އީރާންގެ މަޝްހޫރު ޖަލެއްގައި ހޮނިހިރު ދުވަހު އަލިފާނުގެ ހާދިސާއެއް ހިނގައިފިއެވެ. އެ ތަނަކީ ހައްޔަރު ކުރެވޭ ސިޔާސީ ކުށްވެރިންނާއި ނޫސްވެރިން އަދި ބޭރު ގައުމުތަކުގެ މީހުން ބައިތިއްބާ އެވިން ޕްރިޒްން އެވެ. ވެރިރަށް ތެހެރާންގައި ހުންނަ އެވިން ޕްރިޒްންގައި ރޯވި އަލިފާންގަނޑުން ދުން އަރަމުންދާތަން ފެންނަ ވީޑިއޯތައް ހޮނިހިރު ދުވަހުގެރޭ އާންމުވެފައި ވެއެވެ. އަދި ބަޑިޖަހާ އަޑާއި އެއްޗެތި ގޮވާ އަޑު ވެސް އިވިފައިވެއެވެ.

ރޯވި އަލިފާންގަނޑު ކޮންޓްރޯލު ވެއްޖެކަމަށް އޮފިޝަލަކާއި ހަވާލާދީ ސްޓޭޓް މީޑިއާއިން ރިޕޯޓު ކުރި ފަހުން ވެސް އަލިފާން ރޯވެފައި ހުރިތަން ވީޑިއޯތަކުން ފެންނަ ކަމަށް ބައެއް މީޑިއާތަކުން ރިޕޯޓުކޮށްފައިވެއެވެ.

އީރާނުގައި މިވަގުތު ވަނީ ސަރުކާރާ ދެކޮޅު ވަރަށް ވަރުގަދަ އޮއިވަރެއް ފެށިފައެވެ. އިދިކޮޅު ހަރަކާތްތައް ފުރަތަމަ ފެށުނީ 22 އަހަރުގެ ޒުވާން އަންހެނެއް ކަމަށްވާ މާޝާ އަމީނީ، ބުރުގާ އަޅާފައި ހުރިގޮތް ރަނގަޅު ނޫންކަމަށް ބުނެ ހައްޔަރު ކުރިތާ ދެ ދުވަސް ފަހުން އޭނާ ކުއްލިއަކަށް މަރުވުމާއި ގުޅިގެންނެވެ. ފުލުހުން ބުނަނީ މާޝާ އަމީނީ މަރުވީ ހާޓް އެޓޭކެއް ޖެހިގެން ކަމަށެވެ. ނަމަވެސް އޭނާގެ އާއިލާއިން މިކަން ދޮގު ކުރެއެވެ. އަދި އޭނާ މަރުވެފައިވަނީ ފުލުހުން އޭނާގެ ބޮލަށް އަނިޔާ ކުރުމުން ކަމަށް އާއިލާ އިން ބުނެއެވެ.

ރިޕޯޓުތައް ބުނާ ގޮތުން ޖަލުގައި ރޯވި އަލިފާނާއި އިދިކޮޅު އިހްތިޖާޖްތަކާ ގުޅުމެއް ހުރި ކަމެއް ރެއާ ހަމަޔަށް ސާފެއް ނުވެއެވެ. ނަމަވެސް އެއީ ވުން އެކަށީގެންވާ ކަމެއް ކަމަށް ބެލެވެއެވެ. އެހެނީ އިދިކޮޅު މުޒާހަރާތަކުގެ ވަރަށް ގިނަބަޔަކު ފޮނުވުނީ އެޖަލަށް ކަމުގައި ވާތީއެވެ.

އީރާނުގެ ސްޓޭޓް މީޑިއާ އިން ބުނެފައިވަނީ އަލިފާން ރޯވުމާއި އިދިކޮޅު މުޒާހަރާތަކާ ގުޅުމެއް ނުވާ ކަމުގައެވެ.

ހާލަތު ކޮންޓްރޯލު ކުރެވިއްޖެ ކަމަށް ސަރުކާރުން ބުނި ފަހުން ވެސް ހުޅު ރޯވެފައި ހުރި މަންޒަރާ ބައެއް ކުށްވެރިން ފުރާޅުތަކުގެ މައްޗަށް އަރާ ތިބި މަންޒަރު ފެންނަ ވީޑިއޯތައް ވެސް ސޯޝަލް މީޑިއާގައި އާންމުވެފައިވެއެވެ.

މާޝާ އަމީނީގެ މަރާ ގުޅިގެން މީގެ ފަސް ހަފްތާ ކުރިން ފަށާފައިވާ ސަރުކާރާ އިދިކޮޅު ހަރަކާތްތަކަކީ އީރާން އިސްލާމިކް ރިޕަބްލިކް 1979ގައި ގާއިމު ކުރި ފަހުން ވެސް ކުރިޔަށް ދާ އެންމެ ވަރުގަދަ އިހްތިޖާޖުތަކެވެ.

އިހްތިޖާޖުގެ ބައިވެރިން ބުނަނީ އީރާނުގައި އަންހެނުންނަށް ފުރިހަމަ މިނިވަންކަން ލިބެންދެން، ސަރުކާރުގެ ހަމަލާތަކުން ކިތަންމެ ބައިވަރު މީހުން މަރުވެގެން ދިޔަ ނަމަވެސް، އިދިކޮޅު ހަރަކާތްތައް ކުރިޔަށް ގެންދާނެ ކަމުގައެވެ.

މިހާރުވެސް ފުލުހުން ބަޑިޖެހުމުގެ ސަބަބުން 222 މީހުން މަރުވެފައިވާ ކަމަށް އީރާންގެ ހިއުމަން ރައިޓްސް އެކްޓިވިސްޓުންނާ ހަވާލާ ދީ ލިބޭ ޚަބަރުތައް ބުނެއެވެ.