ހޮޅުދޫ މަގުތަކުގައި ތާރު އަޅަން 71 މިލިއަން ރުފިޔާއަށް އާރުޑީސީއަށް
31 އޮކްޓޯބަރު 2022 | ހޯމަ 11:45މި މަޝްރޫއު ހަވާލުކޮށްފައިވަނީ 71 މިލިއަން ރުފިޔާއަށް
އާރުޑީސީ އާއި ޕްލޭނިންގ މިނިސްޓްރީއާ ދެމެދު އެއްބަސްވުމުގައި ސޮއި ކުރުން
ނ. ހޮޅުދޫ މަގުތަކުގައި ތާރު އެޅުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކޮށްފިއެވެ.
ހޯމަ ދުވަހު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތެއްގައި އާރުޑީސީގެ ފަރާތުން މި އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރު މޫސާ އަލީ މަނިކުއެވެ. އަދި ޕްލޭނިންގ މިނިސްޓްރީގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް ފާތިމަތި ޝާނާ ފާރޫގެވެ.
މި މަޝްރޫއުގެ ދަށުން އާރުޑީސީން ހޮޅުދޫގެ 4.3 ކިލޯ މީޓަރުގެ މަގުގައި ތާރު އަޅާނެއެވެ. އަދި މަގުތަކުގައި ފެން ހިންދާ ނިޒާމު ގާއިމް ކުރުމާއި މަގުބައްތި ޖެހުމުގެ މަސައްކަތް ވެސް މި މަޝްރޫއުގެ ދަށުން ކުރާނެއެވެ.
މި މަޝްރޫއުގެ މަސައްކަތް އާރުޑީސީއާ ހަވާލުކޮށްފައިވަނީ 71،089،120.65 (ހަތްދިހަ އެއް މިލިއަން އައްޑިހަ ނުވަ ހާސް އެއް ސަތޭކަ ވިހި ރުފިޔާ ފަސްދޮލަސް ފަސް ލާރި) އަށެވެ.
ހޮޅުދޫ މަގު ހެދުމުގެ މަސައްކަތް ނިންމަން އާރުޑީސީއަށް ދީފައިވަނީ 450 ދުވަހުގެ މުއްދަތެކެވެ.
