ނަފްސު މުރާޖައާކުރުމާއި ގުޅުން މުރާޖައާކުރުމަކީ މުހިންމު ކަމެއް ކަމަށް އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވިދާޅުވެއްޖެއެވެ.
ރާއްޖެ އިސްލާމްވި ދުވަހުގެ ރަސްމީ ޖަލްސާގައި "ދިވެހިރާއްޖޭގައި އިސްލާމްދީން" މި މައުޟޫއަށް ވާހަކަފުޅުދައްކަވަމުން މިނިސްޓަރ ވިދާޅުވީ، އިސްލާމްދީނާމެދު ފިކުރުކޮށް، ދީން އުނގަންނައިދެނީ ކޮންކަހަލަ ކަންތައްތަކެއްތޯ ބެލުމަކީ މުހިންމު ކަމެއް ކަމަށެވެ.
ނަފްސާ ދޭތެރޭ، ވިސްނައި އަމަލުތައް ހުންނަނީ ރަނގަޅަށްތޯ ބަލަންޖެހޭކަމަށާއި، އަޅުކަމަށް ސަމާލުކަން ދޭންޖެހޭ ކަމަށްވެސް މިނިސްޓަރ ވިދާޅުވިއެވެ.
ކީރިތި ރަސޫލާ، ރަސޫލުކަމާއިގެން ވަޑައިގެންނެވި ދުވަސްވަރަކީ ޖާހިލިއްޔަތުކަން ވަރަށް ބޮޑަށް ފެތުރިފައިވާ ދުވަސްވަރެއްކަމަށް އެމަނިކުފާނު ވިދާޅުވިއެވެ. އޭރު ބާރުގަދަ މީހުން ނިކަމެތިންގެ ހައްގުތަކަށް އަރައިގަތުމަކީ އާންމު ކަމެއް ކަމަށްވެސް ވިދާޅުވިއެވެ.
ރަސޫލާ މީސްތަކުންނަށް އިސްލާމްދީނަށް ދައުވަތު ދެއްވުމުން އެއްބައި މީހުން އެކަން ގަބޫލުކޮށް، އަނެއްބައި މީހުން އެ ދައުވަތު ގަބޫލުނުކުރާކަމަށް ވިދާޅުވިއެވެ. ހުރިހާ އެންމެންނަކީ އަޚުންތަކެއްކަން ރަސޫލާ އެންމެންނަށްވެސް ހާމަކުރެއްވިކަމަށް މިނިސްޓަރ ވިދާޅުވިއެވެ.
"އެއް މުއުމިނަކީ އަނެއް މުއުމިނެއްގެ މޫނު ބަލާ ލޯގަނޑު"ކަމަށް ރަސޫލާ ސިފަފުޅުކުރެއްވި ކަމަށްވެސް ވިދާޅުވިއެވެ. އެކަމުންވެސް ވަރަށް ބޮޑު އިބުރަތެއް ލިބިގެންދާނެކަމަށް ވިދާޅުވިއެވެ.
ރަސޫލާ ގެންނެވި ރިސާލަތު ރާއްޖެއަށް އައުމުން އޭރު އެމީހުންގެ އުޅުމަށްވެސް ބަދަލު އައިކަން ލިޔެކިޔުންތަކުން ފެންނަން އެބައޮތްކަމަށް ވިދާޅުވިއެވެ.
އަޚުވަތްތެރިކަމުގެ ލޯތްބާއި އެއްބައިވަންތަކަން އެއީ މާތްﷲ ގެ ކަލިމަ ގަބޫލުކުރުމުން އަންނަ ސިފަތައް ކަމަށާއި، އެއީ އިސްލާމްދީން ދަސްކޮށްދޭ ކަންތައްތައްކަމަށް ވިދާޅުވިއެވެ.
ކޮންމެ މީހަކީވެސް ތަފާތު ވިސްނުމާއި ފިކުރު ހުންނަ މީހެއްކަމަށާއި، އެކަމަށް އިހުތިރާމް ކުރަންޖެހޭ ކަމަށް ވިދާޅުވިއެވެ. ރަސޫލާގެ ހަޔާތްޕުޅަށް ބެލިކަމުގައިވީނަމަވެސް، ޚިޔާލު ތަފާތުވުންތައް އޮތްކަމަށާއި، ނަމަވެސް އެކަކު އަނެކަކުގެ ޚިޔާލުތަފާތުވުންތަކަށް އޭރު އިހުތިރާމްކުރި ކަމަށް ވިދާޅުވިއެވެ.
އިސްލާމްދީނުގައި އަންގަވާފައިވާ ގޮތަށް އަޅުގަނޑުމެން އެންމެންގެ އަމަލުތައް ބައްޓަންކުރަންޖެހޭ ކަމަށްވެސް ވިދާޅުވިއެވެ. އަދި އެކަކު އަނެކަކާ މުއާމަލާތުކުރުމުގައިވެސް ރިވެތި އުސޫލުތައް ގެންގުޅުމަށް މިނިސްޓަރ ނަސޭހަތްތެރިވެވަޑައިގެންނެވިއެވެ.
