައުންސިލަށް ހުށަހަަޅާއިރު، ގާނޫނީ ވަކީލަކު ފަނޑިޔާރުކަމުން މުސްކުޅިކޮށްފައިވާނަމަ، ނުވަތަ އިސްތިއުފާދީފައިވާނަމަ، އެ މީހެއްގެ މައްޗަށް ޖުޑީޝަލް ސަރވިސް ކޮމިޝަނުން ނުވަތަ އެ ނޫންވެސް ތަހުގީގީ އިދާރާއަކުން އޭރު މައްސަލައެއް ބަލަމުންދާނަމަ އެ މައްސަލައެއްގެ ތަފްސީލާއި، ގާނޫނީ ވަކީލަކު ފަނޑިޔާރުކަމުން ވަކިކޮށްފައިވާނަމަ އެކަން ބަޔާންކުރުމާއެކު ވަކިކުރި މައްސަލައިގެ ތަފްސީލް ބަޔާންކުރަން ޖެހޭނެއެވެ.

މި ދެ މާއްދާ ހިމެނޭގޮތަށް ގާނޫނީ ފަންނުގެ ގާނޫނުގެ ބިލު ޖުޑީޝަރީ ކޮމިޓީން ދިރާސާކުރިގޮތަށް މަޖިލީހުގެ ތަޅުމަށް ފޮނުވުމަށް ވަނީ ކޮމިޓީގެ ހުރިހާ މެމްބަރުންގެ އިއްތިފާގުން ފާސްކޮށްފައެވެ.

ގާނުނީ ފަންނުގެ ގާނޫނުގެ 35 ވަނަ މާއްދާއަކީ ފަނޑިޔާރުންގެ ގާނޫނީ ވަކީލުކަމުގެ ހުއްދައާގުޅޭ މާއްދާއެވެ. އެ މާއްދާގެ ހ ގައި ބުނެފައިވާގޮތުގައި، ގާނޫނުގެ ދަށުން ހުއްދަ ލިބިފައިވާ ގާނޫނީ ވަކީލަކު ފަނޑިޔާރެއްގެ މަގާމަށް އައްޔަންކޮށްފިނަމަ، އެހިނދުން ފެށިގެން ބެލެވޭނީ އެ ގާނޫނީ ވަކީލަކީ "ގާނޫނީ ވަކީލުކަމުގެ މަސައްކަތް ނުކުރާ ވަކީލެއް"ގެ ގޮތުގައެވެ. އަދި ފަނޑިޔާރުކަމުގައި ދެމިހުރިހާ ދުވަހު އެ ވަކީލެއްގެ ހުއްދަ އޮންނާނީ ހިފެހެއްޓިފައިކަމަށާއި، އެ މުއްދަތުގެ ތެރޭގައި ގާނޫނުގެ ދަށުން ލިބިދޭ ހައްގުތަކާއި އިމްތިޔާޒުތައްވެސް ހިފެހެއްޓިފައިވާނެ ކަމަށް ވަނީ ބަޔާންކޮށްފައެވެ.

ގާނޫނުގައި މިހާރު އޮތްގޮތުން، 35 ވަނަ މާއްދާގެ ށ ގެ ދަށުން ފަނޑިޔާރުކަމުގެ މަގާމުން ވަކިވެއްޖެނަމަ، އެ މީހަކު ފަނޑިޔާރުކަމާ ހަވާލުވުމުގެ ކުރިން އެ މީހަކަށް ދޫކޮށްފައިވާ ހުއްދަ ވަގުތީގޮތުން ހިފެހެއްޓިފައި އޮތް އޮތުން ނިމުމަކަށް އަންނާނެއެވެ. އެހެންވެ، ފަނޑިޔާރުކަމުން ވަކިވުމުން ނުވަތަ ވަކި ކުރުމުން އެ ވަކީލަކަށް ވަކާލާތު ކުރެވެއެވެ.