މޮޅު ކުޅުމަކާއެކު ޓޮޓެންހަމް ބަލިކޮށް, މެންޗެސްޓަރ ޔުނައިޓެޑް ޕްރިމިއަރ ލީގު ތާވަލުގެ ފަސްވަނައަށް ޖެހިލައިފިއެވެ.

ޔުނައިޓެޑްގެ އޯލްޑް ޓްރެފޯޑް ސްޓޭޑިއަމްގައި ބުދަ ދުވަހުގެރޭ ކުޅުނު މެޗު އެޓީމުން ކާމިޔާބުކުރީ 2-0ންނެވެ. މީގެ ތިން ދުވަސް ކުރިން ޔުނައިޓެޑްގެ ދަނޑުގައި ނިއުކާސަލްއާއި ބައްދަލުކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ނަމަވެސް އެމެޗުގެ ހިތްދަތިކަން ޔުނައިޓެޑުން ފިލުވާލީ ޓޮޓެންހަމާއި ދެކޮޅަށް މޮޅު ކުޅުމެއް ކުޅެގެންނެވެ. މިއީ އެރިކް ޓެން ހާގް ޔުނައިޓެޑްގެ ކޯޗުކަމާއި ހަވާލުވިފަހުން އެޓީމުން އެންމެ ރަނގަޅަށް ކުޅުނު މެޗެވެ.

ޔުނައިޓެޑުން ގިނަ ހަމަލާތަކެއް އުފެއްދި މި މެޗުގައި އެޓީމަށް ލީޑު ނަގައިދިނީ ބްރެޒިލްގެ ފްރެޑްއެވެ. މެޗުގެ 47 ވަނަ މިނެޓުގައި ޖޭޑަން ސަންޗޯ ފަހިކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ 69 ވަނަ މިނެޓުގައި ޔުނައިޓެޑުގެ ދެވަނަ ލަނޑު ޖެހީ ބްރޫނޯ ފެނާންޑޭޒްއެވެ.

ޔުނައިޓެޑުން މޮޅު ކުޅުމެއް ދެއްކި މި މެޗުގައި ޓީމުގެ ތަރި ކްރިސްޓިއާނޯ ރޮނާލްޑޯއަށް ފުރުސަތު ނުދެއެވެ. މިފަހުން ޕްރިމިއަރ ލީގުގައި ޔުނައިޓެޑް ކުޅުނު ގިނަ މެޗުތަކުގައި ޓީމުގެ ފުރަތަމަ އެގާރާގައި ރޮނާލްޑޯ ނުހިމަނައެވެ.

މި މޮޅާއެކު ތާވަލުގެ ފަސްވަނާގައި ޔުނައިޓެޑް އޮތީ 10 މެޗުން 19 ޕޮއިންޓު ހޯދައިގެންނެވެ. މެޗުން ބަލިވި ޓޮޓެންހަމް ތާވަލުގެ ތިންވަނާގައި އޮތީ 11 މެޗުން 23 ޕޮއިންޓު ހޯދައިގެންނެވެ. އެއްވަނާގައި އޮތް އާސެނަލްއަށް 10 މެޗުން ލިބެނީ 27 ޕޮއިންޓެވެ.