ހާލަތުގެ ޝިކާރައަކަށް ނުވެ، ސަލާމަތުގެ ރާސްތާއެއްގައި ދަތުރު ކުރަން ބޭނުންވަނީ ތަނަވަސް ސިކުނޑިއެއް!

މިޞްރުގެ މުދައްރިސް ދުއްވަމުން އެދަނީ އެންމެ ޒަމާނީ، މޮޑެލް ވައި ޓެސްލާއަކަށް ނުވެދާނެއެވެ. ނަމަވެސް އޭނާގެ ބިނާކުރަނިވި ތަނަވަސް ޚިޔާލުގެ އެހީގައި އޭނާ އެވަނީ މީގެ ކުރިން ތެޔޮ ބޭނުންކޮށްގެން ދުއްވި، 1985ގެ ފީއަޓް-127 ކާރު، އިލެކްޓްރިކް ކާރަކަށް ބަދަލު ކޮށްފައެވެ.

ބޮޑުވަމުން ދާ ތެލުގެ ޚަރަދުތަކުން ސަލާމަތްވެ، ޖީބަށް ލުޔެއް ހޯދުމުގެ އިތުރުން، ދަތުރުފަތުރު ކޮށް އުޅުމުގައި، އަދަށްވުރެ ތިމާވެއްޓާ ރައްޓެހި ގޮތެއް އިޚްތިޔާރު ކުރުމުގެ މަޤްޞަދުގައެވެ.

ޢުމުރުން 51 އަހަރުގެ ޢަލީ އަލް-ސަޢީދު، އެހެން މީހަކު ބޭނުންކޮށްފައިވާ ފީއަޓް-127 މޮޑެލްގެ ކާރެއް ގަތީ މީގެ ދޮޅު އަހަރެއްހާ ދުވަސް ކުރިންނެވެ. އެންމެ 10000 މިޞްރު ޕައުންޑް ނުވަތަ ގާތްގަނޑަކަށް 510 ޑޮލަރަށެވެ. މައިގަނޑު ސަބަބަކަށް ވީ، އުފުލެމުންދިޔަ ތެލުގެ އަގުތަކަށް ޚަރަދުކޮށްގެން ދެކޮޅު ޖައްސަން އިންތިހާއަށް ދަތިވުމެވެ.

ކާރުގައި ހަރުކުރާނެ އިލެކްޓްރިކް ބެޓެރިއެއް ގަތީ، ކާރުގެ އަސްލު އަގުގެ 6 ގުނަ ބޮޑުކޮށެވެ. ނަމަވެސް ސަޢީދު ޤަބޫލު ކުރާ ގޮތުގައި އެއީ ހަމަ އެންމެ ރަނގަޅު އިންވެސްޓްމަންޓްއެކެވެ.

މިއަދު 100 ކިލޯމީޓަރަށް ދުއްވުމަށް އޭނާގެ ކާރު ބެޓެރީ ޗާޖު ކުރުމަށް ސަޢީދުގެ ޖީބުން ޚަރަދު ވަނީ 10 މިޞްރު ޕައުންޑް ނުވަތަ 0.5 ޑޮލަރެވެ. ސަޢީދު، އޭނާގެ އިލެކްޓްރިކް ކާރު ޗާޖު ކުރަނީ ހަފުތާއަކު 1 ފަހަރުއެވެ.

ކައިރި މާޒީގައި ފާއިތުވެ ދިޔަ އަހަރުތަކަށް ބަލާއިރު މިޞްރުން ވަނީ ތެލުގެ އުފެއްދުންތަކަށް ދެމުން ދިޔަ ސަބްސިޑީޒްގެ ބޮޑު ބައެއް ކަނޑާލާފައެވެ. ބައިނަލްއަޤުވާމީ މާލީ އިދާރާ (އައިއެމްއެފް)ގެ އިސްލާހީ އެޖެންޑާގެ ދަށުން އެޅަމުންދާ ފިޔަވަޅުތަކުގެ ބައެއްގެ ގޮތުގައެވެ. މިދިޔަ ޖުލައި މަހުވެސް މިޞްރުން ވަނީ އެ ޤައުމުގެ ބާޒާރުތަކުގައި ވިއްކަމުން ދިޔަ ތެލުގެ އަގުތައް، 0.50 މިޞްރު ޕައުންޑުން އުފުލާފައެވެ. ނަތީޖާއެއްގެ ގޮތުން މިޞްރުގެ ބާޒާރުގައި ތަކެތީގެ އަގުތައް އުފުލެމުންދާ ނިސްބަތް، ނުވަތަ އިންފްލޭޝަނަށް ކުރާ ބާރު ވަނީ ބޮޑުވެފައެވެ.