ސްރީ ލަންކާގެ މަޝްހޫރު ކްރިކެޓް ކުޅުންތެރިޔާ ދަނުޝްކާ ގުނަތަލިކާ ހައްޔަރުކޮށްފި ކަމަށް ބޭރުގެ މީޑިއާ ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން އުމުރުން 31 އަހަރުގެ ދަނުޝްކަ ހައްޔަރުކޮށްފައިވަނީ ރޭޕުގެ ތުހުމަތެއްގައެވެ. ހައްޔަރުކުރި އިރު ދަނުޝްކާ ހުރީ ލަންކާގެ ކްރިކްޓް ޤައުމީ ޓީމާއެކު އޮސްޓްރޭލިއާގައެވެ. އެއީ އެ ޤައުމުގައި މިހާރު ކުރިއަށްދާ ޓީ20 ވޯލްޑް ކަޕްގައި ވާދަކުރުމަށެވެ. ދަނުޝްކާގެ މައްޗަށް ކުރެވޭ ތުހުމަތުތަކާ ގުޅިގެން މައްސަލަ ތަހުގީގު ކުރުމަށް އޭނާ މިހާރު ހުރީ ހައްޔަރުކޮށް، ސިޑްނޭ ސިޓީގެ ފުލުހުންގެ ބެލުމުގެ ދަށުގައި ކަމަށް ވެސް ރިޕޯޓުތައް ބުނެއެވެ.
ލަންކާގެ ކްރިކެޓް ޓީމާ ހަވާލާދީ ރިޕޯޓުކޮށްފައިވާ ގޮތުން އޭނާ ހައްޔަރުކޮށް ތަހުގީގު ކުރިއަށްދެއެވެ. އެހެންވެ އެ ޓީމު އޮސްޓްރޭލިއާ އިން އެނބުރި ލަންކާ އަށް އައިއިރު އޭނާ ޓީމާއެކު އައިސްފައެއްނުވެއެވެ. މުބާރާތުގައި އިންގްލެންޑް އަތުން ބަލިވެ ލަންކާ އަށް ވަނީ މުބާރާތް ނިމިފައެވެ. މުބާރާތުގައި ދަނުޝްކާ ވަނީ ކުޅެފައެވެ. ނަމަވެސް މުބާރާތުގެ ވަކި ހިސާބަކުން އޭނާ އަށް ލިބުނު އަނިޔާއެއްގެ ސަބަބުން އިތުރަށް ކުޅެވޭ ގޮތެއް ނުވިއެވެ.
މީޑިއާތަކުގައި މިފަދައިން ރިޕޯޓުކޮށްފައިވާއިރު، ސައުތް ވޭލްސްގެ ފުލުހުން ވަނީ ލަންކާގެ ރައްޔިތަކު ހައްޔަރުކޮށްފައިކަމަށް ހާމަކޮށްފައެވެ. ނަމަވެސް ފުލުހުން ވަކި ނަމެއް ހާމަކޮށްފައެއްނުވެއެވެ. ރިޕޯޓުތައް ބުނާ ގޮތުން ދަނުޝްކާ ހައްޔަރުކުރީ އުމުރުން 29 އަހަރުގެ އަންހެނަކު ރޭޕް ކުރި ކަމުގެ ތުހުމަތުގައެވެ.
