މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ސަރުކާރުން ކުރިއަށް ގެންދާ ގޮދޮރުވެރިން ޕްރޮގްރާމުގެ ތެރެއިން މާލެ ރައްޔިތުންނަށް ގޯތި ދިނުމަށް ހިންގާ ބިންވެރިޔާ ސްކީމާއި، މާލޭ ރައްޔިތުންނާއި މާލޭގައި 15 އަހަރަށްވުރެ ގިނަ ދުވަހު އުޅެފައިވާ ފަރާތްތަކަށް، ގެދޮރުވެރިޔާ ސްކީމުގެ ދަށުން ހުޅުވާލި 4000 ފުލެޓަށް އެދުމުގެ ފުރުސަތު ހޮނިހިރު ދުވަހުގެ ރޭގަނޑު 11:59ށް ހަމަވާނެއެވެ.

މިހާރު ފޯމް ހުށަހަޅާފައިވާ ފަރާތްތަކުން ވެސް ފޯމުގައި ފުރިހަމަވާންޖެހޭ ހުރިހާ ކަމެއް ފުރިހަމަވޭތޯ ޔަގީންކުރަންޖެހޭނެއެވެ. ވަކިން ހާއްސަކޮށް ބިންވެރިޔާ އަދި ގެދޮރުވެރިޔާ ސްކީމުގެ ދަށުން ޖޮއިންޓް އެޕްލިކޭޝަން ހުށަހަޅާއިރު އިގުރާރު އެޕްރޫވް ކުރުމަށް ސަމާލުކަން ދޭންޖެހެއެވެ. ފަހަކަށް އައިސް މި މައްސަލަ ވަރަށް ބޮޑަށް ފާހަގަވާ ކަމަށް މިނިސްޓްރީން ވެސް ވަނީ ބުނެފައެވެ.

މިނިސްޓްރީން ބުނީ ޕޯޓަލް މެދުވެރިކޮށް ފޯމު ފުރާފައިވާ ފަރާތްތަކުގެ ތެރެއިން ޖޮއިންޓް އެޕްލިކޭޝަން ނުވަތަ އެކަކަށްވުރެ ގިނަ މީހުންގެ ނަމުގައި އެޕްލިކޭޝަން ހުށަހަޅާއިރު، ކޯ އެޕްލިކަންޓުންގެ ގޮތުގައި ބައިވެރިވާ ބައެއް ފަރާތްތަކުން ޕޯޓަލް މެދުވެރިކޮށް އިގުރާރު އެޕްރޫވް ނުކޮށް އޮތުމުގެ ސަބަބުން ފޯމު ސަބްމިޓް ނުވެ ހުންނަކަން ފާހަގަކުރެވިފައިވާ ކަމަށެވެ. އެހެންވެ އެކަމަށް ސަމާލުމަށް ދިނުމަށާއި އެކަކަށްވުރެ ގިނަ މީހުންގެ ނަމުގައި ހުށަހަޅާ ފޯމުތައް ލެވޭނީ އެ އެޕްލިކޭޝަންގައި ބައިވެރިވާ ހުރިހާ ފަރާތްތަކުން ވެސް އީފާސް މެދުވެރިކޮށް އިގުރާރުވުމުން ކަމަށް ވެސް އެ މިނިސްޓްރީން ބުނެއެވެ.

މި އިގުރާރު އެޕްރޫވް ކުރުމަށް އީފާސް މެދުވެރިކޮށް ގެދޮރުވެރިން ޕޯޓަލަށް ވަދެ "ބައިވެރިވާ ފަރާތްތަކުގެ އިގުރާރު" ގައިވާ "އާއެކޭ" ނުވަތަ "ނޫނެކޭ" ގެ ތެރެއިން ބޭނުންވާ އެއްޗެއް ހިޔާރު ކުރެވޭނެއެވެ.

މީގެ އިތުރުން ގޯތި ދޭއިރު، މާލޭ މީހުންގެ ގޮތުގައި ބަލާ މިންގަނޑަށް ލުޔެއްވެސް ވަނީ ދީފައެވެ. އުސޫލަށް ގެނެސްފައިވާ އިސްލާހުގައި ބުނާގޮތުން، ސަރުކާރުން ކަނޑައެޅި އުސޫލެއް ނުވަތަ ގަވާއިދެއްގެ ސަބަބުން ކުރިން އެހެން ތަނެއްގައި ރެޖިސްޓްރީވެފައި އޮތްނަމަވެސް، އެ މީހެއްގެ މަންމަ ނުވަތަ ބައްޕައަކީ މާލޭ މީހެއް ކަމުގައި ވާނަމަ، އަދި އެ މީހަކު މިހާރު އަނެއްކާވެސް މާލޭގައި ރަޖިސްޓްރީވެފައިވާ މީހެއްކަމުގައި ވާނަމަ އެ މީހަކީ މާލޭ މީހެއް ކަމަށް ބެލެވޭނެއެވެ.

ބިންވެރިޔާ ސްކީމުގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމަށް ހަމަޖެހިފައިވާ އުސޫލުގައިވާ ކަންކަން ފުރިހަމަވޭތޯ ޗެކްކުރުމާއި، ވަކިން ހައްސަކޮށް ޖޮއިންޓް އެޕްލިކޭޝަން ހުށަހެޅިފައިވަނީ ރަނގަޅަށްތޯ، އަދި މުހިންމު ހުރިހާ ލިޔެކިޔުމެއް ހަމަވޭތޯ ޗެކްކުރަން ޖެހެއެވެ.

މާލެއިން ގޯތި ނުދޭތާ އެތަކެއް އަހަރުވެފައިވާ އިރު، ރައީސް އިބްރާހީމް މުހައްމަދު ސާލިހުގެ ސަރުކާރުން ހާއްސަ އިސްކަމެއް ދެއްވައިގެން މާލޭގެ ރައްޔިތުންނަށް ހާއްސަކޮށްގެން ބިން ދޫކުރުމަށް ނިންމާ، އެކަމުގެ މަސައްކަތްތައް ދަނީ ކުރެވެމުންނެވެ.

އެގޮތުން ހުޅުމާލެއިން 1000 ގޯތި، އަދި ގުޅީފަޅުން 2000 ގޯތި މިބުރުގައި ދެވޭނެއެވެ. ޖުމްލަ 5000 ގޯތި ދެއްވާނެކަމަށް ރައީސް ވަނީ އިއުލާން ކުރައްވާފައެވެ. މީގެ އިތުރުން މާލެ މީހުންނާއި، މާލޭގައި ދިރިއުޅޭތާ 15 އަހަރަށްވުރެ ގިނަ ދުވަސްވެފައިވާ ފަރާތްތަކަށް ހާއްސަކޮށްގެން 4000 ފުލެޓް ދޫކުރުމަށް ވަނީ ނިންމާފައެވެ.