މި މަހުގެ 20 ވަނަ ދުވަހު ފަށާ ފީފާ ވޯލްޑް ކަޕްގައި ވާދަ ކުރާ ސެނެގާލް ޓީމު ޤަތަރަށް ގޮސްފިއެވެ.
ސެނެގާލް ޓީމު ޤަތަރަށް ގޮސްފައިވަނީ ހޯމަ ދުވަހުގެ ވަގުތެއްގައެވެ. ނަމަވެސް އެ ޤައުމުގެ އެންމެ މުހިންމު ކުޅުންތެރިޔާ، ޖަރުމަނުގެ ބަޔާން މިއުނިކަށް ކުޅެމުން އަންނަ ސަޑިއޯ މާނޭ ޓީމާއެކު ދަތުރުކޮށްފައެއް ނުވެއެވެ. މާނޭ މި ވަގުތު ހުރީ އޭނާ އަށް ލިބުނު އަނިޔާގެ ސަބަބުން އިތުރު ޓެސްޓުތައް ހެދުމަށް ބަޔާންގައި ކަމަށް ރިޕޯޓުތައް ބުނެއެވެ.
ޓީމާއެކު އެއް ނަންބަރު ގޯލް ކީޕަރު އެޑުއާޑޯ މެންޑީ އާއި ސެންޓަބެކް ހާލިދޫ ކުލިބާލޭ ފަދަ މުހިންމު އެހެން ކުޅުންތެރިން ވަނީ ޤަތަރަށް ގޮސްފައެވެ. އެކަމާ ގުޅިގެން ސެނެގާލްގެ ކޯޗު އަލިއޫ ސީސޭ ބުނީ އަނިޔާއިން ރަނގަޅުވެ މާނޭ މުބާރާތުގައި ކުޅުމަށް ޓީމާ ގުޅޭނެ ކަމުގެ ވަރަށް ބޮޑު އުންމީދެއް އޮތް ކަމަށެވެ. ސެނެގާލް އާއި ބަޔާނުން ވެސް މަސައްކަތް ކުރަމުން އަންނަނީ މާނޭ އަށް އެންމެ ފުރިހަމަ ފަރުވާތައް ދިނުމަށް ފަހު ވޯލްޑް ކަޕްގައި ކުޅުމުގެ މަގު ފަހި ކުރުމަށެވެ.
މުބާރާތުގައި ސެނެގާލް އޮތީ ހޯސްޓް ޤައުމު ޤަތަރުގެ އިތުރުން ނެދަލޭންޑްސް އާއި އިކުއެޑޯއާ އެއް ގްރޫޕެއްގައެވެ. އެ ޤައުމުގެ ފުރަތަމަ މެޗުގައި މި މަހުގެ 21 ވަނަ ދުވަހު ނިކުންނާނީ ނެދަލޭންޑްސް އާ ދެކޮޅަށެވެ. ދެ ވަނަ މެޗުގައި 25 ވަނަ ދުވަހު ޤަތަރާ ދެކޮޅަށް ކުޅުމަށްފަހު، ގްރޫޕް ސްޓޭޖު ފަހު މެޗުގައި އިކުއެޑޯއާ ދެކޮޅަށް ނިކުންނާނީ 29 ވަނަ ދުވަހުއެވެ.
