ކުއްޔަށް އުޅޭ މީހުންގެ ނަމަށް ފެނާއި ކަރަންޓު ބިލު ކުރެވޭގޮތަށް ގެނައި އިސްލާހު، ރައީސް ތަސްދީގު ކުރައްވައިފި
31 އޮކްޓޯބަރު 2022 | ހޯމަ 11:59ގޭގެ ވެރިފަރާތުގެ ނަމުގައި ރެޖިސްޓްރީކޮށްފައި ހުރުމަކީ ދިމާވާ ވަރަށް ބޮޑު ގޮންޖެހުމެއް ކަމަށް ޔުޓިލިޓީ ކުންފުނިތަކުން ބުނޭ
ރައީސް، ޔުޓިލިޓީ ގާނޫނަށް ގެނައި އިސްލާގު ތަސްދީގު ކުރައްވަނީ
ކުއްޔަށް ދީފައިވާ ތަންތަނުގެ ފެނާއި ކަރަންޓު، އެތަނެއް ކުއްޔަށް ހިފައިގެން އުޅޭ ފަރާތަށް ބިލުކުރެވޭގޮތަށް ޤާނޫނަށް ގެނައި އިޞްލާހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަސްދީޤްކުރައްވައިފިއެވެ.
ހޯމަ ދުވަހު ތަސްދީގު ކުރެއްވި ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނަށް ގެނެސްފައިވާ އިސްލާހަކީ ޢާންމު ބޭނުންތަކުގެ ޚިދުމަތްތަކުން ބިލުކުރުމާގުޅޭ ގަވާއިދު ހެދުމާ ގުޅޭ މާއްދާއެއް އިތުރުކުރުމަށް ގެނައި އިސްލާހެކެވެ. މި އިސްލާހުގައި ވާގޮތުން އާންމު ބޭނުންތަކުގެ ޚިދުމަތްތައް ފޯރުކޮށްދޭ ފަރާތްތަކުން ޚިދުމަތް ލިބިގަންނަ ފަރާތްތަކަށް އެ ޚިދުމަތްތަކާ ގުޅޭގޮތުން ބިލުކުރުމުގައި ޢަމަލުކުރަންވީ މައިގަނޑު އުސޫލުތައް ބަޔާންކުރާ ގަވާއިދެއް، ޢާންމު ބޭނުންތަކުގެ ޚިދުމަތްތައް ފޯރުކޮށްދޭ ފަރާތްތަކުގެ މަޝްވަރާއާއެކު، އޮތޯރިޓީން އެކުލަވާލަން ޖެހޭނެއެވެ.
މީގެ އިތުރުން ބިލު ނުދެއްކުމުގެ ސަބަބުން ހިނގާ ޖޫރިމަނާ ކަނޑައެޅުމުގެ އުސޫލުތަކާއި، ބިލު ނުދެއްކުމުގެ ސަބަބުން ޚިދުމަތް މެދުކަނޑާލަންޖެހޭ ހާލަތްތަކަކީ ކޮބައިކަން ކަނޑައެޅުމާއި، އެފަދަ ހާލަތެއް މެދުވެރިވެއްޖެނަމަ އެ ހާލަތުތަކުގައި ކޮންމެހެން އަމަލުކުރަންޖެހޭ އިޖުރާއަތުތައް ކަނޑައެޅުން ވެސް މި އިސްލާހުގެ ތެރޭގައި ހިމެނެއެވެ.
ރައީސް ތަސްދީގުކުރެއްވި ބިލުގައި، ފެނާއި ކަރަންޓުފަދަ އާންމު ބޭނުންތަކުގެ ޚިދުމަތްތަކުގެ ތެރެއިން މީޓަރު މެދުވެރިކޮށް ދޭ ޚިދުމަތްތަކުގައި މީޓަރު ރަޖިސްޓްރީކޮށްފައި ހުންނަންވާނީ އިމާރާތުގެ ވެރިފަރާތުގެ ނަމުގައި ކަމަށްވީ ނަމަވެސް، އެ ޚިދުމަތް ބޭނުންކުރަނީ މީޓަރު ރަޖިސްޓްރީކޮށްފައިވާ ފަރާތުން ނޫންނަމަ، އެ ޚިދުމަތް ބޭނުންކުރާ ފަރާތެއްގެ ނަމުގައި ރަޖިސްޓްރީ ކުރެވޭނެ ކަމަށް ވަނީ ބުނެފައެވެ.
މި ބިލަކީ، މި އަހަރުގެ އޮކްޓޫބަރު 17 ވީ ހޯމަ ދުވަހު ބޭއްވި ރައްޔިތުންގެ މަޖިލީހުގެ 2022 ވަނަ އަހަރުގެ ތިންވަނަ ދައުރުގެ 24 ވަނަ ޖަލްސާއިން ފާސްކުރި ބިލެކެވެ.
މި އިސްލާހު ފާސްކުރުމަށް މަޖިލީހުގެ ކޮމިޓީގައި މަޝްވަރާ ކުރުމުގެ މަރުހަލާގައި ޔުޓިލިޓީ ކުންފުނިތަކުން ވަނީ ގޭގެ ވެރިފަރާތުގެ ނަމުގައި ރެޖިސްޓްރީކޮށްފައި ހުރުމަކީ ދިމާވާ ވަރަށް ބޮޑު ގޮންޖެހުމެއް ކަމަށް ބުނެފައެވެ. އެގޮތުން، ބިލް ނުދައްކައިފި ނަމަ ވެރި ފަރާތުން ޒިންމާ ވާގޮތަށް އޮތުމުން، ބިލް ނުދައްކާ ފަރާތްތަކާއި މެދު ފިޔަވަޅު އެޅުމަށް ދަތިވާކަމަށާއި ސަބްސިޑީ ދޭން ޖެހޭ ފަރާތްތަކަށް ސަބްސިޑީ ދިނުމުގައި ވެސް އެކަމުގެ ސަބަބުން ދަތިތަކާއި ދިމާވާކަމަށް ކުންފުނިތަކުން ވަނީ ބުނެފައެވެ.
