އާއްމުކޮށް ކުޑަކުދިންނަށް ޖެހޭ ބައްޔެއްކަމަށްވާ ހޭންޑް ފުޓް އެންޑް މައުތު، ރާއްޖޭގައި ހަލުވިކަމާއެކު ފެތުރެމުންދާތީ ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އިލްތިމާސްކޮށްފިއެވެ.

މި ބައްޔަކީ ވައިރަހެއްގެ ޒަރީއާއިން ޖެހޭ، ގައިން ގަޔަށް އަރާ ބައްޔެކެވެ. މި ބަލި އާއްމުކޮށް ކުޑަކުދިންނަށް ޖެހުނު ނަމަވެސް މިއީ ކޮންމެ އުމުރެއްގެ މީހަކަށްވެސް ޖެހިދާނެ ބައްޔެކެވެ.

އެޗްޕީއޭއިން ބުނެފައިވާގޮތުގައި އާއްމުކޮށް ކުޑަކުދިން އެއްވެ އުޅޭ ތަންތަނުގައި މި ބަލި ފެތުރުން އިތުރުވުމުގެ ފުރުސަތު ބޮޑުވާނެއެވެ. އެހެންކަމުން ބަލީގެ އަލާމާތްތައް ދެނެގަނެ، ރައްކާތެރިކަމުގެ ފިޔަވަޅު އެޅުން މުހިންމު ކަމަށް އެ އިދާރާއިން ބުނެއެވެ.

މި ބަލި ޖެހުމުން ފެންނާނެ އަލާމާތްތަކުގެ ތެރޭގައި; ހުން އައިސް ބޮލުގައި ރިހުމާއި އަތްތިލައާއި ފައިތިލައިގައި ރަތްކުލައިގެ ބިހިތަކެއް ނެގުމަށްފަހު ފެން ފޮޅަކަށް ބަދަލުވުމާއި، ކަރުތެރެ ފާރުވުމާއި ވަރުދެރަވުމާއި ކާހިތްނުވުން ހިމެނެއެވެ.

މި ބަލި ފެތުރެނީ ބަލި ޖެހިފައިވާ ކުއްޖާ ނުވަތަ މީހެއްގެ ކުޅު، އަރިދަފުސް، ބޮޑުކަމުދާތަކެތި އަދި ފޮޅުން ނިކުންނަ ދިޔައިންނާއި، ކެއްސާ ކިބިހި އަޅާއިރު، ނޭވާލާ ނިޒާމުގެ ޒަރީއާއިންނެވެ. ވައިރަސް ހަށިގަނޑުގައި އަށަގަންނަތާ 3-7 ދުވަހުގެ ތެރޭގައި އަލާމާތްތައް ފެންނަން ފަށައެވެ.

ހޭންޑް ފުޓް އެންޑް މައުތުން ރައްކާތެރިވެ ތިބުމަށް އެޅިދާނެ ފިޔަވަޅުތަކުގެ ތެރޭގައި; ގިނައިން އަތްދޮވުމާއި، އާއްމުކޮށް އަތްލާތަކެތި ސާފު ކުރުމާއި، ބަލިޖެހިފައިވާ ކުދިން ބޭރަށް (ޚާއްސަކޮށް ސްކޫލަށް) ނުގެންދިއުމާއި، ބޭނުންކޮށްފައިވާ ނެޕީއާއި ޓިޝޫފަދަ ތަކެތި ރައްކާތެރިގޮތުގައި ނައްތާލުން ހިމެނެއެވެ.