ފީފާ ވޯލްޑް ކަޕްގައި ވާދަކުރާ އިންގްލެންޑްގެ ޓީމު ޤަތަރަށް ގޮސްފިއެވެ.

އިންގްލެންޑް ޓީމު ޤަތަރަށް ގޮސްފައިވަނީ އަންގާރަ ދުވަހުގެ ވަގުތެއްގައެވެ. މުބާރާތުގައި ވާދަކުރާ ޓީމުތަކުން މިހާރު ވަނީ ޤަތަރަށް ދަތުރު ފަށާފައެވެ. ބައެއް ޓީމުތަކުން ޤަތަރަށް ދިޔުމަށް ހަމަޖެހިފައިވަނީ މުބާރާތުގެ ކުރިން ކުޅޭ އެކުވެރިކަމުގެ މެޗަށްފަހުއެވެ.

މިއަހަރުގެ މުބާރާތުގައި އިންގްލެންޑް އޮތީ ވޭލްސް، އެމެރިކާ އަދި އީރާނާއެކު ގްރޫޕް ބީ ގައެވެ. މި ގްރޫޕްގެ ފޭވަރިޓުންނަކީ ވެސް އިންގްލެންޑް ކަމަށް ގިނަ ބަޔަކު ދެކެއެވެ. އިންގްލެންޑަކީ އެންމެ ފަހުން މިދިޔަ އަހަރު އޮތް ޔޫރޯ ފުޓުބޯޅަ މުބާރާތުގެ ރަނަރަޕް ޓީމެވެ. އެ މުބާރާތުގެ ފައިނަލްގައި ބަލިވީ އިޓަލީ އަތުންނެވެ. އޭގެ 18 މަސް ދުވަސް ފަހުން އިންގްލެންޑުން ވޯލްޑް ކަޕަށް ކުރިމަތިލާއިރު، އެ ޤައުމަކީ މުބާރާތުގެ ފޭވަރިޓުންގެ ލިސްޓުގައި ވެސް ގިނަ ބަޔަކު ހިމަނަމުން އަންނަ ޤައުމެކެވެ.

އިންގްލެންޑް ޓީމު ޤަތަރަށް ދަތުރުކޮށްފައިވާއިރު އެ ޤައުމުގެ ކެޕްޓަން ހެރީ ކޭން ވަނީ މުބާރާތުގައި އޭނާ ބޭނުންކުރާނީ ވަންލަވް ރެއިންބޯ ކެޕްޓަން ބޭންޑު ކަމަށް ހާމަކޮށްފައެވެ. އެކަމާ ގުޅިގެން ފީފާގެ ރައީސް އިންފަންޓީނޯ ވިދާޅުވީ ފުޓުބޯޅައިން ސިޔާސީ ކަންކަމާއި، ޚިޔާލު ތަފާތުވާ ކަންކަން ނެރުމަށް ގޮވާލާފައެވެ. މީގެ އިތުރުން ޤަތަރުން ވެސް ވަނީ މުބާރާތުގައި އެކަހަލަ ކަމެއް ނުކުރެވޭނެ ކަމުގެ އިންޒާރު ދީފައެވެ.

މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި އިންގްލެންޑް ނުކުންނާނީ މި މަހުގެ 21 ވަނަ ދުވަހު އީރާނާ ދެކޮޅަށެވެ. ދެ ވަނަ މެޗުގައި 26 ވަނަ ދުވަހު އެމެރިކާއާ ދެކޮޅަށް ކުޅުމަށްފަހު، ގްރޫޕް ސްޓޭޖު ފަހު މެޗުގައި ވޭލްސްއާ ދެކޮޅަށް ނުކުންނާނީ 30 ވަނަ ދުވަހުއެވެ.