ސްކޫލަށް ދާއިރު ބުރުގާ އެޅުމާމެދު އިންޑިއާގެ ސުޕްރީމް ކޯޓުންވެސް ގޮތެއް ނުނިންމި!

އިންޑިއާގެ ސްކޫލްތަކުގައި ބުރުގާ އެޅުން މަނާކުރުމުގެ މައްސަލާގައި، އެކަން ބަލަމުން ދިޔަ ޕެނަލަށް ގޮތެއް ނިންމިފައި ނުވާކަމަށާއި، އަދި މިހާރު އެ މައްސަލަ ވަނީ އުއްތަމަފަނޑިޔާރަށް ފޮނުވާފައި ކަމަށް، މައްސަލަ ބަލަމުން ދިޔަ ޕެނަލުން އޮކްޓޯބަރު 13 ވީ ބުރާސްފަތި ދުވަހު ބުނެފިއެވެ.

ނަތީޖާއެއްގެ ގޮތުން، ސްކޫލްތަކުގައި ކިޔަވާ ކުދިން ބުރުގާ އެޅުން މަނާކުރުމަށް މި ވަގުތު ނެރެފައި އޮތް އަމުރު އެގޮތުގައި ބާއްވާނެއެވެ.

ސްކޫލްތަކަށް ކިޔަވަން ދާ އިރު، ދަރިވަރުން ބުރުގާ އެޅުން މަނާކުރުމަށް އިންޑިއާގެ ކަރުނާޓަކާ ސްޓޭޓްގެ ސަރުކާރުން ނިންމީ މިދިޔަ ފެބުރުއަރީ މަހުގެ ތެރޭގައެވެ. އެ ނިންމުމާއެކު އިންޑިއާގެ މުސްލިމުންގެ އާބާދީން ވަނީ އިންތިހާއަށް ނުރުހުން ފާޅުކޮށް، ވަރުގަދަ މުޒާހަރާތަކެއްވެސް ކުރިއަށްގެންގޮސްފައެވެ.

މުސްލިމު ދަރިވަރުން ކުރިއަށްގެންދިޔަ މުޒާހަރާތަކަށް ރައްދު ދިނުމުގެ ގޮތުން ހިންދޫ ދަރިވަރުންވެސް ވަނީ އެ ދީނުގެ ޝިއާރަށް ހިތްވަރުދޭ ސްކާފެއް ބޭނުންކޮށްގެން މުޒާހަރާކޮށްފައެވެ. ނަރޭންދްރާ މޯދީގެ ބޮޑުވަޒީރު ކަމުގައި، އިންޑިއާގައި މިހާރު އޮތް ހިންދޫ ނޭޝަނަލިސްޓް ސަރުކާރުގައި، މުސްލިމުން ހަވާސާ ކުރުމުގެ ޝަކުވާއާއި ދައުވާއަކީ ބޮޑުވެފައިވާ މައްސަލައެކެވެ. އިންޑިއާގެ އާބާދީގެ ނިސްބަތުން ބައިމަދު މުސްލިމުން މިހާ ނިކަމެތިކުރި ސަރުކާރެއް އެ ގައުމުގެ ތާރީޚު ނުދެކޭކަމަށްވެސް ބުނެއެވެ.

ސްކޫލްތަކުގައި ބުރުގާ ބޭނުން ކުރުމުގައި އުފެދިފައިވާ ދެބަސްވުންތަކުގައި އިންޑިއާގެ ގާނޫނީ ދާއިރާގެ ރައުޔުވެސް އެއްގަލަކަށް އެރުވޭ ގޮތް ވަނީ ނުވެފައެވެ.

ސުޕްރީމް ކޯޓުގެ ޕެނަލުގައި ހިމެނިވަޑައިގަންނަވާ އެއް ފަނޑިޔާރު، ހިމާންތު ގުޕްތާ ވިދާޅުވީ، ބުރުގާ އެޅުން މަނާކުރުމާ ދެކޮޅަށް ހުށަހަޅާފައިވާ މައްސަލަ ބޭރުކޮށްލައްވަން އޭނާ ބޭނުންފުޅުވާކަމަށެވެ. ނަމަވެސް އޭނާއާއެކުގައި ދެން މަސައްކަތް ކުރައްވާ ފަނޑިޔާރު، ސުދާންޝޫ ދޫލިއާ ވަނީ، ހިޖާބަކީ އަމިއްލަ އިޚްތިޔާރަށް ދޫކޮށްލެވިފައި އޮންނަ އެއްޗަކަށް ވާންޖެހޭކަމަށް ވިދާޅުވެފައެވެ.

ކަން މިހާރު ގޮސްފައިވާ ހިސާބުން، މައްސަލަ އިތުރަށް ކުރިއަށް ގެންދިއުމަށްޓަކައި މިހާރަށްވުރެ ބޮޑު ބެންޗެއް އެކުލަވާލައްވަން، އިންޑިއާގެ އުއްތަމަފަނޑިޔާރަށް ޖެހިވަޑައިގަންނަވާނެއެވެ.

އިންޑިއާގެ ސުޕްރީމް ކޯޓުން ނިންމާ ނިންމުމަކީ ގައުމީ ފެންވަރުގައި ތަންފީޒުކުރަންޖެހޭ އަމުރެކެވެ.

މުސްލިމުންނަކީ އިންޑިއާގެ އާބާދީއަށް ބަލާއިރު އެންމެ ބައި މަދު ގުރޫޕެވެ. 1.4 ބިލިއަން މީހުންގެ އާބާދީއެއް އޮތް އިންޑިއާގައި މުސްލިމުންގެ ހިއްސާއަކީ 13 ޕަސެންޓްއެވެ. އަޣުލަބިއްޔަތު އޮންނަނީ ހިންދޫންނަށެވެ.