މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގަށް އިހުތިރާމް ނުކުރާ ކަމަށް އެ ޓީމަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފިއެވެ.

ރޮނާލްޑޯ މިހެން ބުނީ އޭނާ ދިން އިންޓަވިޔުއެއްގައެވެ. ރޮނާލްޑޯ ބުނީ އޭނާ ޓެން ހާގަށް އެއްވެސް ވަރަކަށް އިހުތިރާމް ނުކުރާ ކަމަށެވެ. ސަބަބެއްގެ ގޮތުގައި ރޮނާލްޑޯ ބުނީ ޓެން ހާގް އޭނާ އަށް އިހުތިރާމް ނުކުރާތީކަމަށެވެ. ރޮނާލްޑޯ ބުނީ އެއްވެސް މީހަކު އޭނާ އަށް އިހުތިރާމް ނުކުރާ ނަމަ، އޭނާ ވެސް އިހުތިރާމް ނުކުރާނެ ކަމަށެވެ.

މީގެ އިތުރުން ރޮނާލްޑޯ ވަނީ ޔުނައިޓެޑަށް ވަރަށް ބޮޑަށް ފާޑުކިޔާފައެވެ. ރޮނާލްޑޯ ބުނީ ޔުނައިޓެޑުން އޭނާ އަށް ކަންކަން އޮޅުވާލި ކަމަށާއި، ކުލަބުން އޭނާ ބޭރުކުރަން ބޭނުންވާ ކުޅުންތެރިން ވެސް ތިބި ކަމަށެވެ. ރޮނާލްޑޯ ބުނީ އޭނާ ބޭރުކޮށްލަން ބޭނުންވަނީ ޓެން ހާގް އެކަނި ނޫން ކަމަށެވެ. މީގެ އިތުރުން އެއީ މި ސީޒަންގައި ވެގެން އުޅޭ ކަމެއް ނޫންކަން ފާހަގަކޮށް ރޮނާލްޑޯ ބުނީ ނިމުނު ސީޒަންގައި ވެސް އެކަން ބޭނުންވެގެން ބަޔަކު އުޅުނު ކަމަށެވެ.

ރޮނާލްޑޯގެ ބަހުގެ ހަމަލާތަކެއް ޓެން ހާގަށް ފޮނުވާލިއިރު، ސީޒަން ފެށުނު ކޮޅު ޓެން ހާގް ވަނީ ރޮނާލްޑޯ ބެންޗުގައި ބައިންދާފައެވެ. ޓެން ހާގް އޭރު ބުނީ 90 މިނެޓުގެ މެޗެއް ކުޅެވޭވަރަށް ރޮނާލްޑޯ އަދި ތަމްރީނުނުވާ ކަމަށެވެ. ރޮނާލްޑޯ ވަނީ ސީޒަންގެ ކުރީކޮޅު ޔުނައިޓެޑު ދޫކޮށްލަން ބޭނުންވާ ކަން ހާމަކޮށް، ފަރިތަކުރުންތަކުގައި ވެސް ބައިވެރިވުމަށް ދެކޮޅު ހަދާފައެވެ. ނަމަވެސް ޓެން ހާގް އޭރު ވެސް ބުނަމުން އައީ ރޮނާލްޑޯ ދޫކޮށްލަން ބޭނުންނުވާ ކަމަށާއި، އޭނާގެ ޕްލޭންގައި ރޮނާލްޑޯ ހިމެނޭ ކަމަށެވެ.

އޭގެ ފަހުން ޕްރިމިއާ ލީގުގައި ޓޮޓެންހަމާ ދެކޮޅަށް ޔުނައިޓެޑުން ކުޅުނު މެޗު ނުނިމެނީސް ރޮނާލްޑޯ ވަނީ ދަނޑު ދޫކޮށް ގޮސްފައެވެ. އެކަމާ ގުޅިގެން ޓެން ހާގް ބުނީ ބަދަލު ކުޅުންތެރިޔެއްގެ ގޮތުގައި ކުޅެން ރޮނާލްޑޯ ބޭނުންނުވީ ކަމަށެވެ. ރޮނާލްޑޯގެ އަމަލުތަކުގެ ސަބަބުން ޖެހިގެން އައި ޗެލްސީ މެޗަށް ޓެން ހާގް ރޮނާލްޑޯ ޓީމަށް ނުނަގައެވެ.