އެމެރިކާގެ ރައީސް ޖޯ ބައިޑަން އުޅުއްވަނީ އީރާނުގައި ބިރުވެރިކަމާއި ނުތަނަވަސްކަމާއި ހަމަނުޖެހުން އުފައްދަވަން ކަމަށް އެ ޤައުމުގެ ރައީސް އިބްރާހިމް ރައީސީ ވިދާޅުވެއްޖެއެވެ.

ރައީސީ މިފަދައިން ވިދާޅުވީ ހޮނިހިރު ދުވަހު އެ ޤައުމުގެ ވެރިރަށް ތެހްރާންގެ އެވިން ޖަލުގައި ހިނގި އަލުފާނުގެ ހާދިސާއާ ގުޅޭ ގޮތުން ބައިޑަން ކުރެއްވި ކޮމެންޓަކަށް ރައްދު ދެއްވަމުންނެވެ. އެ ހާދިސާއާ ގުޅިގެން ބައިޑަން ވިދާޅުވީ އީރާންގައި މުޒާހަރާ ކުރާ ރައްޔިތުން ދައްކަމުން އަންނަ ހިތްވަރު ފެނި ހައިރާންވެވަޑައިގަންނަވާ ކަމަށެވެ.

މި ކޮމެންޓާ ގުޅިގެން ރައީސީ ވިދާޅުވީ އެމެރިކާއިން އެ ޤައުމުގެ ދާޚިލީ ކަންކަމަށް ވަދެގެންފައިވާ ކަމަށެވެ. އަދި އެ ޤައުމުގެ ކުރީގެ ލީޑަރު އާޔަތުﷲ ޚާމަނާއީ، އެމެރިކާއަކީ ޝައިތާނު ކަމަށް ވިދާޅުވި ބަސްފުޅުތައް މިއަދު ހަނދުމަފުޅުވާ ކަމަށް ރައީސީ ވިދާޅުވިއެވެ.

އީރާނުގައި މިހާރު މުޒާހަރާތައް ކުރިއަށްދަނީ އެ ޤައުމުގެ ފުލުހުންގެ ބެލުމުގެ ދަށުގައި ހުއްޓައި އަންހެނަކު މަރުވުމާ ގުޅިގެންނެވެ. އޭނާ ހައްޔަރުކުރީ މިންގަނޑާ ޚިލާފަށް ބުރުގާ އަޅައިގެން އުޅުމުންނެވެ. އޭނާ މަރުވީ ފުލުހުން ދިން އަނިޔާތަކުގެ ސަބަބުން ކަމަށް އޭނާގެ އާއިލާއިން ވަނީ ތުހުމަތުކޮށްފައެވެ.

މުޒާހަރާތަކުގައި މިހާތަނަށް 240 އަށްވުރެ ގިނަ މީހުން މަރުވެފައިވާއިރު މީގެ ތެރޭގައި 18 އަހަރު ނުވާ 32 ކުދިން ހިމެނެއެވެ. އަދި 8000 އަށްވުރެ ގިނަ މީހުން ވަނީ ހައްޔަރު ކޮށްފައެވެ.

އީރާނުގައި ކުރިއަށްދާ މުޒާހަރާތަކަށް ބައިޑަން ގެންދަވަނީ ތާއީދު ކުރައްވަމުންނެވެ. މީގެ ކުރިންވެސް އެމަނިކުފާނު ވަނީ އީރާނަކީ ޙައްގުތައް ހިފަހައްޓާ ޤައުމެއް ކަމަށްބުނެ ރައްޔިތުން އަމިއްލައަށް މިނިވަންކަން ހޯދުމަށް ގޮވާލައްވާފައެވެ.