ޕީޕީއެމްގެ ދާއިރާތަކުގެ އިންތިޚާބަށް މަރުހަބާ، މީގެ 5 އަހަރު ކުރިން މަންޒަރު ކިތަންމެހާވެސް ތަފާތު: ފައްޔާޒު

ހޮނިހިރު ދުވަހު ކުރިޔަށްދިޔަ އިދިކޮޅު ޕީޕީއެމް/ޕީއެންސީ ކޯލިޝަންގެ އެތެރޭގެ އިންތިޚާބަށް މަރުހަބާވިދާޅުވެ، މީގެ ފަސް އަހަރު ކުރިން ޕީޕީއެމުން ވެރިކަންކުރިއިރު މަންޒަރު ތަފާތުކަމަށް، އެމްޑީޕީގެ ޗެއާޕަރސަން ފައްޔާޒު އިސްމާއީލް ވިދާޅުވެއްޖެއެވެ.

އެ ކޯލިޝަންގެ 87 ދާއިރާގެ ވޯޓުލުން މާލެއާއި ބައެއް އަތޮޅުތަކުގައި ވަނީ ކުރިޔަށް ގެންގޮސްފައެވެ. އިދިކޮޅު ކޯލިޝަންގެ އިންތިޚާބާ ގުޅިގެން ފައްޔާޒު ކުރެއްވި ޓްވީޓެއްގައި ވިދާޅުވީ ސިޔާސީ މިފަދަ ހަރަކާތްތަކަށް މިއަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ފުލުހުން ފޮނުވައިގެން ނުހުއްޓުވާކަމީ މިހާރުއޮތް ސިޔާސީ މިނިވަންކަމުގެ ހެތްކެއްކަމަށެވެ. މީގެ 5 އަހަރު ކުރިން މަންޒަރު ކިތަންމެހާވެސް ތަފާތުކަމަށާއި، ވޯޓުފޮށި ބަލައި އޭރު އައީ ފުލުހުންކަމަށް ފައްޔާޒު ވިދާޅުވިއެވެ.

2018 ވަނަ އަހަރުގެ މެއި މަހުގެ ތެރޭގައި އެމްޑީޕީން ބޭއްވި ރިޔާސީ ޕްރައިމަރީގެ ވޯޓުލުން ކުރިއަށްދަނިކޮށް ފުލުހުން ވަނީ ވޯޓުލާ މަރުކަޒުތަކަށް ގޮސް ވޯޓު ފޮށިތައް ގެންގޮސްފައެވެ. މާލޭގެ އިތުރުން އަތޮޅުތަކުގައިވެސް ވޯޓުލުން ކުރިޔަށްދަނިކޮށް ފުލުހުން ވަނީ ވޯޓު ފޮށިތަކާއި ވޯޓު ކަރުދާސްތައް ގެންގޮސްފައެވެ. އެފަހަރު ފުލުހުން އެމްޑީޕީގެ ޕްރައިމަރީގެ ވޯޓުލުމަށް ހުރަސްއަޅާފައިވަނީ، ޖަލު ހުކުމެއް ތަންފީޒުކުރަމުން ގެންދާ މީހަކަށް ޕާޓީގެ ރިޔާސީ ޕްރައިމަރީއެއްގައި ވާދަކުރުމުގެ ފުރުސަތު ނުދޭނެކަމަށް އޭރު އޮތް ޕީޕީއެމް ސަރުކާރުން ބުނަމުންގޮހެވެ. އެމްޑީޕީގެ ޕްރައިމަރީގައި އެފަހަރު ވާދަކުރެއްވީ ރައީސް މުހައްމަދު ނަޝީދެވެ. ރައީސް ނަޝީދު އޭރު ގެންދެވީ ޖަލު ހުކުމެއް ތަންފީޒުކުރައްވަމުންނެވެ.

އިދިކޮޅު ޕީޕީއެމް/ޕީއެންސީ ކޯލިޝަންގެ އެތެރޭގެ އިންތިޚާބު ހޮނިހިރު ދުވަހު ކުރިޔަށްގެންގޮސްފައިވާއިރު އެމްޑީޕީގެ ބައެއް މެމްބަރުން ވަނީ އޭރުގެ ފޮޓޯތައް ސޯޝަލް މީޑިޔާއަށް ޕޯސްޓްކޮށް އެހަނދާތައް އައުކޮށްފައެވެ. އަދި މިހާރުގެ ސަރުކާރުން ސިޔާސީ ޕާޓީތަކުގެ މިފަދަ ހަރަކާތްތަކަށް ހުރަސް އަޅަމުންނުދާނެކަމަށް ބުނެ ޝުއޫރުތައް ފާޅުކޮށްފައިވެއެވެ.