ރާއްޖެއަށް އެތެރެކުރި 15 މިލިއަން ރުފިޔާގެ ކޮކެއިން އަތުލައިގެންފި
މި އަހަރުގެ މިހާތަނަށް ޖުމްލަ 17 ކިލޯގެ ކޮކެއިން އަތުލައިގަނެފައިވޭ
ކަސްޓަމްސްއިން މީގެކުރިން އަތުލައިގަނެފައިވާ މަސްތުވާތަކެތި
ބްރެޒިލުން ރާއްޖެ އައި މީހެއްގެ އަތުން 15 މިލިއަން ރުފިޔާގެ ކޮކެއިން ކަސްޓަމްސް އިން އަތުލައިގެންފިއެވެ.
ކަސްޓަމްސް އިން ބުނީ އެ މަސްތުވާތަކެތި އެތެރެކުރީ ނޮވެމްބަރު މަހުގެ ނުވަ ވަނަ ދުވަހު ބްރެޒިލުން ރާއްޖެ އައި އެ ގައުމުގެ އުމުރުން 29 އަހަރުގެ އަންހެނަކު ކަމަށެވެ.
އޭނާ ގެނައި ލަގެޖުގައި ޝައްކު ކުރެެވޭ ޒާތުގެ ބާވަތެއް ހުރުމުން, އިތުރަށް ފާސްކޮށް މަސްތުވާތަކެތި ފެނުނުއިރު އެ ތަކެތި އިތުރަށް ބަލައި ތަހުލީލު ކުރުމުން ކޮކެއިން އަށް ޕޮޒިޓިވް ވެފައިވާ ކަމަށް ކަސްޓަމްސް އިން ބުނެއެވެ.
އަތުލައިގަތް މަސްތުވާތަކެތީގެ ބަރުދަނުގައި ޖުމްލަ 4.5 ކިލޯ ހުރިއެވެ.
އެ މީހާ އާއި މަސްތުވާތަކެތި ފުލުހުންނާ ހަވާލު ކޮށްފައިވާ ކަމަށް ކަސްޓަމްސް އިން ބުނެއެވެ.
މިއީ މި އަހަރުގެ މިހާތަނަށް ރާއްޖެއަށް ކޮކެއިން އެތެރެކުރަން އުޅެނިކޮށް އަތުލައިގަތް 10 ވަނަ ފަހަރު ކަމަށް ކަސްޓަމްސް އިން ބުނެއެވެ. ކަސްޓަމްސް އިން ބުނިގޮތުގައި މި އަހަރުގެ މިހާތަނަށް ޖުމްލަ 17 ކިލޯގެ ކޮކެއިން އަތުލައިގަނެފައިވެއެވެ.
