އަންނަ އަހަރުގެ ބަޖެޓްގައި އިސްލާމިކް ޔުނިވަރސިޓީއަށް މިހާރު ކަނޑައަޅާފައިވާ މިންވަރަށްވުރެ އިތުރަށް 15 މިލިއަން ރުފިޔާ ބޭނުންވާކަމަށް އެ ޔުނިވަރސިޓީން ބުނެފިއެވެ.

އަންގާރަ ދުވަހު ބޭއްވި ބަޖެޓް ދިރާސާކުރާ ކޮމިޓީގެ ބައްދަލުވުމުގައި އިސްލާމިކް ޔުނިވަރސިޓީން ވަނީ, އެޔުނިވަރސިޓީގެ މަސައްކަތްތައް މިހާރަށްވުރެ ހަރުދަނާކޮށް، ޔުނިވަރސިޓީ މިހާރަށްވުރެ ފުޅާކުރުމަށް އިތުރު ފައިސާ ބޭނުންވާކަން ހާމަކޮށްފައެވެ. އެގޮތުން ބަޖެޓް އިތުރުކުރުމަށް ބޭނުންވާ 12 ކަމެއް ޔުނިވަރސިޓީގެ ފަރާތުން ކޮމިޓީއާ ހިއްސާކޮށްފައިވެއެވެ.

އެކަންކަމާ ގުޅޭގޮތުން ކޮމިޓީގެ ބައްދަލުވުމުގައި ވާހަކަދައްކަވަމުން އިސްލާމިކް ޔުނިވަރސިޓީގެ ވައިސް ޗާންސެލަރ ޑރ. އިބްރާހީމް ޒަކަރިއްޔާ މޫސާ ވިދާޅުވީ، ޔުނިވަރސިޓީ ހިންގުމަށް ހަމައެކަނި މުސާރަ ދީގެން ނުފުދޭކަމަށާއި، ތަނުގެ އިންފްރާސްޓްރަކްޗަރ ރަނގަޅުކުރުމަކީ މުހިންމު ކަމެއް ކަމަށެވެ. އެހެންކަމުން އެކަންކަން ފުރިހަމަކުރުމަށްޓަކައި ބަޖެޓްގައި އިތުރު ކަންކަން ހިމެނުމަކީ މުހިންމު ކަމެއް ކަމަށް ވައިސް ޗާންސެލަރ ވިދާޅުވިއެވެ.

އެގޮތުން ޔުނިވަރސިޓީގެ ސްޓްރީޖިކް ޕްލޭންގައި ހުރި ކަންކަމަށް ބަލާއިރު، ޔުނިވަރސިޓީގައި ރާއްޖެއިން ބޭރު ދަރިވަރުން ތައުލީމު ހާސިލުކުރުމުގެ ފުރުސަތު ތަނަވަސްކުރުމަށް ހިމަނާފައިވާއިރު، އެކަމަށްޓަކައި ވަކި ޚާއްސަ ޑިޕާޓްމަންޓެއް ފުރިހަމައަށް މަސައްކަތްކުރަންޖެހޭކަމަށް ވައިސް ޗާންސެލަރ ވިދާޅުވިއެވެ. މިހާރުވެސް އެ މަސައްކަތްތައް ކުރެވެމުންދާކަމަށާއި، ނަމަވެސް ހަރުދަނާގޮތެއްގައި އެކަން ކުރިއަށްދާނީ ވަކި ޑިޕާޓްމަންޓެއް ލޯކަލް އެންޑް އިންޓަރނޭޝަނަލް ރިލޭޝަންގެ ނަމުގައި އުފެދިގެންކަމަށް ވައިސް ޗާންސެލަރ ވިދާޅުވިއެވެ.

މީގެއިތުރުން ޔުނިވަރސިޓީން ހިންގާ ކޯސްތައް މިހާރަށްވުރެ ބޮޑަށް އިޝްތިހާރުކުރެވި އެކަމަށް އެކަށޭނެ ބަޖެޓެއް ބޭނުންވާކަމަށް ވައިސް ޗާންސެލަރ ވިދާޅުވިއެވެ.

ވައިސް ޗާންސެލަރ ޑރ. ދީބާ މޫސާ ވިދާޅުވީ، ސްޓްރީޖިކް ޕްލޭންގައިވާ ގޮތުން 2025 ވަނަ އަހަރާ ހަމައަށް އަންނައިރު ޔުނިވަރސިޓީން ކިޔަވާ 20 އިންސައްތަ ކުދިންނަކީ ބައިނަލްއަގްވާމީ ކިޔަވާކުދިންނަށް ވުން އޮންނަ ކަމަށާއި، އެމަސައްކަތް މިހާރުވެސް ކުރިއަށްގެންދާކަމަށެވެ. އެގޮތުން މެލޭޝިޔާގެ ޔުނިވަރސިޓީތަކާ ވާހަކަދައްކައިގެން ކިޔަވާކުދިން އެކްސްޗޭންޖުކުރުމާއި ކަރިކިޔުލަމް އެލައިން ކުރުމުގެ މަސައްކަތް ކުރިޔަށްދާކަމަށް ޑރ. ދީބާ ވިދާޅުވިއެވެ.

ނަމަވެސް ދުރު މުސްތަގްބަލަށް ވިސްނާއިރު ކުދިންނަށް އެކޮމޮޑޭޝަން ހަމަޖައްސަންޖެހޭއިރު އެފަދަ އިންތިޒާމެއްވެސް އަދި ހަމަޖެހިފައި ނެތްކަމަށް ދީބާ ވިދާޅުވިއެވެ. އެހެންކަމުން ވަކި ޑިޕާޓްމަންޓެއް އުފެދިގެން އެމަސައްކަތްތައް ކުރިޔަށްދާންޖެހޭކަމަށް ވިދާޅުވިއެވެ.

މީގެއިތުރުން އިސްލާމިކް ޔުނިވަރސިޓީގެ ކޯސްތައް އިތުރު ރަށްރަށަށް ފުޅާކޮށް ރަށްރަށުގައި ޑިމާންޑް އޮންނަވަރަށް ޖާގަ ނުލިބޭތީ، ކޯސްތައް ބޭނުންވާ ސްޕީޑްގައި ނުހިންގޭކަން ޔުނިވަރސިޓީގެ ބޭފުޅުން ފާހަގަކުރެއްވިއެވެ. ޔުނިވަރސިޓީގެ ޖާގައިގެ ދަތިކަން ހައްލުކޮށް، ކޮންމެހެން ކުރަންޖެހޭ މަސައްކަތްތައް ފުޅާކުރުމަށްޓަކައި އެންމެ މަދުވެގެން 10 މިލިއަން ރުފިޔާ ބޭނުންވާނެކަމަށް އިސްލާމިކް ޔުނިވަރސިޓީން ވަނީ ފާހަގަކޮށްފައެވެ.

ކޮމިޓީގެ މުގައްރިރު ކިނބިދޫ ދާއިރާގެ މެމްބަރ މުހައްމަދު ނާޝިޒް ވިދާޅުވީ އެކަންކަމާމެދު ކޮމިޓީގައި ދިރާސާކުރާނެކަމަށެވެ. ކޮމިޓީ ބައްދަލުވުމުގައި މެމްބަރުން ވަނީ އިސްލާމިކް ޔުނިވަރސިޓީން އެދުނުގޮތަށް ބަޖެޓް އިތުރުކުރުމަށް ތާއީދުކުރައްވާކަމަށް ވިދާޅުވެފައެވެ.