އިންޑިޔާގައި ބްރިޖް ވެއްޓުނު ހާދިސާއާ ގުޅިގެން ފުލުހުން ނުވަ މީހަކު ހައްޔަރުކޮށްފި
މި ހާދިސާގައި 141 މީހުން މަރުވެފައިވޭ
އިންޑިޔާގެ ސަސްޕެންޝަން ބްރިޖެއް ވެއްޓިފައި
އިންޑިޔާގެ ގުޖްރާތު ސްޓޭޓްގައި ހިނގާފައި ހުރަސްކުރާ ބްރިޖެއް ވެއްޓި ސަތޭކައަށް ވުރެ ގިނަ މީހުން މަރުވި ހާދިސާއާ ގުޅިގެން ފުލުހުން ނުވަ މީހަކު ހައްޔަރުކޮށްފިއެވެ. މޯބީ ކިޔާ އަވަށުގައި އަޅާފައިވާ މި ބްރިޖް ވެއްޓުނު ހާދިސާގައި 141 މީހުން މަރުވެފައިވާކަން މިހާތަނަށް ޔަގީން ކުރެވިފައިވެއެވެ. އަދި ހަމަ އެ އަދަދަށް މީހުންނަށް އަނިޔާވެފައިވެއެވެ.
ފުލުހުން ހައްޔަރު ކުރި މީހުންގެ ތެރޭގައި ބްރިޖްގެ މެއިންޓެނަންސް ބެލެހެއްޓުމަށް ހަވާލުކޮށްފައިވާ ކުންފުނީގެ ހަތަރު މުވައްޒަފުން ވެސް ހިމެނެއެވެ.
ކޮންމެވެސް ސަބަބަކާހުރެ ބްރިޖްގެ ދެބައި ވަކިވެ އެއްބައި ކޯރުތެރެ އަށް އެލިގެންދިޔަ އިރު ބްރިޖް މަތީގައި އެތައްސަތޭކަ މީހުން ތިބި ކަމަށް ޚަބަރުތައް ބުނެއެވެ. އަދި ބްރިޖް ވެއްޓުމާ އެކު އަނދިރީގައި އެމީހުން އެހީއަށް އެދި ހަޅޭއްލަވާ ތިބި ހާލު، ކޯރު ތެރެ އަށް ވެއްޓި ގިނަ ބަޔަކު ގެނބިފައިވެއެވެ.
މަރުވި މީހުންގެ ތެރޭގައި އަންހެނުންނާއި ކުޑަކުދިން އަދި އުމުރުން ދުވަސްވީ މީހުން ގިނަކަމަށް ޚަބަރު ލިބެއެވެ.
އާދީއްތަ ދުވަހުގެ ރޭ ހިނގި މި ހާދިސާ ތަހުގީގު ކުރަމުންދާ ފުލުހުން ބުނި ގޮތުގައި ހައްޔަރުކުރި އެންމެންނަކީ ވެސް ބަރިޖްގެ މެއިންޓެނަންސް ބަލަހައްޓާ ބްރިޖުގެ ކަންކަން ބެލެހެއްޓުމަށް ހަވާލުކޮށްފައިވާ އޮރީވާ ގްރޫޕާ ގުޅުން ހުރި މީހުންނެވެ.
ވެއްޓުނު ސަސްޕެންޝަން ބްރިޖަކީ މީގެ 140 އަހަރު ކުރިން ފުރަތަމަ އެޅި ބްރިޖެއް ކަމަށް ވެއެވެ. ބްރިޖް ބާވެ ވީރާނާ ވަމުންދާތީ މަރާމާތަށް ބަންދުކޮށްފައި ބޭއްވުމަށް ފަހު ހުޅުވިތާ އަދި ވިމީ ހަފްތާއެއްހާ ދުވަހެވެ.
