އަމާޒަކީ ވޯލްޑް އިމިގްރޭޝަން އޯގަނައިޒޭޝަނެއް އުފެއްދުން: ކޮންޓްރޯލާ ޖެނެރަލް
މިއީ ރާއްޖޭގައި ބޭއްވި ފުރަތަމަ ބޯޑާ ސެކިއުރިޓީ ސިމްޕޯޒިއަމް
ކޮންޓްރޯލާ ޖެނެރަލް
އަމާޒަކީ ވޯލްޑް އިމިގްރޭޝަން އޯގަނައިޒޭޝަނެއް އުފެއްދުން ކަމަށް ރާއްޖޭގެ ކޮންޓްރޯލަރ ޖެނެރަލް މުޙައްމަދު އަހުމަދު ހުސައިން (ހަނަފީ) ވިދާޅުވެއްޖެއެވެ.
ކޮންޓްރޯލަރ މިފަދައިން ވިދާޅުވީ ރާއްޖޭގެ ބޯޑާ ބެލެހެއްޓުމުގައި ދިމާވާ މައްސަލަތަކާ ގުޅޭގޮތުން ކަމާބެހޭ އިދާރާތަކުން މަޝްވަރާ ކުރުމަށް ބޭއްވި "މޯލްޑިވްސް ބޯޑަރ ސެކިއުރިޓީ ސިމްޕޯޒިއަމް" ނިންމުމުގެ ރަސްމިއްޔާތަށްފަހު މީޑިއާތަކަށް މައުލޫމާތު ދެއްވަމުންނެވެ. މި ސިމްޕޯޒިއަމްއަކީ ބޯޑަރ ސެކިއުރިޓީއާ ގުޅޭގޮތުން ރާއްޖޭގައި ބޭއްވި މިފަދަ ފުރަތަމަ ސިމްޕޯޒިއަމްއެވެ.
އަންގާރަ ދުވަހާއި ބުދަ ދުވަހު ކުރިއަށްގެންދިޔަ މި ސިމްޕޯޒިއަމްގައި އިމިގްރޭޝަނާއި މޯލްޑިވްސް ޑިފެންސް ފޯސް (އެމްއެންޑީއެފް) އާއި ފުލުހުންނާއި ކަސްޓަމްސް އަދި އޭވިއޭޝަން ސެކިއުރިޓީ ކޮމާންޑުގެ ބައިވެރިވިއެވެ. އަދި ބައިނަލްއަގުވާމީ ޖަމިއްޔާތަށް ކަމަށްވާ އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އާއި އދ. ގެ ޑްރަގް އެންޑް ކްރައިމް އޮފީސް (ޔޫއެންއޯޑީސީ)ގެ އޮފިޝަލުން ވެސް މި ސިމްޕޯޒިއަމްގައި ބައިވެރިވިއެވެ.
ސިމްޕޯޒިއަމް ނިންމުމުގެ ރަސްމިއްޔާތުގައި ކޮންޓްރޯލަރ ޖެނެރަލް ވިދާޅުވީ ބޯޑަރ ސެކިއުރިޓީ ދާއިރާގައި މިހާރު ހުރި މައްސަލަތަކާއި އެކަންކަން ހައްލު ކުރަން ކުރެވޭނެ ކަންކަމާ ގުޅޭ ގޮތުން މަޝްވަރާ ކޮށްފައިވާ ކަމަށެވެ. މި މަޝްވަރާތަކުގައި ކުރިން ނޭނގޭ ގިނަ ކަންކަން ދެނެގަނެވިފައިވާ ކަމަށާއި އެކަންކަމަށް ހައްލުތައް ވެސް ހުށަހެޅިގެންދިޔަ ކަމަށް އޭނާ ވިދާޅުވިއެވެ.
މި ސިމްޕޯޒިއަމްގައި އެކި އިދާރާތަކުން ފާހަގަކުރި ކަންކަން ހިމަނައިގެން ރިޕޯޓެއް ތައްޔާރު ކުރުމަށް ވަނީ ހަމަޖެހިފައެވެ. މި ރިޕޯޓު ޕޮލިސީ ލެވެލްގައި ތަންފީޒު ކުރެވޭނެ ކަމަށް ވެސް ކޮންޓްރޯލާ ޖެނެރަލް ވިދާޅުވިއެވެ.
ކޮންމެ އަހަރަކު ބޮޑަރ ސެކިއުރިޓީއާ ގުޅުންހުރި އެކި އިދާރާތަކުން އިސްނަގައިގެން މި ސިމްޕޯޒިއަމް ބާއްވަން ދައުވަތު ދެއްވަމުން ކޮންޓްރޯލާ ވިދާޅުވީ އަންނަ އަހަރުގެ ސިމްޕޯޒިއަމް ފަށަންވާއިރަށް މިއަހަރުގެ ސިމްޕޯޒިއަމްގައި ފާހަގަކުރެވުނު ކަންކަން ހައްލު ކުރުމަށް މަސައްކަތް ކުރައްވާނެ ކަމަށެވެ.
ކޮންޓްރޯލަރ ވިދާޅުވީ މި ސިމްޕޯޒިއަމްއަކީ ބޯޑަރ ސެކިއުރިޓީ ހަރުދަނާ ކުރުމަށް ކުރަމުން އަންނަ މަސައްކަތުގެ ފެށުމެއް ކަމަށެވެ. އެ މަސައްކަތުގެ އެންމެ ފަހުގެ މަންޒިލަކީ ވޯލްޑް އިމިގްރޭޝަން އޯގަނައިޒޭޝަނެއް އުފެއްދުން ކަމަށް ވެސް އޭނާ ވިދާޅުވިއެވެ.
ސިމްޕޯޒިއަމް ނިންމުމުގެ ރަސްމިއްޔާތުގައި އެ ސިމްޕޯޒިއަމްގައި ބައިވެރިވި ފަރާތްތަކަށް ވަނީ ސެޓްފިކެޓް ހަވާލުކޮށްފައެވެ. މި ސެޓްފިކެޓްތައް ހަވާލުކޮށްދެއްވީ ޖަޕާނު ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރި އާއި ޑިފެންސް މިނިސްޓްރީގެ ޑެޕިއުޓީ މިނިސްޓަރު ޙަސަން ޒަމީލްއެވެ.
