ހައްޖު ކޯޕަރޭޝަނުން ކުރި ހައްޖު ދަތުރަށް ދައުލަތުގެ ބަޖެޓުން ޚަރަދެއް ނުކުރޭ: އިސްލާމިކް މިނިސްޓަރ
ހައްޖު ކޯޕަރޭޝަނުން 417 މީހުންނަށް ހޭދަކޮށްފައިވަނީ 69.3 މިލިއަން ރުފިޔާ
ހައްޖުވެރިން އެއަރޕޯޓުގައި
ހައްޖު ކޯޕަރޭޝަނުން މިއަހަރުގެ ހައްޖަށް މީހުންގެ ގެންދިއުމުގައި ދައުލަތުގެ ބަޖެޓުން އެއްވެސް ޚަރަދެއް ނުކުރާކަމަށް، އެ ކޯޕަރޭޝަނާ ހަވާލާދެއްވައި، އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ރައްޔިތުންގެ މަޖިލީހުގެ މާފަންނު މެދުދާއިރާގެ މެމްބަރު އިބްރާހީމް ރަޝީދު (ބޮންޑޭ) ދެންނެވި ސުވާލަކަށް ލިޔުމުން ދެއްވި ޖަވާބުގައެވެ. އެގޮތުން، ބޮންޑޭ ވަނީ، ހައްޖު ކޯޕަރޭޝަނުން މައްކާއާއި މަދީނާގެ ހޮޓަލަށް ކުރި ޚަރަދުގެ ތަފްސީލާއި މުތައްވިފަށް (ގައިޑަށް) ކުރި ޚަރަދުގެ ތަފްސީލު ހޯދަން މިނިސްޓްރީއަށް ފޮނުއްވާފައެވެ.
އެ ސުވާލުގެ ޖަވާބުގައި އިސްލާމިކް މިނިސްޓަރު ވިދާޅުވީ މިއަހަރުގެ ހައްޖު ދަތުރަށް އެ ކޯޕަރޭޝަނުން ޚަރަދުކޮށްފައިވަނީ 69.3 މިލިޔަން ރުފިޔާކަމަށެވެ. އޭގެތެރޭގައި މައްކާ ހޮޓަލުގައި ހޭދަކުރި 23 ދުވަހަށް 39.6 މިލިއަން ރުފިޔާ ހޭދަވެފައިވާއިރު، މަދީނާ ހޮޓަލުގައި ހޭދަކުރި ދެ ދުވަހަށް 1.8 މިލިއަން ރުފިޔާ ހޭދަވިކަން ވަނީ ފާހަގަކުރައްވާފައެވެ.
މީގެ އިތުރުން ހައްޖު ދަތުރުގައި ގައިޑަށް 10.6 މިލިޔަން ރުފިޔާ ޚަރަދުކޮށްފައިވާއިރު، ހައްޖު ދަތުރުގެ އެއަރލައިން ޓިކެޓަށް 9.8 މިލިއަން ރުފިޔާ ޚަރަދުވިކަމަށާއި، ކެއުމަށް 875450.86 ރުފިޔާ ޚަރަދުވިކަމަށް މިނިސްޓަރގެ ޖަވާބުގައި ވަނީ ވިދާޅުވެފައެވެ.
ބޮންޑޭ ވަނީ މިއަހަރުގެ ހައްޖަށް ދިއުމަށް އާއްމުން ދެއްކި ފައިސާގެ ތަފްސީލާއި ދައުލަތުގެ ބަޖެޓުން ޚަރަދުކޮށްފައިވާ އަދަދުގެ ތަފްސީލު ހާމަކުރެއްވުމަށްވެސް އެދިވަޑައިގެންފައެވެ. ނަމަވެސް މިނިސްޓަރު ވިދާޅުވީ، 1443 ވަނަ އަހަރުގެ ހައްޖު ދަތުރުގައި އަމިއްލަގޮތުން ފައިސާ ދައްކައިގެން އެއްވެސް ފަރާތެއް ހައްޖު ކޯޕަރޭޝަންގެ ފަރާތުން ހައްޖަށް ގެންގޮސްފައި ނުވާކަމަށާއި، އަދި ހައްޖު ދަތުރަށް ދައުލަތުގެ ބަޖެޓުން އެއްވެސް ޚަރަދެއް ކޮށްފައި ނުވާކަމަށް އެ ކޯޕަރޭޝަނުން މައުލޫމާތު ދީފައިވާ ކަމަށެވެ.
ހައްޖު ކޯޕަރޭޝަނުން ކުރި ޚަރަދުގެ އިތުރުން، އިސްލާމިކް މިނިސްޓްރީގެ ފަރާތުން ބައިވެރިވި ހައްޖު މިޝަނާގުޅޭ ތަފްސީލު ހޯއްދެވުމަށްވެސް ވަނީ ފޮނުއްވާފައެވެ. އެ ސުވާލުގެ ޖަވާބުގައި މިނިސްޓަރ ވިދާޅުވީ ހައްޖުވެރިންގެ ކަންކަން ބެލެހެއްޓެވުމަށް ހައްޖު މިޝަންގައި ބައިވެރިވެވަޑައިގަތީ ފަސް ބޭފުޅުން ކަމަށެވެ. އެ ބޭފުޅުންނަށް ޚަރަދުވެފައިވަނީ ޖުމްލަ 1.07 މިލިއަން ރުފިޔާ ކަމަށެވެ.
ހައްޖު މިޝަނުގެ ބޭފުޅުންނަށް ކުރި ޚަރަދުގެ ތަފްސީލުވެސް މިނިސްޓަރ ވަނީ މަޖިލީހަށް ފޮނުއްވާފައެވެ. އެގޮތުން ދެކޮޅު ޓިކެޓަށް 148،278.72 ރުފިޔާ ޚަރަދުވިއިރު، 48 ދުވަހުގެ ހުރުމާއި ކެއުމަށް ޚަރަދުވެފައިވަނީ 762،364.80 ރުފިޔާއެވެ. އަދި ޕޮކެޓް މަނީގެ ގޮތުގައި 5 މީހުންނަށް 12،027.60 ރުފިޔާ ދީފައިވާއިރު، އިމަރޖެންސީ ހާލަތްތަކުގައި މައްސަލައެއް ދިމާވެއްޖެނަމަ ބޭނުން ކުރުމަށް ދޭ އިންސިޑެންޝަލް ޚަރަދުގެގޮތުގައި 154،200 ރުފިޔާ ހޭދަވެފައިވާކަންވެސް މިނިސްޓަރުގެ ޖަވާބުގައި ވަނީ ފާހަގަކުރައްވާފައެވެ.
ރާއްޖެއަށް މިއަހަރު ލިބިފައިވަނީ 453 ހައްޖު ކޯޓާއެވެ. މި ކޯޓާގައި މީހުން ހައްޖަށް ގެންދިއުމަށް ސަރުކާރުން ފުރުސަތު ދިނީ ހަމައެކަނި ހައްޖު ކޯޕަރޭޝަނަށެވެ. އޭގެ ތެރެއިން 100 ޖާގައަށް އާއްމުންގެ މެދުގައި ގުރުއަތު ނަގައިގެން މީހުން ހޮވާފައިވާއިރު، ބާކީ ހުރި ޖާގަތަކަށް މީހުން ނަގާފައިވަނީ ޙައްޖު ކޯޕަރޭޝަންގެ ކިއޫ ތަރުތީބުންނެވެ.
އިސްލާމިކް މިނިސްޓްރީން މަޖިލީހަށް ފޮނުވި ހިސާބުތައް ދައްކާގޮތުން، މިއަހަރު ހައްޖުގެ އަޅުކަމުގައި އެ ކޯޕަރޭޝަންގެ ފަރާތުން ބައިވެރިވެފައިވަނީ 417 މީހުންނެވެ.
