ޗެލްސީ ބަލިކޮށް މެންޗެސްޓަރ ސިޓީ ލީގު ކަޕްގެ ހަތަރު ވަނަ ބުރަށް!

އިނގިރޭސި ވާދަވެރި ކްލަބް ޗެލްސީ ބަލިކޮށް, އިނގިރޭސި ލީގުކަޕްގެ ހަތަރު ވަނަ ބުރުން މެންޗެސްޓަރ ސިޓީ ޖާގަ ހޯދައިފިއެވެ.

ސިޓީ ހަތަރުވަަ ބުރުން ޖާގަ ހޯދީ 2-0 ން ޗެލްސީ ބަލިކޮށްގެންނެވެ. އިއްތިހާދު ސްޓޭޑިއަމްގައި ކުޅުނު މެޗުގެ ސިޓީގެ ދެ ލަނޑު ދެވަނަ ހާފްގައި ފަސް މިނެޓުގެ ތެރޭގައި ޖެހީ ރިޔާދު މާރޭޒްއާއި އަލްވާރޭޒްއެވެ. ފުރަތަމަ އެގާރައިން ޖާގަދިން ދެ ކުޅުންތެރިން ލަނޑު ޖެހީ 53 ވަނަ މިނެޓާއި, 58 ވަނަ މިނެޓުގައެވެ. މެޗު އެންމެބޮޑަށް ޚާއްޞަވީ މެންޗެސްޓަރ ސިޓީގައި ކާމިޔާބީތަކެއް ހޯދުމަށްފަހު ޗެލްސީއަށް ބަދަލުވި އިނގިރޭސި ފޯވަޑް ރަހީމް ސްޓާލިންގއަށެވެ. މިއީ އޭނާ ސިޓީ ދޫކޮށްލުމަށްފަހު އެކްލަބާ ދެކޮޅަށް ނުކުތް ފުރަތަމަ މެޗެވެ. ސްޓާލިންގ ކުޅެން ނުކުތީ 68 ވަނަ މިނެޓުގައެވެ.

މިބައްޔާއެކު ޗެލްސީން މިސީޒަންގައި ހުރިހާ މުބާރާތެއްގައި އެންމެ ފަހުން ކުޅުނު ހަތް މެޗުގެ ތެރެއިން މޮޅު ވެވުނީ އެންމެ ދެ މެޗުންނެވެ. ވޯލްޑްކަޕްގެ ކުރިން ޗެލްސީއަށް އޮތީ ޕްރިމިއަރ ލީގު ތާވަލްގެ ތިންވަނާގައި އޮތް ނިއުކާސަލް ޔުނައިޓެޑާ ވާދަކުރާ މެޗެވެ.

މެންޗެސްޓަރ ސިޓީން މެޗު ކާމިޔާބުކުރީ މިޑްފީލްޑަރ ކެވިން ޑި ބުރޭނާ އާއި ފޯވާޑް ހާލާންޑްގެ އިތުރުން ފިލް ފޮޑެންވެސް ބޭނުން ނުކޮށެވެ. އެކަމަކު އަނިޔާއަށްފަހު އިނގިރޭސި މިޑްފީލްޑަރ ކަލްވިން ފިލިޕްސް މެޗުގެ ދެވަނަ ހާފްގައި ކުޅެން ނިކުތެވެ. މިއީ ސެޕްޓެމްބަރުގެ ފަހުން އޭނާ ކުޅުނު ފުރަތަމަ މެޗެވެ.