ފީފާގެ ކުރިއަށް އޮތް ދައުރަށް ކޮންމެބޯލްގެ ތާއީދު އިންފަންޓީނޯއަށް

ފުޓްބޯޅައިގެ މައި އިދާރާ, ފީފާގެ ކުރިއަށް އޮތް ދައުރުގެ ރައީސް ކަމަށް ސައުތު އެމެރިކަން ފުޓްބޯލް ކޮންފެޑެރޭޝަން (ކޮންމެބޮލް)އިން ތާއީދުކުރާނީ މިހާރުގެ ރައީސް ޖިއާނީ އިންފަންޓީނޯއަށްކަން ހާމަކޮށްފިއެވެ.

އިންފަންޓީނޯއަކީ ފީފާގެ ނުވަވަނަ ރައީސްއެވެ. އެންމެ ފުރަތަމަ މަގާމަށް އިންތިޚާބުވީ 2016 ވަނަ އަހަރުގެ ފެބްރުއަރީ މަހު އޮތް ފީފާގެ އެކްސްޓްރާ އޯޑިނަރީ ކޮންގްރެސްގައެވެ. އިންފަންޓީނޯ މަގާމަށް އިންތިޚާބުވީ އޭރު ހުރި ފީފާގެ ރައީސް ސެޕް ބްލެޓަރ އިސްތިއުފާ ދިނުމުންނެވެ. އެފަހަރު އިންފަންޓީނޯ އިންތިޚާބު ކާމިޔާބުކުރީ ޝެއިޚް ސަލްމާނާ ވާދަކޮށް ކުރިހޯދައިގެންނެވެ. އޭގެފަހުން އިންފަންޓީނޯ ވަނީ 2019 ވަނަ އަހަރުގެ ޖޫން މަހު ދެވަނަ ދައުރަކަށް އިންތިޚާބުވެފައެވެ.

ފީފާގެ ރައީސްކަމުގެ އިންތިޚާބު ދެން އޮންނާނީ މިއަންނަ އަހަރު މާޗް މަހަށް ތާވަލުކުރެވިފައި އޮތް ފީފާގެ 73 ވަނަ ކޮންގްރެސްގައެވެ. މި އިންތިޚާބުގައި ކޮންމެބޮލްއިން ތާއީދުކުރާނީ 52 އަހަރުގެ އިންފަންޓީނޯއަށްކަން ހާމަކުރީ އަންގާރަ ދުވަހު ނެރުނު ބަޔާނެއްގައެވެ. އިންފަންޓީނޯއަށް ތާއީދުކުރަން ނިންމީ އަދުގެ ހާލަތާއި ފުޓްބޯޅައިގެ މުސްތަގުބަލަށް ވިސްނުމަށްފަހު، ކޮންމެބޮލްގެ މެމްބަރު އެސޯސިއޭޝަންތަކުންކަމަށް ބަޔާނުގައިވެއެވެ.

ކޮންމެބޮލްގެ އިތުރުން، އޭޝިއަން ފުޓްބޯލް ކޮންފެޑެރޭޝަން (އޭއެފްސީ)އާއި ކޮންފެޑެރޭޝަން އޮފް އެފްރިކަން ފުޓްބޯލް (ސީއޭއެފް)އިން ވެސް ވަނީ އިންފަންޓީނޯއަށް ތާއީދުކުރާކަން ދާދި ފަހުން ހާމަކޮށްފައެވެ.