އިނގިރޭސި ޕްރިމިއަރ ލީގުގައި މިސީޒަންގައި ރަނގަޅު ނަތީޖާތަކެއް ނެރެމުން އައި ބްރައިޓަން އަތުން މޮޅުވެ, ޓޮޓެންހަމްއިން ތާވަލްގެ ތިން ވަނަ ހިފަހައްޓައިފިއެވެ.
ބްރައިޓަންގެ ދަނޑުގައި ޓޮޓެންހަމް މޮޅުވީ 1-0 ނެވެ. ފުޓުބޯޅަ މެޗުގެ ހަމައެކަނި ލަނޑު ހެރީ ކޭން ޖެހީ ސޮން ތަނަވަސްކޮށްދިން ފުރުޞަތެއްގައި 22 ވަނަ މިނެޓުގައެވެ. މިއީ މިސީޒަންގައި ކޭންގެ އަށްޗަނަ ގޯލެވެ. މެޗުގެ ފަހު މިނެޓުގައި ކޭން ބަދަލުކުރީ އަނިޔާ ވެގެންނެވެ. އެކަމަކު މާބޮޑު އަނިޔާއެއްކަމަކަށް ނުބެލެވެއެވެ.
މިމޮޅާއެކު ޓޮޓެންހަމް ތިން ވަނައިގައި އޮތީ 20 ޕޮއިންޓާއެކުއެވެ. ދެ ވަނައިގައި އޮތް އާސެނަލްއާ ދެމެދު އޮތީ ޕޮއިންޓެއްގެ ފަރަޤެކެވެ. ބްރައިޓަން އޮތީ 14 ޕޮއިންޓާއެކު ހަ ވަނައިގައެވެ. ފަސް ވަނައިގައި އޮތީ 5-1 ން ބްރެންޓްފޯޑް ބަލިކުރި ނިއުކާސަލް ޔުނައިޓެޑެވެ.
