އުދައްޔުގެ މަރުގެ މައްސަލައިގައި ހިމެނޭ ކުޑަކުއްޖާއަށް 25 އަހަރާއި 5 މަހުގެ ބަންދުގެ ހުކުމެއް
ވާރިސުންނަށް އެއް މިލިއަން ރުފިޔާ ދިނުމަށް ހުކުމް ކުރި
ޖުވެނައިލް ކޯޓް
ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ކުޑަކުއްޖާގެ މައްޗަށް ކުށް ސާބިތުވެފައިވާތީ ހޯމަ ދުވަހު ހުކުމް ކޮށްފިއެވެ.
މި މައްސަލައިގައި ކުއްޖާގެ މައްޗަށް އުފުލާފައިވާ ދައުވާތައް ސާބިތުވެފައިވާ ކަމަށް ޖުވެނައިލް ކޯޓުން ކަނޑައަޅާފައިވަނީ 14 ސެޕްޓެމްބަރު 2022ގައެވެ. ހޯމަ ދުވަހު އެ މައްސަލައިގައި ކުއްޖާގެ މައްޗަށް އަދަބު ކަނޑައަޅާފައިވާއިރު ގަސްދުގައި މީހަކު މެރުމުގެ ކުށުމުގެ ދައުވާއާ ގުޅިގެން 18 އަހަރާއި ނުވަމަހަށް ކުޑަކުދިން ބަންދު ކުރާ މަރުކަޒެއްގައި އޭނާ ބަންދުކުރުމަށް ވަނީ ހުކުމް ކޮށްފައެވެ.
މީގެ އިތުރުން މަރުގެ ދިޔައިގެ ގޮތުގައި 31 އޮކްޓޯބަރު 2022 އިން ފެށިގެން އެއް އަހަރު ދުވަހުގެ ތެރޭގައި އުދައްޔުގެ ވާރިސުންނަށް އެއް މިލިއަން ރުފިޔާ ދިނުމަށާއި ކައްފާރާގެ ގޮތުގައި ވިދިވިދިގެން ދެ މަސްދުވަހު ރޯދަ ހިފުމަށް ވެސް ވަނީ އަންގާފައެވެ.
މި މައްސަލައިގައި އޭނާގެ މައްޗަށް އުފުލާފައިވާ މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާ ސާބިތުވެ ކޯޓުން ވަނީ ހަ އަހަރާއި އަށް މަސް ދުވަހު ކުޑަކުދިން ބަންދު ކުރާ މަރުކަޒެއްގައި ބަންދު ކުރުމަށް ހުކުމް ކޮށްފައެވެ. އެހެންކަމުން، އޭނާ ބަންދުގައި ޖުމްލަ 25 އަހަރާއި ފަސް މަސް ދުވަސް ހޭދަ ކުރަން ޖެހޭނެއެވެ.
މި މައްސަލައިގައި ހިމެނޭ އަހުމަދު ޝަމީމް އާއި ޝަރަފު ރަޝީދާއި މުޙައްމަދު މާޒިންގެ މައްޗަށް ކްރިމިނަލް ކޯޓަށް ހުށަހެޅި، ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާއާއި މީހަކަށް ނުރައްކާތެރި ހާނީއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވިކަމުގެ އަޑުއެހުންތައް ދަނީ ކުރިއަށެވެ. މިހާރު ކުރިއަށްދަނީ ހެކިބަސް ނެގުމުގެ މަސައްކަތެވެ.
8 ފެބުރުވަރީ 2021 ދުވަހުގެރޭ ގއ. މާމެންދޫގައި، ހިންގި މާރާމާރީގައި، އުދައްޔުއާއި އޭނާގެ ބޭބެ ފިރުޝާން ޒާހިރުއަށް ޖިސްމާނީގޮތުން ބޮޑެތި އަނިޔާތަކެއް ލިބިފައިވެއެވެ. އެ ޒަޚަމްތަކަށް ފަރުވާ ދެމުން ދަނިކޮށް އުދައްޔު މަރުވެފައިވާއިރު، އިންޑިއާއަށް ފޮނުވައިގެން އޭނާގެ ޕޯސްޓްމޯޓަމް ވެސް ވަނީ ހަދައިފައެވެ.
